மழைக்குறிப்புகள்- கவிதை

**ayyasamy ram** · **ayyasamy ram** Thu Apr 21, 2022 6:56 am

-
*எவனோ புகைத்த
சிகரெட்டின் புகைத்திட்டுகளாக
சூழும் மேகங்கள்
முதுமையின் வெண்நரை கலந்த
கேசத்தை நினைவூட்டுகின்றன.

*மழை வந்ததும் ஒண்டுகிறோம்
கூரைக்குக் கீழ்.
சுவர்கள் தங்கள்
கக்கத்தின் கதகதப்பில்
நம்மை வைத்துக்கொள்கின்றன.

*கூரைகளின்
மிச்சத் துளிகள்
சொட்டச் சொட்ட
தோன்றுமொரு
இசைமயக்கம்

*மழையில் நனைந்தன
சில பைத்தியங்கள்
அவற்றின் பைத்தியங்களை
கழுவிச் சென்ற மழை
பூமிக்குள் புகுந்துகொண்டது
பைத்தியம் நீங்கிய பைத்தியங்கள்
களிப்பில் குதித்தன
பைத்தியங்களின் பைத்தியத்தை
ஒருசேரக் குடித்த பூமி
பைத்தியம் கொண்டு
கரகரவெனச் சுற்றத் தொடங்கியது
-
-தனசேகர்
நன்றி-சொல்வனம்.காம்

**ayyasamy ram** · **ayyasamy ram** Thu Apr 21, 2022 6:57 am

மார்கழி -கவிதை

தவளைகளின் நாவுகளாய்
பொறிகளுடன் வெப்பம் சுடர்ந்து கொண்டிருக்க
கைகள் நீண்டு
சர்ப்பத்தின் நாவென
அதை உண்கின்றன.
அக்கினிப்பழத்தின் ருசி
குருதியில் கலந்து
மெய்சிலிர்க்க
மயிர்க்கால்களில் உருகுகிறது பனித்துளி
-
தனசேகர்
நன்றி-சொல்வனம்.காம்

**ayyasamy ram** · **ayyasamy ram** Thu Apr 21, 2022 6:58 am

நிலக்காட்சி - கவிதை

முன்பகலின் சூரியன்
எரிகின்ற போது
கிளுவந்தழைகள் உதிர்ந்து
புழுக்கை வீச்சமடிக்கும்
தொழுவம் நீங்கி
செம்மண் காடோடும்
செம்மறிகள்;

கோடை மழையின்
ஈரம் குடித்து
முட்டியெழுந்திருக்கும்
கோரைப்புற்கள்
செம்மண்காட்டைப் பசியதாய்க் காட்டும்;

குனிந்த தலை நிமிராத குமரிகளென
உன்னிப்பாய் மேயும் செம்மறிகள்;
செம்புழுதியின் நடுவே
புணரும் அவைகளைக் கண்டு
சம்போகத்தின் வேட்கை முட்ட
வசவொன்றைக் கல்லென வீசி
அவற்றை முடுக்கிறான்
வாலிப மேய்ப்பன்.
-
தனசேகர்
நன்றி-சொல்வனம்.காம்

Sponsored content · Sponsored content

மழைக்குறிப்புகள்- கவிதை

மழைக்குறிப்புகள்- கவிதை

Re: மழைக்குறிப்புகள்- கவிதை

Re: மழைக்குறிப்புகள்- கவிதை

Re: மழைக்குறிப்புகள்- கவிதை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக