யானை - குருவி நட்பு!

**ayyasamy ram** · **ayyasamy ram** Sat Feb 19, 2022 6:24 pm

-
காட்டில் ஒரு யானையாம்- கண்
பார்வை மங்கி நடந்ததாம்!
வழி தெரியாமல் தவித்ததாம்
தடுக்கிக் கீயே விழுந்ததாம்!
-
கால் இழந்த குருவி இதைக்
கண்டு மிகவும் வருந்தியே
நட்பு கொண்டு யானைக்கு
உதவ மனம் கொண்டதாம்!
-
குருவி தினமும் யானைமேல்
ஏறி வழி காட்டுமாம்
காட்டில் இரண்டும் திரியுமாம்
களைத்து வீடு திரும்புமாம்!
-
யானை நடந்து சென்றது-வன
விலங்குகள் இதைக் கண்டன
’யானை மீது குருவியா’ எனக்
கூடிக் குழுமி சிரித்தன!
-
இதைக்கேட்ட யானையும்
சிரித்துக்கொண்டே சொன்னதாம்!
யார் சிரித்தால் நமக்கென்ன?-நம்
வேலை நாம் தொடருவோம்!
-
எதுவும் நமக்குத் தடையில்லை!
ஒருவருக்கொருவர் உதவியே
குறையை மறந்து வாழுவோம்
வாழ்ந்து காட்டி வெல்லுவோம்!
-
உண்மை தெரிந்தால் அப்போது
கேலிப்பேச்சு அடங்கிவிடும்!
இரக்கம் கொண்ட இருவரும்
இன்பமாக வாழுவோம்!
-
‘உண்மை’ அறிந்த விலங்குகள்
கேலி பேச்சை நிறுத்தின
யானை குருவி இரண்டிடமும்
மன்னிப்பு கேட்டு வருந்தின!
-
இடைமருதூர் கி.மஞ்சுளா
நன்றி-சிறுவர்மணி