கோதாவரி -காவிரி நதிகள் இணைப்பு.

**T.N.Balasubramanian** · **T.N.Balasubramanian** Fri Feb 18, 2022 9:12 am

சென்னை : கோதாவரி - காவிரி நதிகள் இணைப்பு திட்டம் குறித்து, முதல் ஆலோசனை கூட்டம், டில்லியில் இன்று நடக்கிறது. தமிழகம் உட்பட ஆறு மாநில பிரதிநிதிகள் பங்கேற்கின்றனர். தண்ணீர் பற்றாக்குறை உள்ள மாநிலங்கள் பயன் பெறும் வகையில், ஐந்து நதி நீர் இணைப்பு திட்டங்களை செயல்படுத்த, மத்திய அரசு முடிவெடுத்து உள்ளது. இதில், தமிழகம், ஆந்திரா, தெலுங்கானா மாநிலங்கள் பயன் பெறும் வகையில், கோதாவரி - கிருஷ்ணா - பெண்ணாறு - பாலாறு - காவிரி இணைப்பு திட்டமும் செயல்படுத்தப்பட உள்ளது.
300 டி.எம்.சி., நீர்
இதன் வாயிலாக, கோதாவரி ஆற்றில் ஆண்டுதோறும் மழைக் காலங்களில் வீணாகும், 300 டி.எம்.சி., நீர், பாசனம் மற்றும் குடிநீர் தேவைகளுக்கு பயன்படுத்தப்பட உள்ளது. இத்திட்டத்திற்காக, தெலுங்கானா மாநிலம் ஈச்சம்பள்ளியில், கோதாவரி ஆற்றில் கதவணை கட்டி, அங்கிருந்து 1,210 கி.மீ., கால்வாய் மற்றும் சுரங்கங்கள் வழியாக, தஞ்சாவூர் கல்லணைக்கு
தண்ணீர் எடுத்துச் செல்ல திட்டமிடப்பட்டுள்ளது.இதன் வாயிலாக, தெலுங்கானாவில் நல்கொண்டா, பிரகாசம் மாவட்டங்கள்; ஆந்திராவின் நெல்லுார், சித்துார் மாவட்டங்கள் பயன் பெறும். தமிழகத்தில் திருவள்ளூர், வேலுார், திருவண்ணாமலை, விழுப்புரம், கடலுார், காஞ்சிபுரம் மாவட்டங்கள் பயன் பெறும். தெலுங்கானா தலைநகர் ஹைதராபாத், தமிழகத்தின் தலைநகர் சென்னையின் குடிநீர் தேவையும் இத்திட்டத்தால் பூர்த்தி செய்யப்பட உள்ளது. இத்திட்டத்திற்கு, 60 ஆயிரம் கோடி ரூபாய்க்கு மேல் தேவை. உலக வங்கி கடனுதவி பெற்று செயல்படுத்த திட்டமிடப்பட்டு உள்ளது.

இதற்கான விரிவான திட்ட அறிக்கையை, மத்திய ஜல்சக்தி துறையினர், 2021 மார்ச் மாதம் தயாரித்து விட்டனர். இந்த நதிகள் இணைப்பு திட்டத்தை செயல்படுத்த, மஹாராஷ்டிரா, சத்தீஸ்கர், கர்நாடகா, தெலுங்கானா, ஆந்திரா, தமிழகம் ஆகிய மாநிலங்களின் ஒத்துழைப்பு அவசியம். எனவே, மாநிலங்களிடம் கருத்து கேட்டு, அறிக்கை அனுப்பி வைக்கப்பட்டது. இத்திட்டத்தை செயல்படுத்த முழு ஒத்துழைப்பு அளிக்க, தமிழக அரசு முன்வந்துள்ளது; விரிவான திட்ட அறிக்கைக்கு ஒப்புதல் அளித்து உள்ளது.
முரண்டு பிடிக்கிறது
தஞ்சாவூர் கல்லணைக்கு பதிலாக, கரூர் மாவட்டம், மாயனுார் கதவணையுடன் கால்வாயை இணைக்க, தமிழகம் வலியுறுத்தியுள்ளது. ஆனால், இத்திட்டத்தின் கீழ் தங்களுக்கும் தண்ணீர் வேண்டும் என, கர்நாடகா ஆரம்பத்திலேயே முரண்டு பிடிக்கிறது; மற்ற மாநிலங்கள் ஒப்புதல் அளிக்காமல் காலம் தாழ்த்தி வருகின்றன.
இதற்கிடையே, கோதாவரி - காவிரி இணைப்பு திட்டம் உறுதி செய்யப்பட்டு உள்ளதாக, மத்திய பட்ஜெட்டில் அறிவிக்கப்பட்டு உள்ளது. 'மாநிலங்களின் ஒத்துழைப்பை பெற்று, பணிகள் துவங்கப்படும்' என, மத்திய நிதி அமைச்சர் நிர்மலா சீதாராமன் அறிவித்துள்ளார். இதற்கான பணிகளை, மத்திய நீர்வளத் துறையினர் துவங்கி உள்ளனர். இத்திட்டம் தொடர்பாக, டில்லி ரபி மார்கில் உள்ள ஷ்ரம் ஷக்தி பவனில், இன்று பிற்பகல் 3:00 மணிக்கு, ஆறு மாநிலங்களின் நீர்வளத் துறை அதிகாரிகள் பங்கேற்கும் ஆலோசனை கூட்டம் நடக்கிறது.

மத்திய ஜல்சக்தி அமைச்சகம், இதற்கான ஏற்பாடுகளை செய்துள்ளது. இதில், தமிழகம் சார்பில் நீர்வளத் துறை செயலர் சந்தீப் சக்சேனா, காவிரி தொழில்நுட்ப பிரிவு தலைவர் சுப்பிரமணியன் ஆகியோர் பங்கேற்க உள்ளனர். இவர்களுக்கு உதவுவதற்காக, நீர்வளத் துறை குழுவினரும் டில்லி சென்றுள்ளனர். மற்ற மாநில அரசுகள் ஒத்துழைப்பு அளிக்கும் பட்சத்தில், இத்திட்ட பணிகள் விரைவில் துவங்கும். எனவே, இன்று நடக்கவுள்ள கூட்டம், தமிழக விவசாயிகள் மத்தியில் பெரும் எதிர்பார்ப்பை ஏற்படுத்தியுள்ளது.

சிறப்பு பணி குழு: ராமதாஸ் யோசனை
கோதாவரி - காவிரி இணைப்பு குறித்த ஆலோசனை மகிழ்ச்சி அளிக்கிறது; சிறப்பு பணி குழு அமைக்க வேண்டும்' என பா.ம.க., நிறுவனர் ராமதாஸ் கூறியுள்ளார். அவரது அறிக்கை:கோதாவரி - கிருஷ்ணா, பெண்ணாறு, காவிரி நதிகள் இணைப்பு திட்டம் தொடர்பாக, தமிழகம், கேரளா, கர்நாடகா, ஆந்திரா, தெலுங்கானா உள்ளிட்ட ஆறு மாநில நீர்வளத் துறை அதிகாரிகளுடன், மத்திய நீர்வளத் துறை அமைச்சகம் இன்று அவசர ஆலோசனை நடத்த இருப்பது வரவேற்கத்தக்கது.
கோதாவரி - காவிரி இணைப்பு திட்டத்தை விரைந்து செயல்படுத்த, இதில் சம்பந்தப்பட்ட அனைத்து மாநிலங்களையும் ஒருங்கிணைக்க, சிறப்பு பணிக் குழு அமைக்க வேண்டும்; திட்டத்தை நிறைவேற்ற இலக்கு நிர்ணயிக்க வேண்டும் என, இன்றைய கூட்டத்தில் தமிழகம் வலியுறுத்த வேண்டும்.இவ்வாறு ராமதாஸ் கூறியுள்ளார்.

நன்றி தினமலர்.

**T.N.Balasubramanian** · **T.N.Balasubramanian** Fri Feb 18, 2022 9:25 am

K.L.RAO , படித்தவர் நேரு /சாஸ்திரிஇந்திரா காந்தி மந்திரி சபைகளில் நீர்வள /விவசாய மந்திரியாக பணி ஆற்றியவர்.(1963)
Garland Canal --கங்கை --காவிரி இணைப்பு திட்டத்தை உருவாக்கியவர். ஆனால் செயல்படுத்த முடியவில்லை.ஏனென்று தெரியவில்லை.! .அந்த காலங்களில் அதிகம் பேசப்பட்ட திட்டம்.

**Dr.S.Soundarapandian** · **Dr.S.Soundarapandian** Fri Feb 18, 2022 10:26 am

திட்டம் செயற்படுத்தப்பட்டால் நல்லதுதான்!

**krishnaamma** · **krishnaamma** Sat Feb 19, 2022 10:12 pm

T.N.Balasubramanian wrote:K.L.RAO , படித்தவர் நேரு /சாஸ்திரிஇந்திரா காந்தி மந்திரி சபைகளில் நீர்வள /விவசாய மந்திரியாக பணி ஆற்றியவர்.(1963)
Garland Canal --கங்கை --காவிரி இணைப்பு திட்டத்தை உருவாக்கியவர். ஆனால் செயல்படுத்த முடியவில்லை.ஏனென்று தெரியவில்லை.! .அந்த காலங்களில் அதிகம் பேசப்பட்ட திட்டம்.

மேற்கோள் செய்த பதிவு: 1358084

மக்களுக்கு நல்லது நடந்துவிட்டால் அவர்களை வைத்து அரசியல் செய்ய முடியயாதே ஐயா... அதனால் தான் எந்த திட்டமும் நிறைவேராமல் பார்த்துக் கொள்வார்கள் இந்த அரசியல் வாதிகள் சோகம்