அமெரிக்காவின் 22 மாகாணங்களில் ஒமைக்ரான் தாக்கம்: சிடிசி தகவல்

-

ரோச்செஸ்டர்:
அமெரிக்காவின் 22 மாகாணங்களில் ஒமைக்ரான் தாக்கம்
ஏற்பட்டுள்ளதாக சிடிசி (நோய்த்தடுப்பு அமைப்பு) தகவல்
வெளியிட்டுள்ளது.

உலகம் முழுவதும் தற்போது ஒமைக்ரான் தாக்கம் அதிகரித்து
வருகிறது. அமெரிக்காவில் நோய்த்தடுப்பு அமைப்பான சிடிசி
இது குறித்த முக்கிய தகவல் ஒன்றை வெளியிட்டுள்ளது.

இதுவரை ஒமைக்ரான் தாக்கத்தால் அமெரிக்காவில் யாரும்
மரணம் அடையவில்லை. ஆனாலும் 2 டோஸ் கொரோனா
தடுப்பூசி செலுத்தப்பட்டவர்களுக்கு அதிகமாக ஒமைக்ரான்
தாக்கம் ஏற்பட்டுள்ளதாக அமெரிக்க மருத்துவத்துறை தகவல்
அளித்துள்ளது.

கடந்த டிசம்பர் 8ம் தேதி நாற்பத்தி மூன்று அமெரிக்கர்களுக்கு
ஒமைக்ரான் தாக்கம் கண்டறியப்பட்டது. இதில் ஐந்தில் நான்கு
பங்கு நோயாளிகளுக்கு ஏற்கனவே இரண்டு டோஸ் தடுப்பூசி
செலுத்தப்பட்டுள்ளது.
இது மருத்துவர்களிடையே அதிர்ச்சியை ஏற்படுத்தியது.

கொரோனா தாக்கம் ஏற்பட்ட நோயாளிகளைப்போலவே
இவர்களுக்கும் லேசான இருமல், உடல் அயர்ச்சி மற்றும் சுவாச
அடைப்பு உள்ளிட்ட ஆரம்ப அறிகுறிகள் ஏற்பட்டன. கொரோனாவின்
டெல்டா ரகத்துக்கும் ஒமைக்ரானுக்கும் உள்ள வித்தியாசம் என்ன
என்று தற்போது அமெரிக்க விஞ்ஞானிகள் தீவிர ஆராய்ச்சி மேற்
கொண்டு வருகின்றனர்.

டெல்டா ரகத்தை காட்டிலும் ஒமைக்ரான் தீவிரமாகப் பரவக்கூடியது
என்பது தற்போது தெரியவந்துள்ளது. அமெரிக்காவின்
50 மாகாணங்களில் 22 மாகாணங்களில் தற்போது ஒமைக்ரான்
பரவியுள்ளதாக சிடிசி மருத்துவர்கள் தகவல் அளித்துள்ளனர்.

தற்போது ஒமைக்ரான் குறித்து திரட்டப்பட்ட ஆரம்பகட்ட தகவல்கள்
மேலோட்டமானவையே, இன்னும் நிறைய ஆராய்ச்சி தேவைப்படுகிறது
என்று ரோசெஸ்டர் நகர தடுப்பு மருந்து ஆராய்ச்சி குழும இயக்குநர்
கிரகரி போலாண்ட் தெரிவித்துள்ளார்.

விரைவில் ஒமைக்ரான் தாக்கம் இதர மாகாணங்களுக்கு பரவாமல்
தடுக்க தற்போது அமெரிக்கா சுகாதாரத்துறை நடவடிக்கைகள்
மேற்கொண்டு வருகிறது.

தினமலர்