அதிகரிக்கும் வாகனங்கள் : சாலை வசதிகள் இல்லாததால் சிரமம்

ஆண்டுதோறும்
இந்தியாவில் வாகனங்களின் எண்ணிக்கை முன் எப்போதும் இல்லாத அளவில்
அதிகரித்து கொண்டே செல்கிறது. அதற்கு ஏற்றவாறு சாலை வசதி இல்லை. இதனால்
போக்குவரத்து நெரிசல் தவிர்க்க முடியாததாகி விட்டது.


கார்கள்
மற்றும் மோட்டார் சைக்கிள்கள் விற்பனை அதிகரித்து வருவதால், பன்னாட்டு
நிறுவனங்கள் தங்கள் வாகனங்களை இந்தியாவில் விற்பனை செய்ய தீவிரமாக
முயற்சித்து வருகின்றன. டொயோட்டோ, ஹோண்டா, வோக்ஸ்வாகன் போன்ற நிறுவனங்கள்
தங்களின் சிறிய கார்களை, டில்லியில் சமீபத்தில் நடந்த ஆட்டோ எக்ஸ்போவில்
அறிமுகப்படுத்தின. இந்தியாவில் சிறிய கார்களுக்கு வரவேற்பு உள்ளதே இதற்கு
காரணம். இதே போல விலை உயர்ந்த சூப்பர் பைக்குகளை ஹார்லி டேவிட்சன்,
டூகாட்டி மற்றும் ராயல் என்பீல்டு போன்ற நிறுவனங்கள் அறிமுகப்படுத்தின.
ஆனால், இந்த கார்கள் பயணிக்க இந்திய சாலைகள் தரமாக உள்ளதா என்பது முக்கிய
கேள்வி.


இந்திய சாலைகளில் வாகன
வேகம் குறித்து உலக வங்கி ஒரு ஆய்வு நடத்தியது. அதில் கூறப்பட்டுள்ள
முக்கிய அம்சங்கள்: இந்தியாவில் நெடுஞ்சாலைகளில் கூட, வாகனங்களின்
எண்ணிக்கை அதிகரித்து விட்டது. எனவே, ஒரு கார் அதிகபட்சமாக ஒரு மணி
நேரத்துக்கு 50 கி.மீ., வேகத்திலும், பஸ்கள் மற்றும் லாரிகள் மணிக்கு 35
முதல் 40 கி.மீ., வேகத்திலும் தான் செல்ல முடிகிறது. கடந்த 10 ஆண்டுகளில்,
இந்திய சாலைகளில் போக்கு வரத்து ஆண்டுக்கு 15 சதவீதம் என்ற அளவுக்கு
அதிகரித்து வருகிறது. "ரஷ் ஹவர்' என்ற காலை மற்றும் மாலை நேரங்களில்,
இந்திய சாலைகளில் வாகனங்களின் சராசரி வேகம் மணிக்கு 5 முதல் 10 கி.மீ.,
வரை குறைந்து விட்டது. இந்தியாவில் ஆயிரம் பேருக்கு 10 கார்கள் என்ற
அளவுக்கு தான் தற்போது நிலைமை காணப்படுகிறது. இப்போதே இந்த அளவுக்கு
போக்குவரத்து நெரிசல் காணப்பட்டால், எதிர்காலத்தில், வாகனங்களின்
எண்ணிக்கை மேலும் அதிகரிக்கும் போது, போக்குவரத்து நெரிசல் எந்த அளவுக்கு
இருக்கும் என்பதை சிந்திக்க வேண்டும். உலகளவில் சாலை வசதி அதிகம் உள்ள
நாடுகளில் இந்தியா இரண்டாவது இடத்தில் உள்ளது. ஆனால், இந்த சாலைகளில் 47
சதவீதம் தான் பயன்படுத்தும் அளவுக்கு உள்ளது. சாலை பராமரிப்பு என்பது
பெயரளவுக்கு தான் நடக்கிறது. இவ்வாறு உலக வங்கி அறிக்கையில்
கூறப்பட்டுள்ளது.


இந்திய
ஆட்டோமொபைல் உற்பத்தியாளர்கள் சங்கம், " ஆண்டுக்கு 18 லட்சம் கார்கள்
இந்தியாவில் விற்பனையாகிறது. 2016ல், இது 40 லட்சம் கார்கள் என்ற அளவுக்கு
அதிகரிக்கும்,' என்று தெரிவித்துள்ளது. இந்நிலையில் வரும் காலத்தில்
இந்திய சாலைகள் இந்த வாகனங்கள் செல்லும் அளவுக்கு இருக்குமா என்று
நிபுணர்கள் கேள்வி எழுப்பியுள்ளனர்.


இதுகுறித்து,
மத்திய சாலை போக்குவரத்து மற்றும் நெடுஞ் சாலை துறை அமைச்சர் கமல்நாத்
கூறுகையில், ""புதிய சாலைகள் அமைப்பது தான் இப்பிரச்னைக்கு தீர்வாக
அமையும்,'' என்று தெரிவித்தார். ஆனால், புதிய சாலைகள் அமைப்பது மட்டும்
போதுமான நடவடிக்கையாக இருக்காது என்றே நிபுணர்கள் கருதுகின்றனர்.
சாலைகளில் வாகனங்களின் எண்ணிக்கை குறைப்பதில் அரசு எந்த நடவடிக்கையும்
எடுக்கவில்லை. ஒவ்வொரு நகரத்திலும், மாற்று போக்குவரத்து வசதியை அதிகரிக்க
வேண்டும். பஸ்கள் உள்ளிட்ட பிற போக்குவரத்து வசதிகளை அதிகரித்தால் தான்,
தினமும் வெளியே செல்பவர்களுக்கு உதவியாக இருக்கும். அவர்களும் சொந்த
வாகனங்களில் செல்லாமல், பஸ் போன்ற பொதுவாகனங்களில் செல்ல தொடங்குவர். இது
தான் சாலைகளில் வாகன எண்ணிக்கை குறைக்க சிறந்த திட்டமாக இருக்கும்.
இத்துடன் சைக்கிள் பயன்பாட்டை அதிகரிக்க செய்ய வேண்டும். அப்போது தான்
மோட்டார் வாகனங்கள் பயன்பாடு குறையும் என்றும் நிபுணர்கள்
தெரிவித்துள்ளனர்.

எல்லா இடங்களிலும் இந்த தொல்லைதான்

சென்னையிலும் தான்.
12 கிலோமீட்டருக்கு ஒன்டரை மணி நேரம் ஆகும்.