நினைப்பு

**நாகசுந்தரம்** · 27/12/2011

இன்னல் வந்தபோதும்,
இறைவா உன்னை நினைக்கவில்லை!

கண்ணில் கோளாறு,
கடவுள் உன்னை நினைக்கவில்லை!

தனம் மிகுந்து சேர்க்கையிலும்,
திடமாய் உன்னை நினைக்கவில்லை!

பாடங்கள் படிக்கையிலும்,
பரமா உன்னை நினைக்கவில்லை!

உடல் சோர்ந்து உழைக்கையிலும்
உத்தமா உன்னை நினைக்கவில்லை!

பாரதியை, சிவனைப்போல் பாடுகையில்
சாரதி உன்னை சிந்தனை செய்யவில்லை!

உன்னை நினைக்காமல்
என் பொழுது போக்குகின்றேன்!

இருந்தால் என்ன?

இறைவா நீ என்னை நினைத்துவிடு
மண்ணில் மேன்மை நான் பெறுவேன்!

நான் உன்னை நினைக்காமல்
நித்தம் நகர்ந்தாலும்
கருணை செய்வதுதான்
கடவுள் உனக்கழகு!

குறுந்த மரத்தடியில்
குருவாய் வந்துவிடு!

உருகும் வாசகம் போல்
உன்னை தொழுதிடுவேன்!

அருணகிரியை அணைத்ததுபோல்
திருப்புகழை தந்துவிடு!

சந்தமாய் உன் புகழை
சந்ததம் பாடிடுவேன்!

சுந்தரர்க்கு சோதரன் போல் இந்த
சுந்தரனையும் சேர்ந்துவிடு!

பதிகம் பாடி உன்னை
பரவசமாய் போற்றிடுவேன்!

இன்று உன்னை வரவேற்க
இக்கவிதை நான் படைத்தேன்,
அந்தகன் வரும் முன்னே
அருகினில்வந்து விடு!

(நாகசுந்தரம்)

**T.N.Balasubramanian** · **T.N.Balasubramanian** Tue Sep 14, 2021 1:33 pm

வருக வருக நாகசுந்தரம் அவர்களே!

நினைப்பு கவிதையை மிகவும் ரசித்தேன்.

எங்களை பற்றிய நினைப்பு இன்று வருவதற்கு அருள் கிடைத்தது போலிருக்கிறது.

எவ்வளவு மாதங்கள் ஆகிவிட்டன.? கிட்டத்தட்ட 33 மாதங்கள். நிலவென அந்த காலத்தில்

ஈகரையில் கவிதையில் உறவாடியதை நினைக்கையில் மலருகின்றது மனம்.

நலமாக இருக்கின்றீர்களா? வீட்டில் யாவரும் நலமா? தொடர்ந்து இணைந்து இருங்கள் அய்யா.

@நாகசுந்தரம்

**நாகசுந்தரம்** · 27/12/2011

அனைவரும் நலம் ஐயா. மன்னிக்கவும், அலுவலக மாற்றம் மற்றும் பளு காரணமாக ஈகரையில் இணைய இவ்வளவு நாள் ஆனது. எனது கவிதையை ரசித்து மகிழ்ந்ததற்கு மிகவும் நன்றி. இனி தொடர்கிறேன். மிகவும் மகிழ்ச்சி, நன்றிகள்.