'இ - பாஸ்' வேண்டாம் :அனைத்து மாவட்டங்களுக்கும் ஒரே மாதிரியான தளர்வுகள்

சென்னை :
'அனைத்து மாவட்டங்களுக்கும், இ - பாஸ், இ - பதிவு
இல்லாமல் பயணிக்கலாம்' என்பது உட்பட, பல்வேறு புதிய
தளர்வுகளுடன், 12ம் தேதி வரை, தமிழகத்தில் ஊரடங்கு
நீட்டிக்கப்பட்டுள்ளது.

மாநிலத்தில், நடைமுறையில் உள்ள ஊரடங்கு, வரும், 5ம் தேதி
காலை, 6:00 மணிக்கு நிறைவடைகிறது. ஊரடங்கை நீட்டிப்பது
குறித்து, நேற்று அனைத்து துறை செயலர்களுடன், முதல்வர்
ஆலோசனை நடத்தினார்.

அப்போது எடுக்கப்பட்ட முடிவின்படி, வரும், 12ம் தேதி காலை,
6:00 மணி வரை ஊரடங்கு நீட்டிக்கப்பட்டுள்ளதாக, நேற்று இரவு
அறிவித்தார். அத்துடன் சில கட்டுப்பாடுகள் மற்றும் புதிய
தளர்வுகளையும் அறிவித்தார். அவற்றின் விபரம்:

நீட்டிக்கப்பட்டுள்ள தடைகள்:

* மாநிலங்களுக்கு இடையேயான, தனியார் மற்றும் அரசு பஸ்
போக்குவரத்துக்கு அனுமதியில்லை

* மத்திய உள்துறை அமைச்சகத்தால் அனுமதிக்கப்பட்ட
வழிதடங்களைத் தவிர, மற்ற சர்வதேச விமான போக்குவரத்துக்கு
தடை நீடிக்கும்

* திரையரங்குகள், அனைத்து மதுக்கூடங்கள், நீச்சல் குளங்கள்,
பொதுமக்கள் பங்கேற்கும் சமுதாய, அரசியல் கூட்டங்களுக்கு
தடை தொடரும்

* பொழுதுபோக்கு, விளையாட்டு கலாசார நிகழ்வுகள், பள்ளிகள்
மற்றும் கல்லுாரிகள், உயிரியல் பூங்காக்கள் திறக்கப்படாது

* திருமண நிகழ்வுகளில், 50 பேர்; இறுதிச் சடங்குகளில், 20 பேர்
மட்டுமே பங்கேற்க அனுமதிக்கப்படுவர்.

புதிய தளர்வுகள்:

* அனைத்து மாவட்டங்களுக்கும், 5ம் தேதி முதல்,
ஒரே வகையான தளர்வுகள் வழங்கப்படுகின்றன.

* நோய் கட்டுப்பாட்டு பகுதிகள் தவிர, அனைத்து
பகுதிகளிலும், ஏற்கனவே அனுமதிக்கப்பட்டுள்ள
செயல்பாடுகளை தொடரலாம்

* இரவு, 7:00 மணி வரை செயல்பட அனுமதிக்கப்பட்ட கடைகள்,
இனி இரவு, 8:00 மணி வரை செயல்படலாம்

* தடை செய்யப்பட்ட செயல்பாடுகள் தவிர, மற்ற
செயல்பாடுகள் அனைத்தும் அனுமதிக்கப்படும்.

கட்டுப்பாடுகள்:

* அரசு மற்றும் தனியார் தொழில் சார்ந்த, பொருட்காட்சி
நிகழ்வுகள் நடத்த அனுமதிக்கப்படும். உரிய அழைப்பிதழ்
வைத்திருப்போர் மட்டும் அனுமதிக்கப்படுவர்.

பொருட்காட்சி அமைப்பாளர், விற்பனை கூடங்களில்
உரிமையாளர்கள், பணியாளர்கள் கட்டாயம் இரண்டு
தவணை தடுப்பூசி செலுத்தி இருக்க வேண்டும்

* உணவகங்கள், விடுதிகள், பேக்கரிகள் மற்றும்
உறைவிடங்களில் உள்ள உணவகங்களில், காலை, 6:00 முதல்,
இரவு, 8:00 மணி வரை, உரிய காற்றோட்ட வசதியுடன், 50 சதவீத
வாடிக்கையாளர்கள் மட்டும் அமர்ந்து உணவு அருந்தலாம்

* ஒரே நேரத்தில், டீக்கடைகளில், 50 சதவீத வாடிக்கையாளர்கள்,
தேநீர் அருந்த அனுமதிக்கப்படுவர்

* கேளிக்கை விடுதிகள், உடற்பயிற்சி கூடங்கள், விளையாட்டுக்கள்
மற்றும் உணவகங்கள் மட்டும், கொரோனா தடுப்பு
நடவடிக்கைகளை பின்பற்றி செயல்பட அனுமதிக்கப்படும்

* தகவல் தொழில்நுட்ப நிறுவனங்கள், 50 சதவீத பணியாளர்களுடன்
இயங்கலாம்

* தங்கும் விடுதிகள், ஓட்டல்கள், விருந்தினர் இல்லங்கள் செயல்
படலாம். உணவு விடுதிகள் மற்றும் தங்குமிடங்களில், 50 சதவீத
வாடிக்கையாளர்கள் மட்டும் அனுமதிக்கப்படுவர்.

* அருங்காட்சியகங்கள், தொல்லியல் துறையின் பாதுகாக்கப்பட்ட
சின்னங்கள், அகழ் வைப்பகங்கள், காலை, 10:00 முதல்,
மாலை, 5:00 மணி வரை செயல்படலாம்

* உடற்பயிற்சி கூடங்கள், யோகா பயிற்சி நிலையங்கள்,
ஒரு நேரத்தில், 50 சதவீத வாடிக்கையாளர்களுடன் செயல்படலாம்
* டாஸ்மாக் கடைகள், காலை, 10:00 முதல், இரவு, 8:00 மணி வரை
திறந்திருக்கும்

* அனைத்து வழிபாட்டு தலங்களும் திறக்க அனுமதிக்கப்படும்.
திருவிழாக்கள் மற்றும் குடமுழுக்கு நடத்த அனுமதி இல்லை

* அனைத்து துணிக்கடைகள், நகைக்கடைகள், 50 சதவீத
வாடிக்கையாளர்களுடன் செயல்படலாம்

* வணிக வளாகங்கள் காலை, 9:00 முதல், இரவு, 8:00 மணி வரை
செயல்படலாம். அங்குள்ள திரையரங்குகள் மற்றும் விளையாட்டு
கூடங்களுக்கு அனுமதி கிடையாது. உணவகங்களில், 50 சதவீத
இருக்கைகளில், வாடிக்கையாளர்கள் அமர்ந்து, உணவு அருந்தலாம்

* மாவட்டத்திற்கு உள்ளேயும், மாவட்டங்களுக்கு இடையிலும்,
'ஏசி' வசதி இல்லாமல், 50 சதவீத இருக்கைகளில், பயணியர்
அமர்ந்து பயணிக்க அனுமதிக்கப்படுவர்

* ஆராய்ச்சி மாணவர்கள், தங்கள் கல்வி சார்ந்த பணிகளை,
கல்லுாரிகள் மற்றும் பல்கலைகளில் மேற்கொள்ளலாம்.
இவர்களின் கல்வி சார்ந்த பணிகளுக்காக, கல்லுாரிகள் மற்றும்
பல்கலைகள் செயல்படலாம்

* அண்ணா மேலாண்மை பயிற்சி நிலையம், அரசு பயிற்சி
நிலையங்கள், 50 சதவீத பயிற்சியாளர்கள் மட்டும் பங்கேற்கும்
வகையில் செயல்படலாம்

* பொழுதுபோக்கு, கேளிக்கை பூங்காக்கள், 50 சதவீத
வாடிக்கையாளர்களுடன் செயல்படலாம். திறந்தவெளியில்
நடத்தப்படும் விளைாயட்டுக்கள் மட்டும் அனுமதிக்கப்படும்.
தண்ணீர் தொடர்பான விளையாட்டுகளுக்கு, அனுமதி இல்லை

* மாவட்டங்களுக்கு இடையே பயணிக்க, 'இ - பாஸ், இ - பதிவு'
நடைமுறை ரத்து செய்யப்படுகிறது.இவ்வாறு முதல்வர்
தெரிவித்துள்ளார்.

நோய் கட்டுப்பாடு பகுதிகள்

நோய் கட்டுப்பாட்டு பகுதிகளில், அத்தியாவசிய செயல்
பாடுகளுக்கு மட்டும், அனுமதி அளிக்கப்பட வேண்டும்.
இந்த நோய் கட்டுப்பாட்டு பகுதிகளில், மருத்துவ அவசர
சேவைகள் மற்றும் அத்தியாவசிய பொருட்கள் வழங்குதல்
தவிர, இதர செயல்பாடுகளுக்கு அனுமதி இல்லை.

நோய் கட்டுப்பாட்டு பகுதிகளில், நோய் தொற்று பரவலை
கண்காணிக்க, குழுக்கள் அமைக்கப்பட்டு, வீடு வீடாக
தீவிரமாக கண்காணிக்கப்பட வேண்டும்.

தினமலர்