அரசுக்கு வருவாய் ஈட்ட அமைச்சர் உத்தரவு

-
சென்னை:
அரசுக்கு வருவாய் ஈட்டி தரும்படி, நீர்வளம் மற்றும் கனிம வளத்துறை அமைச்சர் உத்தரவிட்டுள்ளதால், புதிய குவாரிகளை அடையாளம் காணும் முயற்சிகளில், அதிகாரிகள் இறங்கி உள்ளனர்.

நீர்வளத்துறையின் கீழ் உள்ள, புவியியல் மற்றும் சுரங்கங்கள் கண்காணிப்பு மற்றும் கனிம வளத்துறை அதிகாரிகளுடன், துறை அமைச்சர் துரைமுருகன், சமீபத்தில் ஆலோசனை நடத்தினார்.அப்போது, 'அரசு மிகுந்த நிதி நெருக்கடியில் உள்ளதால், கூடுதல் நிதி ஆதாரங்களை திரட்ட வேண்டும். இதற்காக, புதிதாக மணல் குவாரிகளை தேர்வு செய்ய வேண்டும்' என, வாய்மொழி உத்தரவு பிறப்பித்து உள்ளார்.

தர்மபுரி, மதுரை, சேலம், திருவண்ணாமலை, விழுப்புரம் உள்ளிட்ட மாவட்டங்களில், அரசு புறம்போக்கு நிலங்களில் உள்ள தகுதிவாய்ந்த கிரானைட் குவாரிகளை உடனடியாக ஏலம் விட வேண்டும். வேலுார், ராணிப்பேட்டை மாவட்டங்களில் உள்ள, கறுப்பு கிரானைட் குவாரிகளை திறக்க வேண்டும். மாநிலம் முழுதும் புதிய கனிமவள குவாரிகளை கண்டறிந்து, அவற்றை சுரங்க குத்தகை விடவும், லாபகரமாக சந்தைப்படுத்தவும், அதிகாரிகள் முயற்சிக்க வேண்டும். இதன் வாயிலாக, அரசுக்கு வருவாய் ஈட்ட வேண்டும் என்றும், உத்தரவு பிறப்பித்து உள்ளார்.

அமைச்சரின் உத்தரவை அடுத்து, மாநிலம் முழுதும் மணல், கிரானைட், மேக்னசைட் உள்ளிட்ட குவாரிகளை அடையாளம் காணும் பணிகளில், புவியியல் மற்றும் சுரங்கங்கள் கண்காணிப்பு அதிகாரிகள் தீவிரமாக ஈடுபட்டுள்ளனர். கனிமவள விற்பனையை முறையாக கையாண்டால், டாஸ்மாக் மது விற்பனையை விட அதிகளவில் அரசிற்கு வருவாய் கிடைக்க வாய்ப்புள்ளது.

எனவே, முந்தைய ஆட்சியை போல இல்லாமல், கனிமவள விற்பனையை முறைப்படுத்த, முதல்வர் ஸ்டாலின் நடவடிக்கை எடுக்க வேண்டிய அவசியம் ஏற்பட்டுள்ளது.

தினமலர்