கடல் நீச்சல் -சில தற்காப்பு நடவடிக்கைகள்

* கிணறு, ஆறு, குளங்களில் நீச்சல் அடிப்பது போல
அல்ல, கடல் நீச்சல். உள்ளிழுக்கும் கடல் அலையின்
தாக்கம், அதன் உயரத்தையும், வேகத்தையும்
பொறுத்து மாறுபடும். நீச்சல் தெரிந்த திறமைசாலிகள்
கூட, இங்கு கரை சேர முடியாது

* ஒவ்வொரு கடலும் ஒவ்வொரு இயல்பில் இருக்கும்.
உதாரணமாக, திருச்செந்துாரில், கரையிலிருந்து,
1 கி.மீ., துாரத்துக்கு முன்பே அலைகளை, பாறைகள்
தடுத்து நிறுத்தி விடுவதால், அலையின் வேகம் குறைவு.

இதனால், இதை, 'பாதுகாப்பான கடல் பகுதி' என்று
சொல்லலாம். இதுவே, சென்னை, பாண்டிச்சேரி
போன்ற இடங்களில் அலை ஆக்ரோஷமாக இருக்கும்
என்பதால், இவை, 'ஆபத்தான கடல் பகுதி'கள்

* கடல் குளியலை சாகசமாக நினைப்பது, மற்றவர்கள்
முன்னிலையில் பந்தா செய்வது, ஒருவருக்கு ஒருவர்
போட்டி போட்டு ஆழத்துக்கு செல்வதெல்லாம்,
உயிர் பறிக்கும் ஆபத்துகள்

* கடலில் குளிக்க ஆசைப்படுவோர், குறைந்தபட்ச
விலையாக, சில ஆயிரம் ரூபாயிலிருந்து கிடைக்கும்,
'லைப் பாய்' - காற்று நிரப்பிய டியூப் அல்லது
'லைப் ஜாக்கெட்' போன்றவற்றை பயன்படுத்தலாம்

* கடலில் குளிக்க காலை, 10:00 மணி முதல் மாலை,
6:00 மணி வரை பாதுகாப்பான நேரம். அமாவாசை,
பவுர்ணமி தினம் மற்றும் அதற்கு முன், பின் இரண்டு
நாட்களில் அலையானது, ஆக்ரோஷத்துடன் கரையை
தாக்கும் அல்லது உள் வாங்கும்.

எனவே, இந்த நாட்களிலும் மற்றும் காற்று அதிகமாக
வீசும்போதும், மழை பொழிகிற போதும், கடல் பக்கம்
செல்ல வேண்டாம்

* சென்னை மெரினா கடற்கரையில் மட்டும் ஆண்டுக்கு,
50க்கும் மேற்பட்டோர், கடல் அலையில் சிக்கி இறந்து
போகின்றனர். இந்த கடற்கரையை பொறுத்தவரை,
வடகிழக்கு பருவக்காற்று வீசும், அக்டோபர் முதல்
ஜனவரி மாதங்களில், கடல் அலை ஆக்ரோஷமாக
இருக்கும்.

தென்மேற்கு பருவக்காற்று வீசும் மே முதல் ஆகஸ்ட்
மாதம் வரை, சில நாட்கள் சாதாரணமாகவும்,
சில நாட்கள் வேகம் அதிகரித்தும் காணப்படும்.

ஜனவரி முதல் ஏப்ரல் மாதம் வரை, பெரும்பாலும்
அலையின் உயரம் குறைவாகவும், ஆக்ரோஷம்
இல்லாமலும் காணப்படும்.
-
அந்துமணி- வாரமலர்(தினமலர்)