மகாபாரத தொடரில் நடித்த பழம்பெரும் நடிகர் கொரோனாவுக்கு பலி

-
லூதியானா,

தொலைக்காட்சியில் ஒளிபரப்பு செய்யப்பட்ட மகாபாரத
தொடரில் இந்திரன் வேடத்தில் நடித்த பழம்பெரும் நடிகர்
சதீஷ் கவுல் (வயது 74).

கடந்த 8ந்தேதி இவருக்கு சுவாச கோளாறு ஏற்பட்டு உள்ளது.
இதனால், பஞ்சாப்பின் லூதியானா நகரில் உள்ள பகவான்
ராம் அறக்கட்டளை மருத்துவமனையில் சிகிச்சைக்காக
அனுமதிக்கப்பட்டு உள்ளார்.

கடந்த 6 நாட்களுக்கு முன் அவருக்கு காய்ச்சலும் ஏற்பட்டு
உள்ளது. இதனால், மருத்துவமனையில் கொரோனா
பரிசோதனை நடத்தப்பட்டு உள்ளது. இதில் அவருக்கு
தொற்று இருப்பது உறுதி செய்யப்பட்டது.

இந்நிலையில், நேற்று அவரது பிராணவாயு அளவும் குறைந்தது.
இதனால் அவருடைய உடல்நிலை மோசமடைந்தது.
இதனை தொடர்ந்து நேற்று மதியம் 1.45 மணியளவில் அவர்
காலமானார்.

இதுபற்றி அவரது சகோதரி சுஷ்மா கவுல் கூறும்பொழுது,
காய்ச்சல் ஏற்பட்டு உடல்நலம் பாதித்ததனால் அவரை
மருத்துவமனையில் சேர்த்தோம்.

அவருக்கு கொரோனா பாதிப்பு ஏற்பட்டது பரிசோதனையில்
தெரிய வந்தது. ஆனாலும், அவரது உடல்நிலை நல்ல
முறையிலேயே இருந்தது. நேற்று காலையில் கூட அவரிடம்
பேசினேன். நலமுடன் உள்ளேன் என அவர் என்னிடம் கூறினார்.

ஒரு சில மணிநேரங்களுக்கு பின்னர் எனக்கு தொலைபேசி
அழைப்பு ஒன்று வந்தது. அதில், அவர் உயிரிழந்து விட்டார்
என எனக்கு தெரிவித்தனர் என கூறியுள்ளார்.

சதீஷ் கவுல், மகாபாரத தொடர் தவிர்த்து, விக்ரம் அவுர் பேட்டால்
என்ற தொலைக்காட்சி தொடரிலும் நடித்துள்ளார்.
‘பியார் தோ ஹோனா ஹை தா’ மற்றும் ‘ஆன்ட்டி நம்பர் ஒன்’
உள்ளிட்ட திரைப்படங்களிலும் நடித்துள்ளார்.

அவர், பஞ்சாபி மற்றும் இந்தி என 300க்கும் மேற்பட்ட
படங்களில் நடித்துள்ளார்.

தினத்தந்தி