விருதுநகரில் ஒரு அத்திப்பட்டி கிராமம்: 'சினிமா பாணியில் மறைக்கப்பட்ட இனம்'

விருதுநகர்
: விருதுநகர் அருகே உள்ள சின்னமூப்பன்பட்டியில் வசிக்கும் காட்டுநாயக்கன்
இனத்தை சேர்ந்த தாழ்த்தப்பட்ட மக்களை அதிகாரிகள் மறைத்ததால், தங்கள்
வாழ்க்கைக்கு வழியில்லாமல் உள்ளனர். படித்து பட்டதாரிகள் ஆகியும்,
பாரம்பரிய தொழிலான வேட்டை, குறி சொல்வதற்கு இளைஞர்கள் தள்ளப்பட்டுள்ளனர்.


விருதுநகர்
அருகே உள்ள சின்னமூப்பன் பட்டி கிராமத்தில் 150க்கும் மேற்பட்ட
காட்டுநாயக்கன் இனத்தவர்கள் வசிக்கின்றனர். 100 ஆண்டுகளுக்கு முன்
நாடோடியாக வந்த முன்னோர்கள், சின்னமூப்பன்பட்டியில் தங்கிவிட்டனர். 1989
முதல் காட்டு நாயக்கன் இனத்தவர்களை ஒருங்கிணைத்து, சங்கமாக அமைத்தனர்.
தங்களுக்கு ஜாதி சான்றிதழ் கேட்டு மனு செய்தனர். இன்று வரை அதிகாரிகள்
ஜாதி சான்று வழங்காமல், காட்டு நாயக்கன் என்ற இனத்தை மறைத்து வருகின்றனர்.
சின்னமூப்பன்பட்டியில் வசிப்பவர்கள் உண்மையில் காட்டு நாயக்கன்
இனத்தவர்களா, என்பதில் சந்தேகம் ஏற்பட்டது. இதனால், அந்த இனத்தை
சேர்ந்தவர்கள், என சான்று வழங்க அதிகாரிகள் தயக்கம் காட்டினர். சின்ன
மூப்பன்பட்டியை சேர்ந்த இவர்கள் குறி சொல்வது, காடுகளில் வேட்டைக்கு
செல்வது, திருமண சடங்கு முறைகள் அனைத்தும் காட்டு நாயக்கன் இனத்துக்குரிய
பழக்க வழக்கங்களை ஒத்து இருக்கிறது. இவர்களது குழந்தைகளை பள்ளியில்
சேர்க்கும்போது, இந்த பகுதியில் காட்டு நாயக்கன் இனம் இல்லாததால் தொட்டிய
நாயக்கன் இனத்தை சேர்ந்தவர்கள், என பள்ளி ஆசிரியர்கள் பதிவு செய்தனர்.
காலம் செல்ல செல்ல, தங்களது இனத்திற்குறிய சலுகைகள் கிடைக்காததால்
போராட்டம் நடத்தினர்.


அப்போதைய
விருதுநகர் கலெக்டர் சந்திரசேகரன், மதுரை காமராஜ் பல்கலை மானுடவியல்
துறைக்கும், ஊட்டி பல்லடாவில் உள்ள பழங்குடியினர் ஆய்வு மையத்திற்கும்
சின்னமூப்பன்பட்டி கிராமக்கள் ஜாதியின் உண்மைத்தன்மை அறிய
பரிந்துரைத்தார். அதன்படி, ஆய்வு செய்த காமராஜ் பல்கலை மானுடவியல்
பேராசிரியர் நளினி, இந்த பகுதி மக்களிடம் காட்டு நாயக்கன் இனத்திற்குரிய
பழக்க வழக்கங்கள் உள்ளதாலும், சமூக ரீதியாக முன்னேற்றம் காணாததாலும்
காட்டு நாயக்கன் என, சான்று வழங்கலாம் என அறிக்கை வழங்கினார். இதே போல்,
பழங்குடியினர் ஆய்வு மைய இயக்குனர் ஜக்கா பார்த்தசாரதியும், இவர்களுக்கு
காட்டுநாயக்கன் ஜாதி சான்று வழங்கலாம் என பரிந்துரை செய்துள்ளார். இந்த
பரிந்துரை கடிதத்தின் அடிப்படையில், சம்பந்தப்பட்ட அருப்புக் கோட்டை
ஆர்.டி.ஓ., விருதுநகர் தாசில்தார் உட்பட அனைவருக்கும் ஜாதி சான்றுகள்
வழங்க கலெக்டர் பரிந்துரை செய்திருந்தார். ஆனால் இது வரை இவர்களுக்கு ஜாதி
சான்றுகள் வழங்கப்படவில்லை. அதிகாரிகள் ஏற்கனவே தொட்டிய நாயக்கன் என ஜாதி
சான்று பெற்றுள்ளவர்களுக்கு, எப்படி காட்டு நாயக்கன் என சான்று வழங்க
முடியும் என காலம் கடத்தி வந்தனர்.


தற்போது
தொட்டிய நாயக்கன் என வழங்கப்பட்ட ஜாதி சான்றுகளை விருதுநகர் தாசில்தாரிடம்
இவர்கள் ஒப்படைத்து விட்டனர். தற்போது எந்த ஜாதியும் இல்லாமல்
அதிகாரிகளால் சினிமாவில் மறைக்கப் பட்ட அத்திப்பட்டி கிராமம் போல்
சின்னமூப்பன்பட்டி மக்கள் பாதிக்கப்பட்டுள்ளனர். அரசு நடவடிக்கை எடுத்து
காட்டு நாயக்கன் என சான்றிதழ் வழங்க முன் வர வேண்டும்.


இது
குறித்து காட்டு நாயக்கன் சங்க செயலாளர் கிருஷ்ணன் கூறியதாவது: எங்களது
ஜாதியின் உண்மைத்தன்மை குறித்து ஆய்வு செய்யப்பட்டு
உறுதிப்படுத்தப்பட்டுள்ளது. அதிகாரிகள் ஜாதி சான்றிதழ் வழங்க மறுத்து
வருகின்றனர். எனது மகன் ஏ.சி., மெக்கானிக் தொழில் படிப்பு முடித்தும்
இன்றும் குல தொழிலான குறி செல்வதற்கு, கிராமம் கிராமமாக அலைந்து
வருகிறான். நாங்கள் பட்ட கஷ்டம் எங்கள் பிள்ளைகளுக்கு வரக்கூடாது,
என்பதற்கு தான் படிக்க வைத்தோம். அரசு அதிகாரிகள் எங்கள் துன்பத்தை
தீர்க்க முன் வரவில்லை, என்றார்.


முதல்வரால் முடியும்: சின்னமூப்பன்
பட்டியிலுள்ள காட்டு நாயக்கன் இன மக்களுக்கு ஜாதி சான்றுகள் வழங்க
முதல்வர் தலையிட்டு சிறப்பு உத்தரவு பிறப்பிக்க வேண்டும். அப்போது தான்
வருவாய்த் துறை அதிகாரிகள் ஜாதி சான்றுகள் வழங்க முன் வருவார்கள்.
தமிழகத்தில்..... இதற்கு முதல்வர் தான் நடவடிக்கை எடுக்க வேண்டும்.