தேவைக்கேற்ப கட்டுப்பாடுகள் தீவிரப்படுத்தப்படும்: தலைமை செயலர்

-
சென்னை:
தமிழகத்தில் கொரோனா பரவலை கட்டுப்படுத்த தேவைக்கு
ஏற்ப கட்டுப்பாடுகள் தீவிரப்படுத்தப்படும் என தலைமை செயலர்
ராஜீவ் ரஞ்சன் தெரிவித்து உள்ளார்.

இந்தியாவில் 11 மாநிலங்களில் கொரோனா பரவல் அதிகரித்து
வருகிறது. இது தொடர்பாக மத்திய அமைச்சரவை செயலர்
ராஜீவ் கவுபா, சம்பந்தப்பட்ட மாநில அரசுகளுடன் ஆலோசனை
நடத்தினார். இதில், தமிழகத்தின் சார்பில் தலைமை செயலர்
ராஜீவ் ரஞ்சன் மற்றும் அதிகாரிகள் கலந்து கொண்டனர்.

இது தொடர்பாக தலைமை செயலர் வெளியிட்ட அறிக்கை
-
1. தமிழகத்தில் தற்போது, ஆர்டிபிசிஆர் பரிசோதனை தினமும்
50 ஆயிரம் செய்யப்படும் நிலையில், மத்திய அரசின் அறிவுரை
ஏற்று 85 ஆயிரம் பரிசோதனையாக அதிகரிக்கப்பட்டு உள்ளது.

2. தமிழகத்தில் 100 சதவீதமும் ஆர்டிபிசிஆர் பரிசோதனை மட்டுமே
செய்யப்படுகிறது

3. தமிழகத்தில் நோய்தொற்று ஏற்பட்டவரின் உடனிருப்பவர்கள்
மற்றும் தொடர்பில் உள்ளவர்கள் உடனுக்குடன் கண்டறியப்பட்டு,
பரிசோதனைக்கு உட்படுத்தப்பட்டு , அவர்கள் நோய் தொற்றுக்கு
உள்ளாகி இருந்தால், அவர்கள் தனிமைபடுத்தப்பட்டு தேவையான
சிகிச்சை அளிக்கப்படுகிறது.

4. நோய் தொற்று பாதிக்கப்பட்ட தெருக்கள் மற்றும் குடியிருப்புகள்
அடையாளம் காணப்பட்டு, மூன்றுக்கு மேற்பட்ட நபர்கள் பாதிக்கப்
பட்ட இருப்பது உறுதிசெய்யப்பட்டால், அந்த பகுதி நோய் க
ட்டுப்பாட்டு பகுதியாக அறிவிக்கப்பட்டு நோய் தடுப்பு நடவடிக்கை
எடுக்கப்படுகிறது.

தமிழகத்தில் நேற்று வரை 846 பகுதிகள் நோய் கட்டுப்பாட்டு
பகுதிகளாக கண்டறியப்பட்டு தீவிர கண்காணிப்பு நடவடிக்கைகள்
மேற்கொள்ளப்பட்டு வருகிறது.

5. தமிழகத்தை பொறுத்தவரை அனைத்து மாவட்டங்களிலும்
கொரோனா தொற்று ஏற்பட்டவர்களுக்கு சிகிச்சை அளிக்க தேவைக்கு
அதிகமாகவே படுக்கை வசதிகள், பிராணவாயு கருவிகள், மருந்துகள்,
பாதுகாப்பு கவசங்கள், தயார் நிலையில் வைக்கப்பட்டு உள்ளன.

மேலும், காலதாமதமின்றி சிகிச்சை அளிக்க ஏதுவாக ‛108'
அவசர கால ஊர்தி செயல்பாட்டில் உள்ளது.

6. தமிழகத்தை பொறுத்தவரை நிலையான வழிகாட்டு நெறிமுறைகளை
ஊடகங்கள், துண்டு பிரசுரங்கள், சமூக வலைதளங்கள் மற்றும் சுகாதார
ஊழியர்கள் மூலமாக அனைத்து மக்களுக்கும் வலியுறுத்தப்படுகிறது.

இந்த நெறிமுறைகளை மீறியவர்களிடம் கடந்த மார்ச் 16 முதல் நேற்று
வரை ரூ.2,58,98,600 அபராதம் வசூலிக்கப்பட்டு உள்ளது. சந்தை, வழிபாட்டு
தளங்கள், திருவிழாக்களில் கொரோனா நிலையான வழிகாட்டு
நெறிமுறைகளை அனைவரும் பின்பற்ற சம்பந்தப்பட்ட அதிகாரிகள்
கண்காணிக்கின்றனர்.

7. தமிழகத்தில், ஆரம்ப சுகாதார நிலையங்கள், அரசு மருத்துவமனைகள்,
மினி கிளினிக்குகள் மற்றும் தனியார் மருத்துவமனைகளில் தடுப்பூசி
போடப்பட்டு வருகிறது. மத்திய அரசின் நெறிமுறைகளின்படி, தமிழகத்தில்
31,75,349 பேருக்க தடுப்பூசி செலுத்தப்பட்டு உள்ளது. இன்று வரை
54.78, 720 தடுப்பூசி டோஸ்கள் தமிழகத்திற்கு வந்துள்ளது.

8. தமிழகத்தை பொறுத்தவரை மருத்துவ வல்லுனர்களின்
ஆலோசனைக்கு ஏற்ப நிலையான வழிகாட்டு நெறிமுறைகள்
வகுக்கப்பட்டு அனைத்து அரசு மற்றும் தனியார் மருத்துவமனைகளுக்கும்
சுற்றறிக்கை அனுப்பப்பட்டு பின்பற்றப்படுகிறது.

9. பொது சுகாதார இயக்குநரகம் மற்றும் அனைத்து மாவட்ட
தலைநகரங்களிலும் கட்டுப்பாட்டு அறை 24 மணி நேரமும் இயங்குகிறது.
பொதுமக்கள் மேற்கொண்டு தகவல்கள் பெறவோ தங்கள் குறைகளை
தெரிவிக்கவோ 24 மணி நேரமும் இயங்கும் ‛104' தொலைபேசி
எண்ணை தொடர்பு கொள்ள அறிவுறுத்தப்படுகிறார்கள்.

10. நோய் தொற்று குறித்து தினசரி தீவிரமாக கண்காணிக்கப்பட்டு
வருகிறது. தேவைக்கு ஏற்ப கட்டுப்பாடுகள் தீவிரப்படுத்தப்படும்.
இவ்வாறு அந்த அறிக்கையில் கூறப்பட்டு உள்ளது.
-
தினமலர்