ஒதுங்கிய அ.தி.மு.க., ராமதாஸ் கோபம்!

அ.தி.மு.க., கூட்டணியில், 23 தொகுதிகளை சுளையாக பெற்று
விட்டது, பா.ம.க., இதுவே,அக்கட்சிக்கு பெரும் சோதனையாகி
இருக்கிறது. செஞ்சி, மயிலம், ஜெயங்கொண்டம், ஆற்காடு,
சோளிங்கர் உள்ளிட்ட, 23 தொகுதிகளிலும், பா.ம.க., தனித்து
விடப்பட்ட சூழலை எதிர்கொண்டு வருகிறது.

அ.தி.மு.க., உள்ளிட்ட கூட்டணி கட்சியினர், ஒத்துழைப்பு இல்லை
என்பதால்,ராமதாஸ் கடும் கோபத்தில் இருக்கிறார்.
என்ன தான் பிரச்னை? விசாரித்தோம்.

ஆத்துார், கீழ்வேளூர் - தனி தவிர்த்து, எல்லா தொகுதிகளுமே,
வன்னியர்கள் அதிகம் உள்ள தொகுதிகள். ஆனால், அங்கு, பா.ம.க.,வை
காட்டிலும், அ.தி.மு.க.,வுக்கு செல்வாக்கு அதிகம். அவர்களே,
எம்.எல்.ஏ.,க்களாக இருக்கின்றனர். தொகுதிகள், பா.ம.க.,வுக்கு
போனதால், எம்.எல்.ஏ.,க்கள், 'அப்செட்' ஆகியுள்ளனர்.

அ.தி.மு.க., நிர்வாகிகள், தொண்டர்களுக்கும் எரிச்சல்.வன்னியர்களுக்கு
உள் ஒதுக்கீடு கிடைத்ததே, பா.ம.க.,வுக்கு பெரிய, 'பிளஸ்' என, நினைத்த
அக்கட்சியினரும், அ.தி.மு.க.,வை கண்டு கொள்ளவில்லை.
இதனாலும், அக்கட்சியினர் மீது, அ.தி.மு.க.,வினருக்கு கோபம்.

'நாம் போட்டியிடாத தொகுதிகளில், நாம் ஏன் தேர்தல் வேலை பார்த்து,
பா.ம.க.,வை ஜெயிக்க வைக்க வேண்டும்?' எனக்கேட்டு அப்படியே
பதுங்கினர். பா.ம.க.,வினர் அழைத்தாலும், இதோ... அதோ... என, போக்கு
காட்டினர். இது ஒரு பக்கம் இருக்க, உள் ஒதுக்கீடு விவகாரத்தால்,
வன்னியர் அல்லாத ஜாதிகளை சேர்ந்த அ.தி.மு.க.,வினருக்கு, பா.ம.க., மீது
அதிருப்தியை ஏற்படுத்தியது. இதனாலும், களப்பணியில் சுணக்கம்
காட்டினர்.

ஒவ்வொரு தொகுதியாக, இப்படி சரமாரியாக புகார்கள் வந்ததால்
ராமதாஸ், 'டென்ஷன்' ஆனார். ஆனாலும், வெற்றிதான் முக்கியம் எனக்
கருதி, பா.ம.க., போட்டியிடாத தொகுதிகளில் இருக்கும் வன்னியர்
இளைஞர்களை, பா.ம.க., தொகுதிகளுக்கு அனுப்பி வைத்தார்.

அவர்களுக்கு அவசர பயிற்சி அளித்து அனுப்பியதால், தொகுதியிலேயே
இடம் பிடித்து தங்கி திட்டமிட்டபடி வேலை செய்கின்றனர். வீடு வீடாக
சென்று ஓட்டு சேகரிக்கின்றனர்.

உள் ஒதுக்கீடு வன்னியர்களுக்கு கிடைத்தது, வரப்பிரசாதம் என
எடுத்துச் சொல்லி, அதற்குகாரணமான, பா.ம.க.,வுக்கு மாம்பழ
சின்னத்தில் ஓட்டளிக்க வேண்டும் என, திண்ணை பிரசாரம் செய்கின்றனர்.
ஆனால், பல இடங்களில் இதற்கு வரவேற்பு இல்லை.

அ.தி.மு.க.,வினரும் களத்தில் வேலை செய்தால் தான், பா.ம.க., வெற்றி
பெற முடியும் என்ற தகவல், ராமதாஸ் காதுக்கு போயிருக்கிறது.
உடனே அவர், முதல்வர் இ.பி.எஸ்.,சிடம் பேசியிருக்கிறார்.

'இருபத்திரண்டு தொகுதிகளுக்கு நடந்த இடைத்தேர்தலில், பா.ம.க., ஆதரவு தந்திருக்காவிட்டால், அ.தி.மு.க., வெற்றி பெற்றிருக்காது; ஆட்சியும் நீடித்திருக்காது என்பதை ஞாபகப்படுத்தி, எங்கள் தொகுதிகளில், அ.தி.மு.க.,வினரை நல்ல மனதோடு, வேலை செய்யச்சொல்லுங்கள்' என, கூறியிருக்கிறார்.

முதல்வரும் உடன் அமைச்சர் வீரமணியை அழைத்து, 'பா.ம.க., தொகுதிகளில், அ.தி.மு.க., இணைந்து பிரசாரம் செய்ய ஏற்பாடு செய்யுங்கள்' என்றார். அவரும் உடனே தன் மாவட்டஎல்லைக்குள், பா.ம.க., போட்டியிடும் தொகுதிகளில், அ.தி.மு.க.,வினரை உசுப்பி விடுவதற்காக, வேலுார், சோளிங்கர், ஆற்காடு, திருப்பத்துார் சென்று, கூட்டணி கட்சியினரை அழைத்து, 'மீட்டிங்' போட்டிருக்கிறார். '

நம் ஆட்சி தொடர உதவிய, பா.ம.க.,வுக்கு இந்த நேரத்தில் உதவி செய்வது தான், அவர்களுக்கு நாம் சொல்லும் நன்றியாகும் என, முதல்வர் உங்களிடம் சொல்லச் சொன்னார்' என, உருக்கமாக கூறியுள்ளார்.

'உள் ஒதுக்கீட்டால், உங்களுக்கு பாதிப்பு இல்லை என்று, வன்னியர் அல்லாத ஜாதியினருக்கு எடுத்துச் சொல்ல வேண்டும். எனவே பிற ஜாதியினரை உடன் அழைத்துச் செல்லுங்கள்' என்றும், சொல்லி இருக்கிறார் வீரமணி.

அதேபோல, அமைச்சர் கடலுார் சம்பத்துக்கும், சி.வி.சண்முகத்துக்கும், 'அசைன்மென்ட்' கொடுத்துள்ளார் இ.பி.எஸ்., இறுதி வேட்பாளர் பட்டியல் அறிவிக்கப்பட்டதும் நிலைமை சரியாகி விடும் என, பா.ம.க., எதிர்பார்க்கிறது.

தினமலர்