தடுப்பூசி போடுவதை விரிவுபடுத்த தற்காலிக மருத்துவமனை: தமிழக அரசு முடிவு

சென்னை: கொரோனா தடுப்பூசி போடுவதை விரிவுபடுத்த, மினி கிளினிக்குகள், ஆரம்ப சுகாதார நிலையங்கள் மற்றும் அனைத்து மருத்துவ வசதிகளுடன் கூடிய தற்காலிக மருத்துவமனைகளை ஏற்படுத்த தமிழக அரசு உத்தரவிட்டு உள்ளது.

கொரோனா தடுப்பு பணிகள் தொடர்பாக தலைமை செயலர் ராஜீவ் ரஞ்சன் தலைமையில் ஆலோசனை கூட்டம் நடந்தது. இந்த கூட்டத்தில் கூடுதல் தலைமை செயலாளர், சுகாதார செயலாளர் சென்னை மாநகராட்சி கமிஷனர் உள்ளிட்ட அதிகாரிகள் கலந்து கொண்டனர்.

இந்த கூட்டத்தில்,
*கொரோனா தடுப்பூசி போடுவதை விரிவுபடுத்த, மினி கிளினிக்குகள், ஆரம்ப சுகாதார நிலையங்கள் மற்றும் அனைத்து மருத்துவ வசதிகளுடன் கூடிய தற்காலிக மருத்துவமனைகளை ஏற்படுத்த முடிவெடுக்கப்பட்டது.

*ஏற்கனவே 761 மருத்துவமனைகளில் தடுப்பூசி போடப்பட்டு வருகிறது. மேலும், தடுப்பூசி போட விரும்பும் தனியார் மருத்துவமனைக்கும், இந்த வசதிகளை விரிவுபடுத்த நடவடிக்கை எடுக்க அறிவுறுத்தப்பட்டது.

*தடுப்பூசி டோஸ் ஏற்றவாறு, நபர்களை கண்டறிந்து தடுப்பூசி போடவும், தடுப்பூசி மருந்து வீணாகாமல் தடுக்கவும் கண்காணிக்க அறிவுறுத்தப்பட்டது.

*'ரோட்டரி கிளப்' போன்ற தடுப்பூசி பணிகளில் அனுபவம் வாய்ந்த தன்னார்வ தொண்டு நிறுவனங்களுடன் இணைந்து பணியாற்ற நடவடிக்கை எடுக்க அறிவுரை செய்யப்பட்டது.

*நோய் கட்டுப்படுத்தும் நோக்கத்துடன், ஏற்கனவே செயல்படுத்தியவாறு, கூடுதலாக ஆர்டி-பிசிஆர் பரிசோதனை எடுக்க சென்னை மாநகராட்சி, மாவட்ட நிர்வாகம் மற்றும் சுகாதாரத்துறைக்கு அறிவுறுத்தப்பட்டது.

*நோய் தொற்று உறுதியானவர்கள் மற்றும் அவர்களோடு தொடர்பில் உள்ளவர்களை கண்டறிந்து பரிசோதனை செய்து நோய் தொற்று இருந்தால் அவர்களுக்கு தேவையான மருத்துவ சிகிச்சை அளிக்க அறிவுறுத்தப்பட்டது.

*நோய் கட்டுப்பாட்டு பகுதியில் நோய் ஏற்பட காரணமாக .ள்ள நபர்கள் 3 பேருக்கு மேல் இருந்தால், தற்போதுள்ள நடைமுறைப்படி, நோய் கட்டுப்பாட்டு பகுதியாக அறிவிக்கப்பட்டது. இனி வரும் காலங்களில், ஒரு தெருவில் அல்லது குடியிருப்புகளில் மூன்று நபர்களுக்கு மேல் நோய் தொற்று இருந்தால், நோய் கட்டுப்பாட்டு பகுதியாக அறிவித்து, அங்கே உள்ளவர்களுக்கும் வெளியில் இருந்து உள்ளே வருபவர்களுக்கும் பரிசோதனை செய்ய முடிவெடுக்கப்பட்டது.

*கட்டுப்பாட்டு பகுதிகளில் பொது குழாய் இருக்கும் இடம், குடிநீர் வினியோகம் செய்யும் குடிநீர் தொட்டிகள், பொது கழிப்பிடம் போன்ற இடங்களில் கண்கூடாக தெரியும்படி, கிருமிநாசினி தெளிக்க வேண்டும்.

*நோய் கட்டுப்பாட்டு பகுதிகளில் ஏற்கனவே செயல்படுத்தப்பட்ட திட்டங்கள் மற்றும் செயல்பாடுகள் தொடர்ந்து செயலாக்க முடிவு செய்யப்பட்டது. அந்தந்த மாவட்ட நிர்வாகம், உள்ளாட்சி அமைப்புகள், சுகாதாரத்துறையுடன் இணைந்து செயல்பட அறிவுறுத்தப்பட்டது.

*கொரோனா மையங்களை பாறுத்தவரை, தேவையான டாக்டர்கள் மற்றும் நர்சுகளை நியமிக்கவும், அவர்களுக்கு உணவு போன்ற வசதிகளை ஏற்படுத்தி தர நடவடிக்கை எடுக்கவும் அறிவுறுத்தப்பட்டது.

*இந்த நடவடிக்கைகள் அனைத்தையும் சுகாதாரத்துறை, வருவாய்த்துறை , உள்ளாட்சி அமைப்புகள் இணைந்து செயல்படுத்தி நோய் தொற்றுகள் மேலும் பரவாமல் இருக்க நடவடிக்கை எடுக்க வேண்டும் என க்கூறியுள்ளார்.

தினமலர்