இந்திய மக்களின் செலவில் பிற நாடுகளுக்கு தடுப்பூசிகள் அனுப்பி வைக்கப்படவில்லை; மத்திய மந்திரி தகவல்

புதுடெல்லி,

உலகிலேயே மிகப்பெரிய அளவில் கொரோனா தடுப்பூசி உற்பத்தி செய்யும்
நாடுகளில் ஒன்றாக இந்தியா உருவெடுத்துள்ளது. இந்தியாவில் உற்பத்தி
செய்யப்படும் கோவிஷீல்டு, கோவேக்சின் தடுப்பூசிகள் கடந்த ஜனவரியில்
இருந்து சுகாதார, முன்கள பணியாளர்களுக்கு செலுத்தப்பட்டு வருகிறது.

இதன்பின்னர் கடந்த 1ந்தேதியில் இருந்து 60 வயது கடந்த முதியோர்கள்
மற்றும் 45 வயது கடந்த இணை நோய் கொண்டவர்களுக்கும் தடுப்பூசிகள்
செலுத்தப்பட்டு வருகின்றன.

இவை தவிர, உள்நாட்டில் உற்பத்தி செய்யப்படும் தடுப்பூசிகள் இலங்கை,
மாலத்தீவு, நேபாளம், ஆப்கானிஸ்தான், பூடான், வங்காளதேசம் உள்ளிட்ட
அண்டை நாடுகளுக்கு அனுப்பி வைக்கப்பட்டு உள்ளன.

இவற்றில், பூடான், மாலத்தீவு, வங்காளதேசம், நேபாளம், மியான்மர், சிசெல்ஸ்
ஆகிய நாடுகளுக்கு மானிய உதவியாக தடுப்பூசிகள் அனுப்பி வைக்கப்பட்டுள்ளன.
இலங்கை, ஆப்கானிஸ்தான், மொரீஷியஸ் ஆகிய நாடுகளுக்கும் மானிய உதவியாக
அனுப்பி வைக்கப்படுகின்றன.

சவுதி அரேபியா, தென்னாப்பிரிக்கா, பிரேசில், மொராக்கோ உள்பட பல்வேறு
நாடுகளுக்கு ஒப்பந்த அடிப்படையில் கொரோனா தடுப்பூசி அனுப்பி வைக்கும்
பணிகளும் நடந்துள்ளன. இதுவரை மானிய அடிப்படையிலும், ஒப்பந்த
அடிப்படையிலும் உலகின் பல்வேறு நாடுகளின் வேண்டுகோளுக்கு ஏற்ப கொரோனா
தடுப்பூசிகளை இந்தியா வழங்கி வருகிறது.

இதுபற்றி மத்திய சுகாதார மந்திரி ஹர்ச வர்தன் நாடாளுமன்றத்தில் இன்று
பேசும்பொழுது, இந்திய மக்களின் செலவில் கொரோனா தடுப்பூசிகள் பிற நாடுகளுக்கு
அனுப்பி வைக்கப்படவில்லை என கூறியுள்ளார். உயர்மட்ட அளவிலான நிபுணர்கள்
மற்றும் அரசின் குழு ஒன்றும் இந்த செலவினங்களை சமன்படுத்தும் பணியில் ஈடுபட்டு
உள்ளன.

நாம் இதுவரை 3 கோடி கொரோனா தடுப்பூசிகளை சுகாதார பணியாளர்கள்,
பொதுமக்கள் உள்ளிட்டோருக்கு செலுத்தி இருக்கிறோம். நேற்று ஒரே நாளில்
30 லட்சத்து 39 ஆயிரத்து 394 தடுப்பூசிகள் போடப்பட்டு உள்ளன என்று கூறியுள்ளார்

தினத்தந்தி

நல்லதோர் பணி மனித சமுதாயத்திற்கு.
வாழ்க பாரதம்.