மத்திய அரசு லாபத்தை தனியார்மயமாக்குகிறது, நஷ்டத்தை அரசுடைமையாக்குகிறது - ராகுல்காந்தி

புதுடெல்லி,

நாடாளுமன்றத்தில் கடந்த மாதம் தாக்கல் செய்யப்பட்ட மத்திய பட்ஜெட்டில்,
மேலும் 2 பொதுத்துறை வங்கிகளை தனியார் மயமாக்க உள்ளதாக நிதி
மந்திரி நிர்மலா சீதாராமன் அறிவித்தார்.

வங்கிகளை தனியார்மயமாக்கும் மத்திய அரசின் நடவடிக்கைக்கு வங்கி
ஊழியர் சங்கங்கள் கடும் எதிர்ப்பு தெரிவித்தன. இது தொடர்பாக மத்திய
அரசுடன் வங்கி ஊழியர் சங்கங்களின் சார்பில் பேச்சுவார்த்தையும்
நடத்தப்பட்டன. ஆனால் அதில் எந்தவித தீர்வும் எட்டப்படவில்லை

இதைத்தொடர்ந்து வங்கி ஊழியர் சங்கங்களின் கூட்டமைப்பான வங்கி
தொழிற்சங்கங்களின் ஐக்கிய மன்றம் சார்பில் 2 நாள் வேலை நிறுத்தத்துக்கு
அழைப்பு விடுக்கப்பட்டது. அதாவது நேற்றும், இன்றும் இந்த வேலை
நிறுத்தத்தை மேற்கொள்ள முடிவு செய்யப்பட்டது.

அதன்படி நாடு முழுவதும் நேற்று வங்கி ஊழியர்கள் வேலை நிறுத்தத்தை
தொடங்கினர். குறிப்பாக வங்கி ஊழியர்கள், மேலாளர்கள், அதிகாரிகள் என
சுமார் 10 லட்சம் பணியாளர்கள் இந்த வேலை நிறுத்தத்தில் ஈடுபட்டு
போராட்டங்களையும் மேற்கொண்டனர். இதனால் நாடு முழுவதும் பொதுத்துறை
வங்கிகளின் பெரும்பாலான கிளைகள் நேற்று மூடியே கிடந்தன.

இதனால் வங்கி சேவைகள் பாதிக்கப்பட்டன. பணப்பரிமாற்றங்கள், காசோலை
பரிமாற்றங்கள் என அனைத்துவிதமான சேவைகளும் முடங்கின.
அந்தவகையில் ரூ.16,500 கோடி காசோலைகள் கிடப்பில் உள்ளதாக வங்கி
அதிகாரிகள் தெரிவித்தனர்.

இந்நிலையில், வங்கி ஊழியர்கள் போராட்டத்திற்கு காங்கிரஸ் ஆதரவு
தெரிவித்துள்ளது. மேலும், அக்கட்சியின் முன்னாள் தலைவரும், வயநாடு தொகுதி
எம்.பி.யுமான ராகுல்காந்தி வங்கி ஊழியர்களுக்கு ஆதரவு தெரிவித்து டுவிட்டரில்
பதிவு ஒன்றை வெளியிட்டுள்ளார்.

ராகுல் காந்தி வெளியிட்ட டுவிட்டர் பதிவில், மத்திய அரசு லாபத்தை
தனியார்மயமாக்குகிறது மற்றும் நஷ்டத்தை அரசுடைமையாக்குகிறது. பொதுத்துறை
வங்கிகளை மோடியின் நண்பர்களுக்கு விற்பதன் மூலம் இந்தியாவின் நிதி பாதுகாப்பு
கடுமையாக சமரசம் செய்யப்படுகிறது. வேலைநிறுத்தம் செய்யும் வங்கி ஊழியர்களுக்கு
ஆதரவாக நான் துணை நிற்கிறேன்’ என்றார்.

தினத்தந்தி