நிலக்கரி இறக்குமதி செய்யும் விவகாரம் ரூ.1,330 கோடியிலான டெண்டரை இறுதி செய்ய தடை கோரி புதிய வழக்கு: ஐகோர்ட்டில் நாளை விசாரணை

சென்னை:
தமிழ்நாடு மின் உற்பத்தி மற்றும் பகிர்மான கழகம் சார்பில்,
மின் உற்பத்திக்காக வெளிநாடுகளில் இருந்து 20 லட்சம் டன்
நிலக்கரியை இறக்குமதி செய்வது தொடர்பான டெண்டர்
அறிவிப்பாணை பிறப்பிக்கப்பட்டது.

இதில் பல்வேறு குறைபாடுகள் இருந்ததால், டெண்டரை ரத்து செய்யக்
கோரி, தூத்துக்குடி இண்ட் விகோ நிலக்கரி நிறுவனம் சார்பில் சென்னை
ஐகோர்ட்டில் வழக்கு தொடரப்பட்டது. இந்த வழக்கை தனி நீதிபதி
தள்ளுபடி செய்தார்.

இதையடுத்து தாக்கல் செய்யப்பட்ட மேல்முறையீடு வழக்கும் தள்ளுபடி
செய்யப்பட்டது. இந்த நிலையில் குரோம்பேட்டையை சேர்ந்த சி.செல்வராஜ்
என்பவர் உயர் நீதிமன்றத்தில் ஒரு மனுவை தாக்கல் செய்துள்ளார்.
அதில், தேர்தல் தேதி அறிவிக்கப்பட்டு தேர்தல் நடத்தை விதிகள் அமலில்
உள்ளது.

இந்த நிலையில் நிலக்கரி இறக்குமதி டெண்டரை இறுதி செய்வது தேர்தல்
நடத்தை விதிகளுக்கு முரணானது.எனவே, டெண்டரை இறுதி செய்யக்கூடாது
என்று உத்தரவிட வேண்டும் என்று கோரியிருந்தார்.

இந்த மனு விசாரணைக்கு வராத நிலையில், மனுதாரர் சார்பில் மூத்த வக்கீல்
கே.எம்.விஜயன் தலைமை நீதிபதி சஞ்சீப் பானர்ஜி அடங்கிய முதல் அமர்வில்
ஆஜராகி, இந்த வழக்கை உடனடியாக விசாரணைக்கு எடுக்க வேண்டும்.
தேர்தல் நடத்தை விதிகளுக்கு முரணாக டெண்டரை இறுதி செய்ய
திட்டமிடப்பட்டுள்ளது என்றார்.

இந்த கோரிக்கையை ஏற்ற தலைமை நீதிபதி 11ம் தேதி (நாளை) விசாரணைக்கு
உத்தரவிட்டார். தேர்தல் நடத்தை விதிகள் தொடர்பான வழக்கு என்பதால்
தேர்தல் ஆணையத்தையும், தமிழக தலைமை தேர்தல் அதிகாரியையும்
வழக்கில் சேர்க்குமாறும் மனுதாரருக்கு நீதிபதிகள் உத்தரவிட்டனர்.

தினகரன்