ஜெயலலிதா-எடப்பாடி பழனிசாமி உருவம் அச்சிடப்பட்ட 13 ஆயிரம் புத்தக பைகள் பறிமுதல்;

ஜெயலலிதா-எடப்பாடி பழனிசாமி உருவம் அச்சிடப்பட்ட 13 ஆயிரம்
 புத்தக பைகள் அரசு பள்ளிக்கு கண்டெய்னர் லாரியில் கொண்டு
வரப்பட்டன. அதை தேர்தல் பறக்கும் படை அதிகாரிகள் பறிமுதல் 
செய்தார்கள். 

புத்தக பைகள்

ஈரோடு மாவட்டம் கோபி அருகே உள்ள பங்களாப்புதூரில் அரசு 
பள்ளிக்கூடம் உள்ளது. இந்த பள்ளியில் படிக்கும் மாணவ-மாணவிகளுக்கு 
வழங்குவதற்காக முன்னாள் முதல்-அமைச்சர் ஜெயலலிதா,
 முதல்-அமைச்சர் எடப்பாடி பழனிசாமி ஆகியோரது உருவம் அச்சிடப்பட்ட 
புத்தக பைகள் நேற்று உத்தரபிரதேச மாநிலம் லக்னோவில் இருந்து 
கண்டெய்னர் லாரியில் பங்களாப்புதூருக்கு வந்தது. 

409 மூட்டைகளில் கொண்டுவரப்பட்ட 13 ஆயிரத்து 88 புத்தக பைகளை 
பள்ளிக்கூடத்தில் நேற்று மதியம் தொழிலாளர்கள் இறக்கிக்கொண்டு 
இருந்தார்கள். 

பறிமுதல்

புத்தக பைகள் பள்ளிக்கூடத்தில் இறக்கப்படுவதை அறிந்த தி.மு.க, மற்றும் 
காங்கிரஸ் கட்சியினர் அங்கு விரைந்து வந்தார்கள். பின்னர் தேர்தல் நடத்தை 
விதிமுறைகள் அமலில் உள்ள நிலையில் ஜெயலலிதா, எடப்பாடி பழனிசாமி 
உருவம் அச்சிடப்பட்ட புத்தக பைகளை எப்படி மாணவ-மாணவிகளுக்கு 
வழங்குவதற்காக கொண்டு வரலாம் என்று எதிர்ப்பு தெரிவித்தார்கள்.

இதையறிந்த அந்தியூர் தொகுதி தேர்தல் பறக்கும் படை அதிகாரிகள் 
அங்கு சென்றார்கள். பின்னர் புத்தக பைகள் கொண்டு வந்த மூட்டைகளை 
பிரித்து பணம் இருக்கிறதா? என்று பார்த்தார்கள்.

 அதன்பிறகு புத்தக பைகளை பறிமுதல் செய்து அவைகளை கல்வி 
அலுவலகத்தில் பாதுகாப்பாக வைக்க ஊழியர்களுக்கு உத்தரவிட்டார்கள். 

தினத்தந்தி