ஓராறு படைவீட்டின் | தமிழ் பக்தி பாடல்

ஆல்பம் : சரவணா சன்னதி
பாடியவர் : P சுசீலா
இசை : சுரும்பின்
இயற்றியவர் : தமிழ் நம்பி
வீடியோ : கதிரவன் கிருஷ்ணன்
தயாரிப்பு : விஜய் மியூஸிக்கல்ஸ்
-
பாடல் வரிகள்:
--------------------

ஓராறு படைவீட்டின் மேன்மை போற்றி
உயிரான முருகா உன் பெருமை போற்றி
மாறாத நலம்கூட்டும் அருமை போற்றி
மலைமேவும் குமரா நீ போற்றி போற்றி
-
வேலோடு கொடிச்சேவல் மயிலும் போற்றி
விளையாடும் குன்றங்கள் யாவும் போற்றி
நூலாகும் உன்பாடல் பலவும் போற்றி
நோய்தீர்க்கும் வெண்நீறு போற்றி போற்றி
-
ஆவினன்குடி குடிவாழும் அண்ணல் போற்றி
அய்யா உன் மயிலாடும் குன்றம் போற்றி
பழனியெனும் தென்பொதினி மழையும் போற்றி
பழம் நீயே தண்டபாணி போற்றி போற்றி
-
சரவணமே நாணல்தான் பொய்கை போற்றி
சக்திவேல் அறம்காத்த மேன்மை போற்றி
ஏரகம் சுவாமிமலை ஏந்தல் போற்றி
இளங்குமரன் சேயோனே போற்றி போற்றி
-
குடைக்கூத்து ஆடிய என் செல்வம் போற்றி
குமரவேல் முருகவேல் அண்ணல் போற்றி
துடிக்கூத்து ஆடிய உன் காட்சி போற்றி
தூயோனே செவ்வேலே போற்றி போற்றி
-
வேற்படையை கொண்டாய் நின் வீரம் போற்றி
வெற்றிதரும் தங்கவேல் மின்னல் போற்றி
சேவற்கொடியோன் எனும் செம்மல் போற்றி
சேந்தன் எனும் முருகா நீ போற்றி போற்றி
-
அவ்வையார் பசிதீர்த்த தாய்மை போற்றி
அவர்பாடல் உவர்க்கேற்றத் தன்மை போற்றி
அருணகிரிக்கருள் செய்த அரசு போற்றி
அவர் தந்தத் திருப்புகழும் போற்றி போற்றி
-
முறைகண்ட நக்கீரர் உறவு போற்றி
முருகாற்றுப்படை நூலின் கருவும் போற்றி
அரும்பழநி கூத்தர்தம் பாடல் போற்றி
அன்புநிறை பெருமானே போற்றி போற்றி
-
அருள் குமரகுருபரத்து அத்தன் போற்றி
அவர் பேசி பாடிய உன் அருளும் போற்றி
தவமுனிவர் கச்சியப்பர் சொந்தம் போற்றி
தணிகை புராணமதும் போற்றி போற்றி
-
போரூரின் சிதம்பரர்தம் பெயரும் போற்றி
பொறுப்புடன் அவர்தந்த நூல்கள் போற்றி
அண்ணாமலை படைத்த சிந்து போற்றி
அருள் பாம்பன் அடிகள் சீர் போற்றி போற்றி
-
வள்ளலாரின் கண்ணாடி காட்சி போற்றி
வளமோங்கும் அருட்பாவின் இனிமை போற்றி
வண்ணச்சரபம் அவரின் வாழ்வும் போற்றி
வழங்கிய உன் புகழ் நூல்கள் போற்றி போற்றி
-
கச்சியப்ப சிவாச்சார்ய புலமை போற்றி
கந்தபுராணம் தந்த சிறப்பும் போற்றி
காவடியைத் தொடங்கி வாய்த்த இடும்பன் போற்றி
காலடியில் இடம்தந்தாய் போற்றி போற்றி
-
நெற்றிக்கண் கருவான நிலவு போற்றி
நெடுந்தீயில் உருவான அமுது போற்றி
பொற்றாமரைத் தொட்டில் ஆறும் போற்றி
பொய்கையும் சரவணமும் போற்றி போற்றி
-
கார்திகையாம் பெண்டிர்தம் பிள்ளை போற்றி
கனிவேண்டி சினம்கொண்ட கருத்தும் போற்றி
மயிள்மீது வலம்வந்த இளமை போற்றி
மருதப்பா குமரப்பா போற்றி போற்றி
-
வேடனும் நீ கிழவனும் நீ காதல் போற்றி
வேங்கை மரம் எனவந்த கோலம் போற்றி
கோடுடையான் கரிமுகனின் இளவல் போற்றி
குலம் காக்கும் நெடும் வேலும் போற்றி போற்றி
-
நான்முகனை சிறையிட்ட அறிவு போற்றி
நல்லாருக்குத் துணைநிற்கும் தெளிவு போற்றி
ஆண்மைக்கோர் பின்தோளின் வலிமை போற்றி
அகத்தியருக்கு தமிழ் தந்தாய் போற்றி போற்றி
-
மறந்தாரை மறவாத மாண்பு போற்றி
துறந்தார்க்கும் துணையான தூய்மை போற்றி
சிறந்தோங்கும் குங்குமமும் நீறும் போற்றி
சிவசக்தி அருட்செல்வம் போற்றி போற்றி
-
மார்பணியும் குறிஞ்சிப்பூ மாலை போற்றி
மணம்வீசும் நறுமலர்கள் யாவும் போற்றி
நீகொண்டத் திருத்தேர்கள் வலமும் போற்றி
நிகரேது அருளாட்சி போற்றி போற்றி
-
பாலூற்றி நீராட்டும் பதிகள் போற்றி
பழச்சாறும் தேன்வெள்ளம் பெருகும் போற்றி
நாள்தோறும் வரும் தொண்டர் கூட்டம் போற்றி
நாடிவரும் காவடிகள் போற்றி போற்றி
-
கற்பூரம் தரும்தூய சுடரும் போற்றி
கமழ்கின்ற சந்தனத்தின் மனமும் போற்றி
பொற்பாத நிழல் கூட்டும் குளுமை போற்றி
பொன்மேனித் திருக்காட்சி போற்றி போற்றி
-
தீராத வினைதீர்க்கும் நீறு போற்றி
தேடிவரும் பதினாறு பேறு போற்றி
ஏரகமும் வடிவேலும் குன்றும் போற்றி
எந்நாளும் நின்பாதம் போற்றி போற்றி
-
ஆறாகும் படைவீட்டின் அழகு போற்றி
அமர்கின்ற குன்றங்கள் யாவும் போற்றி
நீவாழும் நல்லாரின் நெஞ்சம் போற்றி
நிலைகொண்ட ஆறெழுத்து போற்றி போற்றி
-
வெள்ளிவேல் முத்துவேல் கூர்மை போற்றி
வெற்றிவேல் பழனிவேல் நேர்மை போற்றி
வீரவேல் தணிகைவேல் சீர்மை போற்றி
வீரம்மிகும் வைரவேல் போற்றி போற்றி
-
வேலய்யா முருகையா பாதம் போற்றி
வினைதீர்க்கும் குமரையா நாளும் போற்றி
ஓங்கார மந்திரத்தின் உயர்வு போற்றி
ஓம் முருகா ஓம் முருகா போற்றி போற்றி
போற்றி போற்றி போற்றி போற்றி
---------