மலேசியாவில் கடவுளின் பெயரால் ஒரு சர்ச்சை!

கடவுளின் பெயரால் ஒரு சர்ச்சை நடக்கிறது மலேசியாவில். கிறிஸ்தவ தேவாலயங்கள் தாக்கப்படுகின்றன. இதனால் நாட்டின் பெயர் கெடும்; முதலீடுகள் பாதிக்கப்படும் என அரசு கவலை அடைந்துள்ளது.

தெ ஹெரால்ட் என்று அங்கு ஒரு ஆங்கில பத்திரிகை வெளியாகிறது. கத்தோலிக்க மடம் சார்பில் நடத்தப்படும் இதழ் அது. அதன் மலாய் மொழி பதிப்பில் அல்லா என்ற சொல்லை பயன்படுத்தக்கூடாது என ஒரு பிரிவினர் ஆட்சேபித்தனர். இஸ்லாம் தவிர்த்த பிற மதத்தினர் தமது கடவுளை குறிக்க அல்லா என்ற சொல்லை பயன்படுத்தக்கூடாது என மலேசிய அரசு தடை விதித்தது.

முஸ்லிம்கள் மட்டுமின்றி, கிறிஸ்தவர்கள், யூதர்களும் தமது இறைவனை அல்லா என்று குறிப்பிடுகின்றனர். உலகின் மிகப்பெரிய முஸ்லிம் நாடான இந்தோனேசியாவிலும், மத்திய கிழக்கு நாடுகளிலும் அதுதான் வழக்கமாக உள்ளது. ஆயிரம் ஆண்டுகளுக்கு மேல் தொடரும் இந்த வழக்கத்துக்கு அரசு தடை விதிப்பது செல்லாது என கத்தோலிக்க மடம் வழக்கு தொடர்ந்தது. மலேசிய நீதிமன்றம் அந்த வாதத்தை ஏற்று, அரசின் தடையை ரத்து செய்தது. வரலாற்று அறிஞர்களும் பெரும்பாலான மத தலைவர்களும் இதை வரவேற்கின்றனர். சிலர் கடுமையாக எதிர்க்கின்றனர். அதன் தொடர்ச்சியாக தேவாலயங்கள் மீது குண்டு வீச்சு, தீவைப்பு சம்பவங்கள் நடக்கின்றன. இதையடுத்து நீதிமன்றம் தனது உத்தரவை நிறுத்தி வைத்துள்ளது.

மலாய் மொழியில் அல்லா என்பது கடவுளை குறிக்கும் பொதுச் சொல்லாக இருந்தாலும், படிப்பறிவு குறைந்த கிழக்கு மலேசிய முஸ்லிம்களை குழப்பவும், அவர்களை கிறிஸ்துவர்களாக மதம் மாற்றவும்தான் கத்தோலிக்க மடம் அந்த வார்த்தையை பயன்படுத்துகிறது என்று எதிர்ப்பாளர்கள் கூறுகின்றனர். மடம் அதை மறுக்கிறது. மலேசியாவில் மத மாற்றம் சட்டவிரோதம். சம்பந்தப்பட்ட பத்திரிகையின் முகப்பிலேயே ‘இது முஸ்லிம் அல்லாதவர்களுக்காக’ என்று அச்சிடப்பட்டுள்ளது. எனவே இது தேவையற்ற தடை என்கிறார்கள் அவர்கள்.

எதையாவது சாக்கிட்டு நாசவேலையில் ஈடுபடும் கும்பல்கள் எல்லா நாடுகளிலும் தயாராக இருக்கும் நிலையில், கடவுளின் பெயரால் கிளம்பும் பிரச்னைகளை அரசுகள் ஆறப்போடாமல் தீர்க்க முன்வருவது புத்திசாலித்தனம்.

அருமயான கருத்து தல ஒரு சில கயவர்கள் இப்படி செய்து சம்பாதிப்பது உண்டு