திருப்பாவை - தொடர்

by சக்தி18 on Fri Dec 18, 2020 4:04 pm

திருப்பாவை – 1

மார்கழித் திங்கள் மதிநிறைந்த நன்னாளால்
நீராடப் போதுவீர் போதுமினோ நேரிழையீர்
சீர்மல்கும் ஆய்ப்பாடிச் செல்வச் சிறுமீர்காள்
கூர்வேல் கொடுந்தொழிலன் நந்தகோ பன்குமரன்
ஏரார்ந்த கண்ணி யசோதை இளம்சிங்கம்
கார்மேனி செங்கண் கதிர்மதியம் போல்முகத்தான்
நாரா யணனே நமக்கே பறை தருவான்
பாரோர் புகழப் படிந்தேலோர் எம்பாவாய்.

விளக்கம்:
மார்கழி மாதம் பிறந்து விட்டது முழு நிலவு ஒளிவீசுகிறது. செல்ல வளம் நிறைந்த ஆயர்பாடியில் வசிக்கும் அழகிய மங்கையர்களே! அழகிய அணிகலன்களை அணிந்த கன்னியரே! எழுந்திருங்கள். இன்று நாம் அதிகாலையில் நீராடக் கிளம்புவோம். கூர்மையான வேலுடன் நம்மைப் பாதுகாத்து வரும் அரிய தொழிலைச் செய்யும் நந்தகோபன், அழகிய கண்களையுடைய யசோதாபிராட்டி ஆகியோரின் சிங்கம் போன்ற மகனும், கரிய நிறத்தவனும், தாமரை மலரைப் போன்ற சிவந்த கண்களை உடையவனும், சூரிய, சந்திரர்களைப் போல பிரகாசிக்கும் திருமுகத்தையுடையவனும், நாராயணனே கண்ணனாக அவதரித்து நமக்கு அருள் தர காத்திருக்கிறான். அவனை நாம் பாடிப் புகழ்ந்தால் இந்த உலகமே நம்மை வாழ்த்தும் என்று கூறி தோழியரை நோன்பு நோக்க அழைக்கிறாள் ஆண்டாள்.
(Priya Gurunathan)

by சக்தி18 on Fri Dec 18, 2020 4:06 pm

திருப்பாவை பாடல் – 2
வையத்து வாழ்வீர்காள்! நாமும் நம் பாவைக்குச்
செய்யும் கிரிசைகள் கேளீரோ பாற்கடலுள்
பையத்துயின்ற பரமன் அடிபாடி
நெய்யுண்ணோம் பாலுண்ணோம் நாட்காலே நீராடி
மையிட்டு எழுதோம் மலரிட்டு நாம் முடியோம்
செய்யாதன செய்யோம் தீக்குறளை சென்றோதோம்
ஐயமும் பிச்சையும் ஆந்தனையும் கைகாட்டி
உய்யுமா றெண்ணி உகந்தேலோர் எம்பாவாய்.

விளக்கம்:
ஒரு செயலில் வெற்றி பெற கட்டுப்பாடு மிகவும் அவசியம். வாயைக் கட்டிப்போட்டால் மனம் கட்டுப்படும். மனம் கட்டுப்பட்டால் கடவுள் கண்ணுக்குத்தெரிவான். அதனால் தான் பாவை நோன்பின் போது நெய், பால் முதலியவற்றை தவிர்த்து உடலைக் காப்பதுடன், தீயசொற்கள், தீயசெயல்களைத் தவிர்த்து மனதை சுத்தமாக்குவதையும் கடமையாக்குகிறாள் ஆண்டாள். இந்தப் பாடல் 107 வது திருப்பதியான திருப்பாற்கடல் குறித்து பாடப்படுகிறது.
(Priya Gurunathan)

by சக்தி18 on Fri Dec 18, 2020 9:25 pm

திருப்பாவை பாடல் – 3
ஓங்கி உலகளந்த உத்தமன் பேர்பாடி
நாங்கள் நம் பாவைக்குச் சாற்றி நீராடினால்
தீங்கின்றி நாடெல்லாம் திங்கள் மும்மாரி பெய்து
ஓங்கு பெருஞ்செந்நெல் ஊடு கயலுகள
பூங்குவளைப் போதில் பொறிவண்டு கண்படுப்ப
தேங்காதே புக்கிருந்து சீர்த்த முலை பற்றி
வாங்கக் குடம் நிறைக்கும் வள்ளல் பெரும்பசுக்கள்
நீங்காத செல்வம் நிறைந்தேலோர் எம்பாவாய்.

பொருள்:
சிறுமியரே! நம் பரந்தாமன் வாமன அவதாரத்தில் மூன்றடிகளால் விண்ணையும் மண்ணையும் அளந்து தன்னுடையதாக்கிக் கொண்ட உத்தமன். அவனது சிறப்பைக் குறித்து பாடி, நம் பாவைக்கு மலர்கள் சாத்தி வழிபடுவதற்கு முன் நீராடச் செல்வோம். இந்த விரதமிருப்பதால், உலகம் முழுவதும் மாதம் மும்முறை மழை பெய்து தண்ணீர் இல்லாத குறையைப் போக்கும். மழை காரணமாக வயல்களில் செந்நெல் செழித்து வளரும். மீன்கள் வயலுக்குள் பாய்ந்தோடி மகிழும். குவளை மலர்களில் புள்ளிகளையுடைய வண்டுகள் தேன் குடிக்க வந்து கிறங்கிக் கிடக்கும். வள்ளல் போன்ற பசுக்கள் பாலை நிரம்பத்தரும். என்றும் வற்றாத செல்வத்தை இந்த விரதம் தரும்

இன்றைய பாடகர்...நித்தியசிறி மகாதேவன்

நாளைய பாடகர்-ரேவதி சங்கரன்

by சக்தி18 on Sat Dec 19, 2020 12:43 am

திருப்பாவை -4 ரேவதி சங்கரன்

by **T.N.Balasubramanian** on Sat Dec 19, 2020 2:46 pm

Code:: [color=#006600][b]நல்லதோர் தொடக்கம் , சக்தி . இனிமேல் காலையில் எழுந்தவுடனேயே ஈகரையை திறந்து, நீங்கள் அனுப்பும் திருப்பாவையை கண்டு கேட்டு புனிதமடைந்து புண்யம் சேர்ப்போம்[/b]. [/color]

@சக்தி18

by **ayyasamy ram** on Sat Dec 19, 2020 3:15 pm

-

-

தெய்வத் தமிழில் இனியப் பாடல்களைப் பாடிய
ஆண்டாள் ஒரு தெய்வீகக் கவி மட்டுமல்ல;
விஞ்ஞான மேதையும் கூட அவரது திருப்பாவையில்
மெய்ஞானமும், விஞ்ஞானமும் இணைந்துள்ளது.

திருப்பாவையின் நான்காவதுப் பாடலான
“ஆழி மழைக் கண்ணா”
-என்ற பாடல் முழுவதும் விஞ்ஞானக் கருத்தே ப
ரவியிருக்கிறது.

மேகம் கடல்நீரை முகர்ந்துக்கொண்டு கருக்கொண்டு
மழையாகப் பொழிகிறது என்பதை மேனாட்டு அறிஞர்
கண்டு கூறும் முன்பே தமிழ் பெண்ணான ஆண்டாள்
கூறிவிட்டார். என்னே அவரது மேதமை!

கடல்நீரை மேகம் எடுத்துக்கொண்டு கரியமேகமாக
மாறி மின்னலாக மின்னி, இடியாக முழங்கி
சரமழையாகப்பொழிவதை எத்தனை அழகாக
விளக்குகிறார் ஆண்டாள்.

மேனாட்டு அறிஞர்கூறுவதற்கு , முந்நூறு ஆண்டுகளுக்கு
முன்பே நம் கோதை நாச்சியார் கூறிவிட்டார்.
ஆண்டாளின் இலக்கியப் புலமை மட்டுமல்ல, அறிவியல்
புலமையும் நம்மை வியக்க வைக்கிறது.

–கீதப்பிரியை. உமா ராதாகிருஷ்ணன்

by **T.N.Balasubramanian** on Sat Dec 19, 2020 3:56 pm

திருப்பாவை - தொடர் 28472160_1271672842932843_2182405004366362477_n.jpg?_nc_cat=108&ccb=2&_nc_sid=e3f864&_nc_ohc=nfxrqb3wkAAAX8hbGIo&_nc_ht=scontent-maa2-1

மேற்கண்ட சித்திரம் முழு திருப்பாவையும் ஒரு படத்தில் அமையப்பட்டது.
30 பாசுரங்கள், ஆண்டாள் பிறப்பு ,ஆண்டாள் -ரெங்கமன்னார் , பாற்கடல்நாதர்,பரமபதநாதர் --முதலியன பார்க்கமுடியும்.

நன்றி வாட்சப் மற்றும் கூகிள் படம்.

by சக்தி18 on Sun Dec 20, 2020 12:33 am

திருப்பாவை பாடல் – 4
ஆழி மழைக்கண்ணா! ஒன்று நீ கைகரவேல்
ஆழியுள் புக்கு முகந்துகொடு ஆர்த்தேறி
ஊழி முதல்வன் உருவம்போல் மெய்கறுத்து
பாழியந் தோளுடைப் பற்பநா பன்கையில்
ஆழிபோல் மின்னி வலம்புரிபோல் நின்றதிர்ந்து
தாழாதே சார்ங்கம் உதைத்த சரமழைபோல்
வாழ உலகினில் பெய்திடாய் நாங்களும்
மார்கழி நீராட மகிழ்ந்தேலோர் எம்பாவாய்.

பொருள்:
மேகத்திற்கு அதிபதியான பர்ஜந்யனே! நாங்கள் சொல்வதைக் கேள். உன்னிடம் ஒரு சொட்டு தண்ணீரைக் கூட வைத்துக் கொள்ளாதே. கடல் நீர் முழுவதையும் முகர்ந்து கொண்டு மேலே சென்று, உலகாளும் முதல்வனாகிய கண்ணனின் நிறம் போல் கருத்து, வலிமையான தோள்களையுடைய பத்மநாபனின் கையிலுள்ள பிரகாசமான சக்கரத்தைப் போல் மின்னலை வீசி, வலம்புரி சங்கு ஒலிப்பது போல் இடி ஒலியெழுப்பி, வெற்றியை மட்டுமே ஈட்டும் அவனது சார்ங்கம் என்னும் வில்லில் இருந்து புறப்படும் அம்புகளைப் போல் மழை பொழிவாயாக! அம்மழையால் நாங்கள் இவ்வுலகில் மகிழ்வுடன் வாழ்வோம். மார்கழி நீராடலுக்காக எல்லா நீர்நிலைகளையும் நிரப்பி எங்களை மகிழ்ச்சியடையச் செய்வாயாக.

by சக்தி18 on Sun Dec 20, 2020 12:34 am

ராம் சார்.

by சக்தி18 on Sun Dec 20, 2020 12:35 am

ஐயா.

by சக்தி18 on Sun Dec 20, 2020 12:43 am

திருப்பாவை-5

மாயனை மன்னு வட மதுரை மைந்தனைத்
தூய பெருநீர் யமுனைத் துறைவனை
ஆயர் குலத்தினில் தோன்றும் அணி-விளக்கைத்
தாயைக் குடல் விளக்கம் செய்த தாமோதரனைத்
தூயோமாய் வந்து நாம் தூ மலர் தூவித் தொழுது
வாயினால் பாடி, மனத்தினால் சிந்திக்க,
போய பிழையும் புகுதருவான் நின்றனவும்
தீயினில் தூசாகும்; செப்பு — ஏலோர் எம்பாவாய்.

மாயச் செயலுடைய கண்ணன் வடமதுரையில் பிறந்த திருக்குமாரனை
தூய யமுனை நதிக் கரையில் வசிப்பவனை
இடையர் குலத்தில் விளக்கை போல் அவதரித்து
யசோதைக்கு பெருமை தேடிக் கொடுத்த தாமோதரனை
பரிசுத்ததுடன் அணுகி, மலர்களைத் தூவி வணங்கி
வாயாரப் பாடி, நெஞ்சார தியானிப்போம்
முன்பு செய்த பாவங்களும், பின் வரும் பாவங்களும் அவன் அருளால்
நெருப்பில் விழுந்த பஞ்சாக உருத் தெரியாமல் அழிந்து போகும்
அகவே அவன் நாமங்களைச் சொல்!

இந்தப் பாடலை பாடியவர்கள் - சைந்தவி பிரகாஷ்,வித்தியா கல்யாணராமன்,சுசித்திரா பாலசுப்பிரமணியன்,வினயா கார்த்திக்

by சக்தி18 on Mon Dec 21, 2020 12:38 am

திருப்பாவை -6

புள்ளும் சிலம்பின காண், புள்ளரையன் கோயிலில்
வெள்ளை விளிசங்கின் பேரரவம் கேட்டிலையோ?
பிள்ளாய்! எழுந்திராய், பேய்முலை நஞ்சுண்டு
கள்ளக் சகடம் கலக்கு அழியக் கால் ஓச்சி
வெள்ளத்து அரவில் துயில் அமர்ந்த வித்தினை
உள்ளத்துக் கொண்டு முனிவர்களும் யோகிகளும்
மெள்ள எழுந்து அரி என்ற பேர் அரவம்
உள்ளம் புகுந்து குளிர்ந்து — ஏலோர் எம்பாவாய்.

பறவைகள் கூவிவிட்டன. கருடனை வாகனமாக கொண்ட விஷ்ணுவின் கோவிலில்
வெண்சங்கொலி பெரிய ஓசையிட்டு அழைப்பதைக் கேட்கவில்லையா?
இளம் பெண்ணே! எழுந்திரு பூதனா என்றும் அரக்கியின் நச்சுமுலையை உறிஞ்சி
வஞ்சகமான சகடாசுரன் வண்டி உருவில் வந்த போது கட்டுக் குலையும்படி காலால் உதைத்தான்
பாற்கடலில் பாம்பின் மேல் துயில் கொண்டு, உயிர்களுக்கெல்லாம் வித்தானவனை
முனிவர்களும் யோகிகளும் ஹரி ஹரி என்று கூறும் ஒலி
எங்கள் உள்ளம் புகுந்து குளிர்ந்தது.

இன்றைய பாடகர் - Dr. சோபனா விக்னேஷ்

சில நாடுகளில் அந்தப் பாடலைக் கேட்க முடியாது என்பதால்…

by **T.N.Balasubramanian** on Mon Dec 21, 2020 9:05 am

by சக்தி18 on Tue Dec 22, 2020 12:35 am

திருப்பாவை - 7

திருப்பாவை - தொடர் TN_20191221150612595242

கீசுகீசு என்றெங்கும் ஆனைச்சாத்தன் கலந்து
பேசின பேச்சரவம் கேட்டிலையோ? பேய்ப்பெண்ணே!
காசும் பிறப்பும் கலகலப்பக் கைபேர்த்து
வாச நறுங்குழல் ஆய்ச்சியர் மத்தினால்
ஓசை படுத்த தயிர் அரவம் கேட்டிலையோ?
நாயகப் பெண்பிள்ளாய்! நாராயணன் மூர்த்தி
கேசவனைப் பாடவும் நீ கேட்டே கிடத்தியோ?
தேசம் உடையாய்! திறவேலோர் எம்பாவாய்.

பொருள்: அறிவில்லாதவளே! ஆனைச்சாத்தன் என்றழைக்கப்படும் வலியன்குருவிகள் கீச்சிடும் குரலும், அவை தங்கள் துணையுடன் பேசும் ஒலியும் உனக்கு கேட்கவில்லையா? வாசனை மிக்க கூந்தலை உடைய ஆய்க்குலப் பெண்கள் மத்து கொண்டு தயிர் கடையும் ஓசையும், அப்போது அவர்களது கழுத்தில் அணிந்துள்ள அச்சுத்தாலியும், ஆமைத்தாலியும் இணைந்து ஒலியெழுப்புவது இன்னுமா கேட்கவில்லை? எல்லோருக்கும் தலைமையேற்று அழைத்துச் செல்வதாகச் சொன்ன பெண்ணே! நாங்கள் நாராயணான கேசவனைப் புகழ்ந்து பாடுவது உன் காதில் கேட்டும் உறங்கும் மர்மமென்ன? பிரகாசமான முகத்தைக் கொண்டவளே! உன் வீட்டுக்கதவைத் திற.

இன்றைய பாடகர் - கீதா சுந்தரேசன்

by **krishnaamma** on Tue Dec 22, 2020 10:59 am

by Sponsored content

திருப்பாவை - தொடர்

திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்

Re: திருப்பாவை - தொடர்