அன்புமணி ராமதாஸை எதிர்த்து வெற்றிபெற்றவர் திமுகவைச் சேர்ந்த மருத்துவர் செந்தில்குமார்.

தருமபுரி மக்களவைத் தொகுதியில் பாமக இளைஞரணித் தலைவர் அன்புமணி ராமதாஸை எதிர்த்து வெற்றிபெற்றவர் திமுகவைச் சேர்ந்த மருத்துவர் செந்தில்குமார்.

‘விடியலை நோக்கி ஸ்டாலினின் குரல்’ என்ற தலைப்பில் தருமபுரி மாவட்டத்தில் சட்டமன்றத் தேர்தல் பிரச்சாரத்தை செந்தில் குமார் மேற்கொண்டுள்ளார். பாமக நிறுவனர் ராமதாஸ், அன்புமணி ராமதாஸ் ஆகியோர் மீது தொடர்ந்து பல்வேறு விமர்சனங்களை முன்வைத்து வருகிறார் செந்தில் குமார்.

இந்நிலையில் பாப்பிரெட்டிபட்டி அருகேயுள்ள நத்தமேடு மற்றும் அதைச் சுற்றியுள்ள கிராமங்களில் நேற்றைய தினம் (டிசம்பர் 16) செந்தில் குமார் பிரச்சாரம் செய்ய முடிவு செய்தார். 1989ஆம் ஆண்டு நடைபெற்ற வன்னியர் இட ஒதுக்கீடு போராட்டத்தில் உயிரிழந்த பாமகவைச் சேர்ந்த சுப்பிரமணியனுக்கு நத்தமேட்டில் அமைக்கப்பட்ட நினைவுத் தூணுக்கு அஞ்சலி செலுத்த சென்றார். ஆனால், அது தனியார் இடத்தில் அமைக்கப்பட்டிருப்பதால் அனுமதிக்க முடியாது என ஒரு தரப்பினர் மறுப்பு தெரிவித்துள்ளனர். இதனால் அவர் அங்கு செல்லவில்லை.

நத்தமேடு கிராமத்திற்குள் செந்தில் சென்றபோது அவருக்கு பாமகவினர் எதிர்ப்பு தெரிவித்து தடுத்து நிறுத்தினர். ஆனால் அதை மீறி அவர் கிராமத்திற்குச் செல்ல முயன்றபோது பாமக இளைஞர்கள் எம்.பி.செந்தில் குமாரை தாக்க முயற்சித்தனர். பாமகவினரை தள்ளிவிட்டு திமுகவினர் எம்.பி. செந்தில் குமாரை அழைத்துச் செல்ல முயற்சித்தனர். இதனால் இரு தரப்புக்கும் இடையே அங்கு மோதல் உண்டாகும் சூழல் ஏற்பட்டது. எம்.பியின் பாதுகாப்பு கருதி அவரை காவல் துறையினர் அரசு சேவை மையத்துக்கு அழைத்துச் சென்றனர்.
அங்கு அவர் அமர்ந்திருந்த நிலையில் அங்கும் பாமக இளைஞர்கள், சென்றதோடு ஆபாச வார்த்தைகளால் திட்டினர். அடிக்கவும் சென்றனர். இதனால் அந்தப் பகுதியில் கடும் பரபரப்பு ஏற்பட்டது. இதனால் கூடுதல் காவல் துறையினர் அந்த இடத்திற்கு வரவழைக்கப்பட்டு பாதுகாப்பு பணிகளில் ஈடுபடுத்தப்பட்டனர்.

சுப்பிரமணியன் மனைவியை அவரது இல்லத்தில் நேரில் சந்தித்து ஒரு லட்சம் ரூபாய் நிதி உதவிக்கான காசோலையை வழங்க செந்தில் குமார் முயற்சித்தார். ஆனால், அவரை சந்திக்க பாமகவினர் விடாத நிலையில் அவருக்கான நிதி தன்னிடம்தான் இருப்பதாகவும் அதனை அவர் எப்போது வேண்டுமானாலும் பெற்றுக்கொள்ளலாம் என தெரிவித்துள்ளார். எம்.பி மீதான தாக்குதல் முயற்சிக்கு பல்வேறு தரப்பினரும் கண்டனம் தெரிவித்து வருகின்றனர்.

நன்றி சமயம்

எந்தன் முந்தைய "ஒத்த வார்த்தை" பதிவிற்கும் இதற்கும் சம்பந்தமில்லை.