ஆந்திர மர்ம நோய்க்கு: கிருமிநாசினி அதிகளவு பயன்படுத்தியது காரணமா?

எலுரு:
ஆந்திராவின் எலுரு நகரில் மர்ம நோய் காரணமாக இதுவரை
600-க்கும் மேற்பட்டோர் பாதிக்கப்பட்டுள்ளனர். கொரோனா
தடுப்பு பணி என்கிற பெயரில் அதிகளவு கொட்டப்பட்ட
குளோரின், பாதிப்புக்கு காரணமா என்ற கோணத்தில்
விசாரணை நடைபெறுகிறது.

எலுரு நகரில் கடந்த வாரம் ஒரு நோயாளி வாந்தி, மயக்கம்,
நடுக்கம் காரணமாக மருத்துவமனையில் அனுமதிக்கப்பட்டார்.
அவரது ரத்த மாதிரிகளை பரிசோதித்ததில் கொரோனா இல்லை
என்பது தெரிந்தது.

ஞாயிறன்று 200-க்கும் மேற்பட்டோர் மருத்துவமனையில்
அனுமதிக்கப்பட்டனர்.

அவர்களுக்கும் வாந்தி, தலைச்சுற்றல், தலைவலி அறிகுறி இருந்தது.
அதில் 45 வயது நபர் ஒருவர் உயிரிழந்தார். இதனை அடுத்து திடீர்
பாதிப்புக்கான காரணத்தை கண்டறிய மருத்துவ குழுக்கள் முடுக்கி
விடப்பட்டன. தற்போது 85% பேர் டிஸ்சார்ஜ் செய்யப்பட்டுள்ளனர்.

பாதிக்கப்பட்ட நோயாளிகளின் இரத்த மாதிரிகளில் காரீயம்
மற்றும் நிக்கலின் தடயங்களை மருத்துவர்கள் கண்டறிந்துள்ளனர்.
காரீயம் காரணமாக பிரச்னை ஏற்பட்டிருக்கலாம் என கூறுகின்றனர்.
பயன்படுத்தப்பட்ட பேட்டரிகளை கொட்டுவது அல்லது எரிப்பதன்
காரணமாக நோய் உண்டாகி இருக்குமா என அதிகாரிகள்
சோதிக்கின்றனர்.

அப்பகுதியின் குடிநீர் மற்றும் பால் மாதிரிகளை ஆய்வுக்கு உட்படுத்தி
உள்ளனர்.

நிலத்தடி நீர் மாசுபாடு, பூச்சிக்கொல்லிகளின் அதிகப்படியான பயன்பாடு
அல்லது கொரோனா தொற்று தடுப்புப் பணிக்காக பெருமளவில்
கொட்டப்பட்ட குளோரின் ஆகியவையும் காரணமாக இருக்குமா என்ற
கோணத்திலும் ஆய்வு நடைபெறுகிறது.

உலக சுகாதார நிறுவன வல்லுநர்கள் எலுரு மற்றும் அதைச் சுற்றியுள்ள
பகுதிகளை ஆய்வு செய்து, உணவு ஆதாரங்கள் உள்ளிட்ட பல
தகவல்களை சேகரித்து வருகின்றனர். விசாரணை முடிந்ததும் உரிய
நடவடிக்கை எடுக்கப்படும் என மாநில முதல்வர் ஜெகன் மோகன் ரெட்டி
கூறியுள்ளார்

தினமலர்