துரியனின் பக்கபலம் கர்ணன்!

திறமையுள்ளவர்களை நமக்கு பக்கபலமாக சேர்த்துக்
கொள்வது நமது வெற்றிக்கு வழிவகுக்கும்.
நமக்குத் தேவையான திறமை உள்ளவரை நம் திறமையுடன்
அணி சேர்க்கும் போது அது அதிக பலத்தை தரும்.
இதற்கு உதாரணமாக, மகாபாரதத்தில் ஒரு சம்பவம் உண்டு.

வில்வித்தையில் யார் கெட்டிக்காரன் என்பதை தீர்மானிக்க
போட்டி ஒன்று ஒவ்வொரு ஆண்டும் நடக்கும். இந்தப் போட்டியில்
கவுரவர்களும், பாண்டவர்களும் கலந்து கொள்வார்கள்.

ஒவ்வொரு முறையும் அர்ஜுனனுக்கே வெற்றி கிடைக்கும்.
ஒரு முறை இந்தப் பந்தயத்தில் கர்ணன் தானும் கலந்து
கொள்வதாக முன் வர, இந்தப் போட்டிக்கு நடுவராக இருக்கும்
பீஷ்மர், விதுரர், போன்ற பெரியவர்கள் கர்ணன் இந்த
போட்டியில் பங்குபெற ஆட்சேபம் தெரிவிக்கின்றனர்.

‘‘அரசாளும் உரிமை பெற்ற இளவரசர்கள், மன்னர்கள்
மட்டுமே இந்தப் போட்டியில் கலந்து கொள்ள முடியும்.
இது போட்டியின் விதி’’ என்று சொல்லி, கர்ணன்
தேரோட்டியின் மகன், அவனுக்கு தகுதி கிடையாது என்று
அவமானப்படுத்தி போட்டிக் களத்திலிருந்து வெளியே
அனுப்பினார்கள்.

கர்ணன் துரியோதனனுடைய நண்பன், சிறந்த வில்லாளி.
துரியோதனனுக்கு ஒவ்வொரு முறையும் பாண்டவருக்கே
இந்தப்போட்டியில் வெற்றி கிடைக்கிறதே என்ற ஆற்றாமை
இருந்தது.

அதனால், துரியோதனனுக்கு கர்ணனை எப்படியாவது
போட்டியில் கலந்து கொள்ள வைத்து பாண்டவரின்
வெற்றியை தட்டிப்பறிக்க வேண்டும் என்ற வேகம் பிறந்தது.

உடனே கர்ணனை தடுத்து நிறுத்தி அந்த பெரியோர்
சபையில் துரியோதனன், கர்ணனை தனக்கு சொந்தமான
அங்கத நாட்டுக்கு மன்னனாக அறிவிக்கிறான்.
கர்ணனுக்கு வியப்பு!

“நான் மன்னனா… துரியோதனனா என்ன இது விபரீதம்..?”
என்று சொல்ல துரியோதனன் நண்பனிடம் “உன் திறமை
மீது எனக்கு நம்பிக்கை உண்டு. நீ இப்போது முதல் அங்கத
நாட்டு மன்னன். தைரியமாகப் போட்டியில் கலந்து கொள்”
என்று சொல்ல, கர்ணன் போட்டியில் கலந்து கொண்டான்.

ஒரு தடாகத்திற்கு நேர் மேலே உச்சியில் ஒரு வட்டத்திற்குள்
சுற்றும் மீன் உருவத்தை, தண்ணீரில் தெரியும் பிம்பத்தை
பார்த்தே குறி வைத்து அடிக்க வேண்டும்.

கர்ணன் பரசுராமரிடம் வித்தை கற்றுக்கொண்டவன்.
புத்திசாலித்தனமாக போட்டியில் வில்லால் மேலே இருக்கும்
மீனை தண்ணீரில் தெரியும் பிம்பத்தை பார்த்து குறி
தவறாமல் அடித்து போட்டியில் ஜெயிக்க கர்ணனுக்கு
சிறந்த வில்லாளி என்ற பெருமை கிடைக்கிறது.

இதன் மூலம் துரியோதனனுக்கு தனக்கு பக்கபலமாக
அர்ஜுனனுக்கு இணையான ஒரு வில்லாளியை தன்
அணியில் சேர்த்து பலம் பொருந்தியவனாகிறான்.

இந்த சம்பவத்தில் துரியோதனன் கர்ணனை அங்கத நாட்டு
மன்னராக்கியதால் கர்ணனின் அன்புக்கும் நன்றிக்கும்
உரியவனாகிறான். தனது வெற்றியின் மூலம் துரியோதனனுக்கு
பெருமை சேர்க்கிறான்.

நம் அன்றாட வாழ்விலும் எவ்வளவோ விஷயங்களுக்கு
பக்க பலம் தேவைப்படுகிறது. அதை உரிய வழியில் பயன்
படுத்தினால் நமக்கு வெற்றி கிடைக்கும். அரசியலில் கூட
தேர்தல் சமயத்தில் கூட்டணி சேர்த்து வெற்றி பெற நினைப்பது
இந்த அடிப்படையில்தான்.
எனவே, இதை மனதில் கொண்டு செயல்படுங்கள்.
வெற்றி நிச்சயம்.
-
– ஹெச். வசந்தகுமார்
திண்ணை-வாரமலர்