மலையாளப் படம் ‘மை ஸ்டோரி’

-

ஓர் அழகான காதல் கவிதையைப் போல மனதை
நெகிழச் செய்யும் மலையாளப் படம் ‘மை ஸ்டோரி’.
அமேசான் ப்ரைமில் காணக்கிடைக்கிறது.

காதலியின் நினைவுகளில் மாட்டிக்கொண்ட ஒரு
நடிகன் சொல்லும் கதையே இந்தப் படம். பெரிய
நடிகனாக வேண்டும் என்ற கனவில் சுற்றிக்
கொண்டிருக்கும் இளைஞன் ஜெய்.

நண்பன் ஒருவனுடைய உதவியால் ஜெய்யின் கனவு
நனவாகிறது.

ஆம்; ஒரு படத்தில் ஹீரோவாக அறிமுகமாகிறார்
ஜெய். ஹீரோயின் பிரபல நடிகை தாரா. ஷூட்டிங்
போர்ச்சுக்கல்லில் உள்ள லிஸ்பன் நகரில்.

டேவிட் என்ற தொழிலதிபரைத் திருமணம் செய்யப்
போகிறார் தாரா. ஜெய்யும் தாராவும் ஜோடியாக
நடிக்கும் படத்தின் தயாரிப்பாளர்தான் டேவிட்.

தாராவுக்கு டேவிட் மீது கொஞ்சம் கூட காதல் இல்லை.
தந்தையின் வற்புறுத்தலால் திருமணத்துக்கு சம்மதம்
தெரிவித்திருக்கிறாள். நிச்சயம் கூட ஆகிவிட்டது.

ஷூட்டிங்கின் போது ஜெய்யுக்கும் தாராவுக்கும்
இடையில் காதல் மலர்கிறது. தாராவிடமிருந்து விலகிச்
செல்லுமாறு ஜெய்யை மிரட்டுகிறார் டேவிட்.
நடிப்புதான் முக்கியம் என்று ஜெய்யும் விலகி இருக்க
முயல்கிறார். ஆனால், தாரா ஜெய்யுடன் எங்கேயாவது
போய்விடலாம் என்று திட்டமிடுகிறாள்.

டேவிட்டின் அதிகாரப்போக்கும் நடவடிக்கைகளும்
அவளுக்குப் பிடிக்கவில்லை.

டேவிட் இல்லாத நேரமாகப் பார்த்து, திட்டமிட்டபடி
இருவரும் ரகசியமாக கிளம்பிச் செல்கிறார்கள். ஆனால்,
டேவிட்டிடம் வசமாக மாட்டிக் கொள்கிறார்கள்.
ஜெய்யைத் துரத்தியடித்து வலுக்கட்டாயமாக தாராவை
அழைத்துச்சென்று திருமணம் செய்துகொள்கிறான் டேவிட்.

அதற்குப் பின் தாராவை ஜெய் பார்க்கவே இல்லை.

லிஸ்பனைவிட்டு இந்தியாவுக்குத் திரும்பி பெரிய
நடிகனாகி விடுகிறார். 20 வருடங்கள் ஓடுகிறது. உலகம்
போற்றும் சூப்பர் ஸ்டாராக இருக்கிறார் ஜெய். அவர்
திருமணம் செய்துகொள்ளவில்லை. எல்லாமே இருந்தாலும்
தாரா பக்கத்தில் இல்லாத வெறுமை அவரை வாட்டுகிறது.

இருவரும் ஊரைவிட்டு போகும்போது எந்த இடத்திற்குப்
போகிறோம் என்ற தகவலை டேவிட்டுக்குச் சொன்னதே
ஜெய்தான். அதனால்தான் இருவரும் பிரிய
வேண்டியதாயிற்று. தாராவுக்குத் துரோகம் செய்து
விட்டதாக குற்றவுணர்வில் 20 வருடங்களாக தவித்த ஜெய்,
லிஸ்பனுக்குப் போகிறார். தாராவைச் சந்தித்து நடந்த
விஷயத்தைச் சொல்லி மன்னிப்புக் கேட்க வேண்டும் என்பது
அவரது திட்டம்.

ஆனால், லிஸ்பனில் அச்சு அசலாக தாராவைப் போலவே
உள்ள அவளது மகள் ஹீமாவைச் சந்திக்கிறார். தாராவுடன்
சுற்றித்திரிந்த இடங்களுக்கு ஹீமாவுடன் செல்கிறார்.
இறுதியில் தாராவைச் சந்திக்கிறார். அந்தச் சந்திப்பில்
ஜெய்யுக்குத் தெரியாத ஓர் உண்மை வெளிப்படுகிறது.
அந்த அதிர்ச்சியான உண்மைதான் கிளைமேக்ஸ்.

ஜெய்யாக பிருத்விராஜும்; தாரா, ஹீமா என இரு வேடங்களில்
பார்வதியும் நடிப்பில் தூள் கிளப்பியிருக்கிறார்கள்.
படத்தின் இயக்குநர் ராஸ்னி தினகர்.

குங்குமம்