வரைவு வாக்காளர் பட்டியல் இன்று வெளியீடு

சென்னை:
தமிழக சட்டசபை பொதுத் தேர்தல் விரைவில் நடக்க உள்ள நிலையில், வாக்காளர் பட்டியல் திருத்தப் பணி, இன்று துவங்குகிறது. அனைத்து மாவட்டங்களிலும், இன்று (நவ., 16) காலை, வரைவு வாக்காளர் பட்டியல், வெளியிடப்பட உள்ளது.

தமிழக சட்டசபை பொதுத் தேர்தல், அடுத்த ஆண்டு ஏப்ரல் அல்லது மே மாதம் நடக்க உள்ளது. தேர்தலுக்கான ஆயத்தப் பணிகளை, அனைத்து கட்சிகளும் துவக்கி உள்ளன.மாவட்ட தேர்தல்அதேபோல், தேர்தல் கமிஷனும், தேர்தலுக்கான ஆயத்தப் பணிகளை துவக்கி உள்ளது.

அனைத்து மாவட்டங்களிலும், மாவட்ட கலெக்டர்களும், சென்னையில் மாநகராட்சி கமிஷனரும், மாவட்ட தேர்தல் அலுவலர்களாக நியமிக்கப்பட்டுள்ளனர்.

தேர்தல் முறையாக நடக்க, தவறில்லாத வாக்காளர் பட்டியல் அவசியம். அதை தயார் செய்வதற்காக, வாக்காளர் பட்டியல் திருத்தப் பணி, இன்று துவங்க உள்ளது.அதற்காக, இன்று அனைத்து மாவட்டங்களிலும், காலை, 10:30 மணிக்கு, சட்டசபை தொகுதி வாரியாக, வரைவு வாக்காளர் பட்டியலை, மாவட்ட தேர்தல் அலுவலர்கள் வெளியிட உள்ளனர்.

இன்று முதல், டிச., 15 வரை, வாக்காளர் பட்டியலில், பெயர் சேர்க்க, நீக்க, திருத்தம் செய்ய, முகவரி மாற்ற விண்ணப்பிக்கலாம்.பொதுமக்கள் வசதிக்காக, இம்மாதம், 21, 22ம் தேதிகளிலும், டிச., 12, 13ம் தேதிகளிலும், அனைத்து ஓட்டுச்சாவடிகளிலும், வாக்காளர் சிறப்பு முகாம் நடத்தப்பட உள்ளது.

பொதுமக்கள் அளிக்கும் விண்ணப்பங்கள் மீது, ஜன., 5க்குள் நடவடிக்கை எடுக்கப்படும். அடுத்த ஆண்டு, ஜன., 20ல், இறுதி வாக்காளர் பட்டியல் வெளியிடப்படும்.இணையதளம்வாக்காளர் பட்டியல் திருத்தத்திற்கு விண்ணப்பிப்போர், முகவரி சான்றாக, பாஸ்போர்ட், ஓட்டுனர் உரிமம், ரேஷன் கார்டு, குடிநீர், தொலைபேசி, மின் கட்டணம், காஸ் இணைப்பு பில்கள், வங்கி, கிசான், தபால் அலுவலக கணக்கு புத்தகங்களை சமர்பிக்கலாம்.

வயது சான்றுக்கு, பள்ளி சான்றிதழ் அளிக்கலாம்.ஆன்லைன் வழியே விண்ணப்பிக்க விரும்புவோர், 'www.nvsp.in' என்ற இணையதளம், 'VOTER HELP LINE' என்ற மொபைல் ஆப் வழியாக விண்ணப்பிக்கலாம்.

வரும், 2021 ஜன., 1ல், 18 வயது பூர்த்தியாவோர், வாக்காளர் பட்டியலில் பெயர் சேர்க்க விண்ணப்பிக்கலாம். வாக்காளர் பட்டியலில், பெயர் இருந்து, வாக்காளர் அடையாள அட்டையை தொலைத்திருந்தாலோ, தவறு இருந்தாலோ, 001 விண்ணப்பப் படிவத்தில் விண்ணப்பிக்கலாம்.

வெளிநாடுகளில் வசிக்கும் இந்திய குடிமகன்கள், வாக்காளர் பட்டியலில் பெயர் சேர்க்க விரும்பினால், 6 ஏ என்ற விண்ணப்பப் படிவத்தை பூர்த்தி செய்து, பாஸ்போர்ட் நகல் இணைத்து, மாவட்ட தேர்தல் அலுவலருக்கு தபாலில் அனுப்ப வேண்டும்.

யாரிடமாவது கொடுத்து அனுப்பலாம். மாவட்ட தேர்தல் அலுவலர்கள், அந்த விண்ணப்பங்களை பரிசீலிப்பர்.வாக்காளர் பட்டியலில் பெயர் சேர்க்க, நீக்க, திருத்தம் செய்ய, முகவரி மாற்றம் செய்ய, பணி நாட்களில், ஓட்டுச்சாவடி அலுவலர், தேர்தல் அலுவலர், உதவி தேர்தல் அலுவலர் அலுவலகங்களில், விண்ணப்பங்கள் அளிக்கலாம் என, தமிழக தலைமை தேர்தல் அதிகாரி சத்யபிரதா சாஹு தெரிவித்துள்ளார்.

- நமது நிருபர் --தினமலர்