கப்பல் துறை அமைச்சகத்தின் பெயரை மாற்றினார் பிரதமர்

குஜராத்தில், முதல்வர் விஜய் ரூபானி தலைமையிலான,
பா.ஜ., ஆட்சி நடக்கிறது. இங்குள்ள, சூரத் மாவட்டம்,
ஹசீரா துறைமுக நகரிலிருந்து, பாவ்நகர் மாவட்டம்,
கோகா நகருக்கு, பயணியர் படகு போக்குவரத்து நேற்று
துவக்கப்பட்டது.

'வீடியோ கான்பரன்சிங்' வழியாக இந்த போக்குவரத்தை
துவக்கி வைத்து,பிரதமர் மோடி பேசியதாவது:

கடந்த ஆறு ஆண்டுகளாக, நீர்வழி போக்குவரத்தை மேம்படுத்த,
பல நடவடிக்கைகள் எடுக்கப்பட்டுள்ளன.

நான் பிரதமரவாதவதற்கு முன்பே, நாட்டில், ஆறுகளும் கடல்களும்
இருந்து வருகின்றன. ஆனால், நீர்வழி போக்குவரத்தை மேம்படுத்தும்
தொலை நோக்கு திட்டம், முந்தைய அரசுகளிடம் இல்லை.

நீர்வழி போக்குவரத்தின் வாயிலாக, பொருட்களை கொண்டு
செல்வதற்கான செலவை வெகுவாக குறைக்க முடியும். கப்பல்
போக்குவரத்து அமைச்சகம் விரிவுபடுத்தப்பட்டு உள்ளது.
கப்பல் போக்குவரத்து அமைச்சகத்தின் பெயர் இனி,
'துறைமுகங்கள், கப்பல் மற்றும் நீர்வழி போக்குவரத்து அமைச்சகம்' என,
மாற்றம் செய்யப்படுகிறது.

நீர் வழி போக்குவரத்தால், பயணத்தின் துாரமும், நேரமும் மிச்சமாகும்,
செலவும் குறையும். மற்ற நாடுகளுடன் ஒப்பிடும் போது, இந்தியாவில்
நீர்வழி போக்குவரத்து செலவு, மிகவும் குறைவாக உள்ளது.

சாலை, ரயில், விமானம், கடல் வழி போக்குவரத்துகளை இணைக்கவும்
நடவடிக்கை எடுக்கப்பட்டுள்ளது. நீர் வழி போக்குவரத்தில், 21 ஆயிரம் கி.மீ.,
சேர்க்க, நடவடிக்கை எடுக்கப்பட்டுள்ளது. இதற்காக, 'சாகர் மாலா'
திட்டத்தின் கீழ், துறைமுகங்கள் மேம்படுத்தப்பட்டு வருகின்றன.
இவ்வாறு, பிரதமர் பேசினார்.

'கறுப்பு பணம் குறைந்தது'

பணமதிப்பிழப்பு நடவடிக்கை மேற்கொண்ட நான்காம் ஆண்டு நிறைவை
முன்னிட்டு, 'டுவிட்டரில்' பிரதமர் மோடி வெளியிட்ட பதிவில் கூறியிருப்பதாவது;

நான்கு ஆண்டுக்கு முன் இதே நாளில், பணமதிப்பிழப்பு நடவடிக்கை
அறிவிக்கப்பட்டது. இதனால், கறுப்பு பணம் குறைந்தது. வரி செலுத்துவோர்
எண்ணிக்கை அதிகரித்துள்ளது.

பண பரிவர்த்தனை நடவடிக்கையில், வெளிப்படையான நிலை ஏற்பட்டுளளது;
இது, நாட்டின் வளர்சிக்கு வித்திட்டுள்ளது.இவ்வாறு பிரதமர் கூறியுள்ளார்.

தினமலர்