அ.தி.மு.க. கூட்டணியில் பிளவு?

சென்னை (ஏஜென்சி), வியாழக்கிழமை, 2 ஏப்ரல் 2009 ( 18:49 IST )

தொகுதி ஒதுக்கீடு விஷயத்தில் அ.தி.மு.க. தலைமை நடந்து கொண்ட முறையால் அதிருப்தியில் உள்ள ம.தி.மு.க. பொதுச் செய்லாளர் வைகோ, பா.ஜனதாவுடன் இணைந்து போட்டியிட முடிவு செய்திருபதாகக் கூறப்படுகிறது.

இது தொடர்பாக விவாதித்து முடிவு எடுப்பதற்காக ம.தி.மு.க. மாவட்டச் செயலாளர்களின் அவசரக் கூட்டத்தையும் வைகோ கூட்டியுள்ளார்.

அ.தி.மு.க. கூட்டணியில் ம.தி.மு.க., மார்க்சிஸ்ட் கம்யூனிஸ்டு கட்சிகளுக்கு தொகுதி ஒதுக்கீடு செய்வதில்,கடந்த சில தினங்களாக இழுபறி நிலை நீடித்து வருகிறது.

தொடக்கத்தில் ம.தி.மு.க.விற்கு 3 இடங்களை மட்டுமே வழங்க அ.தி.மு.க. முன் வந்ததால் வைகோ கடும் அதிர்ச்சி அடைந்தார். பின்னர் தொகுதி எண்ணிக்கையில் ஜெயலலிதா சற்று இறங்கி வந்தார்.வைகோ கேட்டபடி 5 இடங்களை அளிக்க அவர் ஒப்புக்கொண்டதாகக் கூறப்படுகிறது.

எனினும் எந்தெந்த இடங்களை ஒதுக்குவது என்பதில் மீண்டும் சிக்கல் தொடங்கியது.திருப்பூர், விருதுநகர் ஆகிய 2 தொகுதிகளைப் பெறுவதில் ம.தி.மு.க., மார்க்சிஸ்ட் கட்சிகள் பிடிவாதமாக இருந்ததால் தொகுதி உடன்பாடு எட்டுவதில் தேக்கநிலை உண்டானது.

இந்நிலையில், ஜெயலலிதாவின் உத்தரவிற்கிணங்க மூத்த தலைவர்கள் ஓ.பன்னீர் செல்வம், டி.ஜெயக்குமார் ஆகியோர் வைகோவை சமாதானம் செய்து வைக்கும் முயற்சிகளில் ஈடுபட்டனர். எனினும் இதற்கு எவ்வித பலனும் கிட்டவில்லை.

ம.தி.மு.க. விரும்பாத இரண்டு தொகுதிகளை அ.தி.மு.க. தலைமை திணிக்க விரும்பியதே இதற்கு காரணம் என்று கூறப்படுகிறது.

இந்நிலையில், தொகுதி பங்கீடு விஷயத்தில் அவமானப்படுத்தும் வகையில் அ.தி.மு.க. தலைமை நடந்து கொண்டவிதத்திற்கு எதிர்ப்பு தெரிவித்து அந்தக் கூட்டணியில் இருந்து விலக வைகோ முடிவு செய்துள்ளதாக, அக்கட்சி வட்டாரங்கள் தெரிவிக்கின்றன.

பா.ஜனதாக் கட்சியுடன் கூட்டணி அமைத்து மக்களவைத் தேர்தலை சந்திக்க வைகோ ஆயத்தமாகி வருவதாகவும், இதற்காக அக்கட்சியின் மூத்த தலைவர்களை அவர் தொடர்பு கொண்டு வருவதாகவும், அந்த வட்டாரங்கள் மேலும் கூறுகின்றன.

அனேகமாக பா.ஜனதா கூட்டணியில் ம.தி.மு.க.விற்கு 15 இடங்கள் ஒதுக்கப்படலாம் என்று தெரிகிறது.

கூட்டணி தொடர்பான முடிவை எடுப்பதற்கு வசதியாக, நாளை ம.தி.மு.க. மாவட்ட செயலாளர்களின் அவசரக் கூட்டத்திற்கு வைகோ அழைப்பு விடுத்துள்ளார்.

இந்த கூட்டத்தில் கூட்டணி குறித்து ஆலோசனை நடத்தப்பட்டு, அதன் முடிவில் அ.தி.மு.க. கூட்டணியில் இருந்து வெளியேறும் முடிவை வைகோ அறிவிக்கலாம் எனக் கூறப்படுகிறது.

அ.தி.மு.க. கூட்டணியில் இருந்து ம.தி.மு.க. விலகுவதாக வெளியாகியுள்ள தகவல் தமிழக அரசியலில் பெரும் பரபரப்பை ஏற்படுத்தியுள்ளது.

அதே சமயம் வைகோவை கூட்டணியில் தக்கவைக்கும் விதமாக திருப்பூரை மதிமுகவுக்கு விட்டுதர மார்க்சிஸ்ட் கம்யூனிஸ்ட் சம்மதித்துவிட்டதாகவும் தகவல்கள் வெளியாகி உள்ளன.





(மூலம் - வெப்துனியா)