அனைத்து அழுத்தங்கள், தடைகளையும் எதிர்த்து நிற்க வேண்டும்: நீதிபதி ரமணா பேச்சு!

புது டில்லி:
உச்ச நீதிமன்ற நீதிபதி என்.வி.ரமணா மீது ஆந்திர முதல்வர்
புகார் கூறியிருந்த நிலையில், நிகழ்ச்சி ஒன்றில் பேசிய அவர்,
நீதிபதிகள் அனைத்து அழுத்தங்கள், முரண்பாடுகளுக்கும்
எதிராக தைரியமாக நிற்க வேண்டும் என்றார்.

முன்னெப்போதும் இல்லாத வகையில் ஆந்திர முதல்வர்
ஜெகன் மோகன் ரெட்டி உச்சநீதிமன்ற நீதிபதிக்கு எதிராக
தலைமை நீதிபதிக்கு புகார் கடிதம் அனுப்பியிருந்தார்.

ஜனநாயக ரீதியாக தேர்ந்தெடுக்கப்பட்ட அரசை கவிழ்க்க
பார்ப்பதாகவும், ஸ்திரத்தன்மையை குலைக்க முயற்சிப்பதாகவும்
நீதிபதி ரமணா மீது கடிதத்தில் குற்றஞ்சாட்டியிருந்தார்.

முன்னாள் முதல்வர் சந்திரபாபு நாயுடுவுக்கு ஆதரவாக ஆந்திர
உயர்நீதிமன்ற நீதிபதிகளிடம் அதிகாரம் செலுத்துவதாக
பகீர் குற்றச்சாட்டு கூறியிருந்தார்.

ஜெகனின் கடிதத்திற்கு இந்திய பார் கவுன்சில், சுப்ரீம் கோர்ட்
வழக்கறிஞர்கள் சங்கம் உள்ளிட்ட பல அமைப்புகள் கண்டனம்
தெரிவித்திருந்தன.

இந்த நிலையில் மறைந்த உச்சநீதிமன்ற முன்னாள் நீதிபதி
லட்சுமணனின் இரங்கல் கூட்டத்தில் நீதிபதி ரமணா பங்கேற்றார்.
அதில் அவர் பேசியதாவது:

நீதித்துறையின் மிகப்பெரிய பலம் அதிலுள்ளவர்கள் மீதான
நம்பிக்கை தான். நம்பிக்கை, பற்று, ஏற்புடைமை ஆகியவற்றை
சம்பாதிக்க தான் முடியும். அதிகாரம் மூலம் பெற முடியாது.

நல்ல வாழ்க்கை வாழ்வதற்கு பணிவு, பொறுமை, இரக்கம் போன்ற
எண்ணற்ற பண்புகள் தேவை. குறிப்பாக ஒரு நீதிபதி கொள்கைகளை
கடைப்பிடிப்பதில் உறுதியுடன் இருக்க வேண்டும்.

அனைத்து அழுத்தங்களையும், முரண்பாடுகளையும் தாங்கி
தடைகளுக்கு எதிராக நிற்க வேண்டும். அதுவே அவர்களுக்கு
முக்கிய பண்பு.

மறைந்த நீதிபதி லட்சுமணனின் வார்த்தைகளிலிருந்து நாம்
உத்வேகம் பெற வேண்டும். தற்போதைய காலங்களில் தேவைப்படும்
ஒரு துடிப்பான, சுதந்திரமான நீதித்துறைக்கு அது தேவை.
மதிப்புகள் தான் நமது மிகப்பெரிய சொத்து. அதை நாம் ஒருபோதும்
மறந்துவிடக் கூடாது. ஒரு நல்ல மனிதராகவும் நீதிபதியாகவும்
அவரிடமிருந்து நிறைய கண்டு கொண்டுள்ளேன். இவ்வாறு பேசினார்.

தினமலர்