மலேசியா: நீரிழிவு நோயாளிகளின் எண்ணிக்கை கவலையளிக்கிறது

நாட்டில் 30 வயதைத் தாண்டியவரிடையே, 1996-க்கும் 2006-க்குமிடைப்பட்ட பத்தாண்டுக் காலத்தில் நீரிழிவு நோயாளிகளின் எண்ணிக்கை 80 விழுக்காடு உயர்ந்துள்ளது.

இதனைத் தெரிவித்த சுகாதாரத்துறை தலைமை இயக்குனர் டாக்டர் இஸ்மாயில் மரைக்கான், இதில் கவலையூட்டுவது என்னவென்றால் இவர்களில் 36 விழுக்காட்டினர், தங்களுக்கு இந்நோய் இருப்பதையே அறியாதிருப்பதுதான் என்றார். அவர்கள் அந்நோய் இருப்பதை அறியாதிருப்பதால், பின்னர் அது பற்றி அறியவரும்போது வழக்கத்தைவிடவும் தீவிர சிகிச்சை அவர்களுக்குத் தேவைப்படுகின்றது. இதனால், ஏற்கனவே இடர்ப்பட்டுக் கொண்டிருக்கும் சுகாதாரச் சேவைகளுக்கு சுமை மேலும் கூடுகிறது.

நாட்டில் நீரிழிவு நோயாளிகளின் எண்ணிக்கை உயர்ந்திருப்பதற்கு பழக்கவழக்கங்கள்தான் காரணமாகும் என்று மலேசிய மருத்துவச் சங்கத்தின் செய்திமடலில் அவர் கூறியுள்ளார்.

உடல் எடையைக் குறைத்தல், உணவுப்பழக்கத்தில் மாறுதல் செய்தல், உடலுக்குக் கூடுதலாக வேலைகொடுத்தல் முதலியவற்றைக் கைக்கொண்டு இந்நோயைக் கட்டுப்படுத்த முடியும் என்றாரவர்

உடல்பருமனும் மலேசியாவில் ஒரு பிரச்னையாக உருவாகி வருகிறது என்றவர் சொன்னார். 1996-இலிருந்து ஒரு பத்தாண்டுக் காலத்தில் உடல்பருமனாக உள்ளவர் எண்ணிக்கையும் 200 விழுக்காடு உயர்ந்திருப்பதை ஆய்வு ஒன்று காட்டுகிறது.

“நீரிழிவு நோய்க்கு உடல்பருமன் அடிப்படையாக இருப்பதால் அதுவும் கவலைதருகிறது”, என்றாரவர்.

நோயாளிகளிடையே இனிப்புநீரைக் கட்டுப்படுத்தும் முயற்சிகளை மேம்படுத்தும் நடவடிக்கைகளைச் சுகாதார அமைச்சு முன்னெடுத்திருப்பதாக அவர் கூறினார். இரத்த க்ளுகோஸ் அளவைச் சோதித்தல், தொடர்ச்சியான கண்காணிக்கு உதவும் நீரிழிவு அடையாள அட்டையைப் பயன்படுத்தல் ஆகியவை அவற்றில் அடங்கும்.

கடந்த ஆண்டு, மருத்துவ மனைகளில் நீரிழிவு மற்றும் இரத்த அழுத்தம் ஆகியவற்றைக் கட்டுப்படுத்துவதற்கு அரசாங்கம் ரிம7 மில்லியன் ஒதுக்கியதாகக் குறிப்பிட்ட இஸ்மாயில் அப்பணம் புதிய மருந்துகள் வாங்கவும் சோதனைக் கருவிகள் வாங்கவும் பயன்படும் என்றார்