பிரான்சில் அடுத்த இருவாரங்களில் ஐசியு படுக்கை நோயாளிகளின் எண்ணிக்கை உயர வாய்ப்பு

கொரோனா வைரசின் தாக்கம் உலகின் பல நாடுகளையும்
அச்சுறுத்தி வருகிறது. கொரோனா பாதிப்புகளை கட்டுப்படுத்த
ஒவ்வொரு நாட்டு அரசும் ஏராளமான முயற்சிகளை
மேற்கொள்கின்றன.

பிரான்சிலும் கொரோனா தீவிரமாகி வருவதால், நோய் தொற்று
பரவுதலை குறைக்க சுகாதார நடவடிக்கைகளை துரிதப்படுத்தி
வருவதாக அந்நாட்டு சுகாதாரதுறை தெரிவிக்கிறது. இந்நிலையில்,
பிரான்சில் அடுத்த இரண்டு வாரங்களில் கொரோனா தொற்றுக்கு
பாதிக்கப்படுவோரின் விகிதம் தீவிரமாக அதிகரித்து, தீவிர சிகிச்சை
பிரிவு (ICU) உள்ள நோயாளிகள் எண்ணிக்கை அதிகரிக்கலாம்.

எனவே அனைவரும் கவனமாக இருக்க வேண்டும் என அந்நாட்டு
சுகாதாரதுறை அமைச்சர் ஆலிவர் வேரன் அறிவுறுத்தியிருந்தார்.

இது தொடர்பாக அவர் மேலும் கூறுகையில், பிரான்சில் கொரோனா
பாதிப்புகளை அரசு சிறந்த முறையில் கையாள்கிறது. பாதிப்புகளை
குறைக்க அனைத்து நடவடிக்கையையும் விரைந்து செயல்படுத்துகிறது.

பிரான்சில் கடந்த 24 மணிநேரத்தில் கொரோனாவால் 8,975 பேர்
பாதிக்கப்பட்டனர். இந்த வாரம், ஒவ்வொரு நாளும் சராசரியாக
55 நோயாளிகள் தீவிர சிகிச்சைப் பிரிவுகளில் (ஐ.சி.யூ) மருத்துவ
மனையில் சேர்க்கப்பட்டுள்ளனர். பிரான்சில் 1 மாதத்திற்கு
சராசரியாக 1,500 முதல் 2,000 பேர் ஐ.சி.யூ பிரிவில்
சேர்க்கப்படுகின்றனர்.

அடுத்த இரு வாரங்களில் கொரோனா பாதிப்பு எண்ணிக்கை இன்னும்
அதிகரிக்கலாம். தீவிர சிகிச்சைப் பிரிவில் நிறைய நபர்கள்
அனுமதிக்கப்படலாம். பிரான்ஸில் ஊரடங்கு தளர்வால் நோய் தொற்று
எண்ணிக்கை அதிகரித்து வருகிறது.

பிரான்ஸ் மக்கள் எச்சரிக்கையாக இருக்க வேண்டும். பிரான்ஸ் கொரோனா
தொற்றுக்கு எதிராகப் போராட வேண்டும். மருத்துவப் பரிசோதனைகளை
அதிகரிக்க வேண்டும். ஆனால், கொரோனா பொது முடக்கத்தால் பல
நாடுகள் பொருளாதாரச் சீரழிவையும், பாதிப்பையும் தாங்க முடியாமல்
கட்டுப்பாடுகளைத் தளர்த்தி, முன்னெச்சரிக்கை நடவடிக்கையுடன் இயல்பு
வாழ்க்கைக்கு அனுமதித்து வருகின்றன.
இவ்வாறு கூறினார்.

தினமலர்