எங்களுடைய கப்பலில் நிறைய ஓட்டைகள் உள்ளன: தோனி கருத்து!

-
கடைசியாக நடைபெற்ற இரண்டு போட்டிகளிலும்,
பேட்ஸ்மேன்களில் சொதப்பலால் சென்னை அணி வெற்றி
வாய்ப்பை இழந்தது.

கொல்கத்தா நைட் ரைடர்ஸ் அணிக்கு எதிரான போட்டியில்
168 ரன்களை துரத்திச் சென்றபோது கடைசி நேரத்
தடுமாற்றங்களால் 10 ரன்கள் வித்தியாசத்தில் தோல்வியைத்
தழுவியது.

தற்போது, ராயல் சேலஞ்சர்ஸ் பெங்களூர் அணிக்கு எதிரான
போட்டியில் 170 ரன்களை சேஸ் செய்ய முற்பட்டு 132 ரன்களுக்கு
சுருண்டு அதிர்ச்சியளித்தது.

பெங்களூர் அணி 93/4 என திணறிக் கொண்டிருந்த போது,
விராட் கோலி, ஷிவம் துபே இருவரும் பார்ட்னர்ஷிப் அமைத்து
5.3 ஓவர்களில் 67 ரன்களை குவித்தனர்.

விராட் கோலி 90 ரன்கள் எடுத்து அணியின் ஸ்கோரை உயர்த்தினார்.
ஆனால், சென்னை அணியில் இதுபோன்று ஒருவர் கூட
சோபிக்கவில்லை.

இதுகுறித்து பேசிய கேப்டன் மகேந்திரசிங் தோனி,
“பேட்டிங் வரிசையில் போதிய பலமின்மைதான் தோல்விக்கு
காரணம்” எனக் குறிப்பிட்டார். “நாங்கள் தொடக்கத்தில் சிறப்பாகப்
பந்துவீசி பேட்ஸ்மேன்களுக்கு நெருக்கடியை உண்டாக்கினோம்.
ஆனால், கடைசி நான்கு ஓவர்களில் பௌலர்கள் சில தடுமாற்றங்களைச்
சந்தித்தனர். இதனைச் சாதகமாகப் பயன்படுத்தி பெங்களூர் அணி
ரன் வேட்டையில் ஈடுபட்டது.

பேட்டிங்கை பொறுத்தவரை, நாங்கள் இன்னும் சிறப்பாகச்
செயல்பட வேண்டிய கட்டாயத்தில் இருக்கிறோம். எங்கள் கப்பலில்
நிறைய ஓட்டைகள் உள்ளன. அதை சரிசெய்து, அடுத்த 7 போட்டிகளில்
அதிரடியாக விளையாடுவோம் என நம்பிக்கையுள்ளது” எனத் தெரிவித்தார்.

“பேட்டிங்கில் போதிய பலமின்மை தோல்விக்கு முக்கிய காரணமாக
பார்க்கிறேன்.

ஒவ்வொரு வீரர்களும் பொறுப்பை உணர்ந்து செயல்பட வேண்டும்.
எதிரணியில், 6 முதல 14 ஓவர்கள் வரை யார் பந்து வீசப் போகிறார்கள்
என்ற திட்டத்தைச் சரியாக வகுக்காமல் நாங்கள் பேட்டிங் செய்தோம்”
எனக் கூறினார். 2010ஆம் ஆண்டில் சென்னை அணி முதல் 7 போட்டிகளில்
இரண்டில் மட்டுமே வெற்றிபெற்றது.
இருப்பினும், அடுத்த 5 போட்டிகளில் நான்கில் வெற்றிபெற்று இறுதியில்
கோப்பை வென்று அசத்தியது.

அந்த அதிசயம் மீண்டும் ஒருமுறை நடப்பது கடினம் என்றாலும்,
எதிர்வரும் போட்டிகளில் சிறப்பாகச் செயல்படுவோம் என தோனி நம்பிக்கை
தெரிவித்துள்ளார். “தோல்விகளைத் திரும்பி பார்க்காதீர்கள் என வீரர்களிடம்
நான் அடிக்கடி கூறுவேன். கடந்த போட்டியில் தோல்வியடைந்ததை நினைத்துப்
பார்த்தால், எதிர்வரும் போட்டியில் நிச்சயம் தடுமாற்றங்கள் ஏற்படும்.

ஆகையால், நடந்ததை அப்படியே விட்டுவிட்டு, கடைசி 7 போட்டிகளில்
நாங்கள் சிறப்பாகச் செயல்படுவோம். முதலில் 5 பௌலர்களுடன்
களமிறங்கினோம். தற்போது 6 பேர் வரை பந்து வீசி வருகின்றனர்.
பேட்டிங்கில்தான் நாங்கள் அதிகம் சொதப்புகிறோம்” எனக் கூறினார்.

தமிழ் சமயம்