மருந்து மூலப்பொருட்களுக்கு சீனாவை மட்டுமே நம்பியுள்ளோம் - உயர்நீதிமன்றம் வேதனை

புற்றுநோய்க்கு மருந்து தயாரிக்க உதவ மத்திய அரசுக்கு
உத்தரவிடக் கோரி வின்கெம் என்ற ஆய்வகம் சார்பில்
சென்னை உயர் நீதிமன்றத்தில் வழக்கு தொடரப்பட்டது.

அந்த மனுவில், புதிய மருந்துகள் கண்டுபிடிக்க அரசு
முறையாக ஒத்துழைப்பு அளிப்பது இல்லை என புகார்
தெரிவிக்கப்பட்டிருந்தது. இந்த வழக்கை விசாரித்த
நீதிபதி கிருபாகரன், மனுதாரர் நிறுவனத்துக்கு நிதி
உள்ளிட்ட உதவிகளை வழங்குவது குறித்து முடிவெடுக்க
மத்திய அரசின் நிதித்துறை மற்றும் மருந்து துறையின்
இணை செயலாளர்கள் தலைமையில் குழு அமைக்க
உத்தரவிட்டார்.

மேலும் நீதிபதி தனது உத்தரவில், மருத்துவ துறை
ஆய்வுகளுக்கும், ஆய்வாளர்களுக்கும், உரிய முதலீடும்,
ஊக்கமும் அளிப்பதில்லை என்பதால், பல நிபுணர்கள்
வெளிநாடு சென்று விடுவதாக குறிப்பிட்டுள்ளார்.

ஆராய்ச்சிகளுக்கு அரசின் ஆதரவு இல்லாததால் திறமை
வாய்ந்த பலரை நாம் ஏற்கனவே இழந்து விட்டதாக
வேதனை தெரிவித்த நீதிபதி, ஆராய்ச்சிகளுக்கு
ஆதரவளித்து மனுதாரர் போல நாட்டில் உள்ள
ஆராய்ச்சியாளர்களை தக்க வைத்துக் கொள்ள வேண்டும்
எனவும் அறிவுறுத்தியுள்ளார்.

உலக அளவில் மருந்து தயாரிப்பில் இந்தியா
முன்னோடியாக இருந்து வந்ததை குறிப்பிட்ட நீதிபதி,
தற்போது மருத்துவ மூலப் பொருள்களுக்கு 90 விழுக்காடு
வரை அண்டை நாடான சீனாவை மட்டுமே நம்பியுள்ளதால்,
தரம் குறைந்த மருந்துகளும் விற்பனைக்கு வருகிறது எனவும்
வேதனை தெரிவித்தார்.

இறக்குமதிக்கு ஒரு நாட்டை மட்டும் சார்ந்திருப்பது,
தேசத்தின் பாதுகாப்புக்கு ஆபத்தானது என தேசிய
பாதுகாப்பு ஆலோசகர் தெரிவித்தத்தை சுட்டிக்காட்டிய
நீதிபதி, மருந்துப் பொருட்களுகள் இறக்குமதிக்கு ஒரே
நாட்டை மட்டுமே நம்பி இருப்பதால் அண்டை நாட்டின்
அத்துமீறலையும், பாதுகாப்பையும் திறமையாக சமாளிக்க
முடியாத நிலை ஏற்படும் எனவும் நீதிபதி எச்சரித்துள்ளார்.

தமிழ் நியூஸ் 18