தடுப்பூசி மருந்துகளை பாதுகாக்க குளிர்சாதன பெட்டக வசதி போதாது': சுகாதார நிபுணர்கள்

-

புதுடில்லி
:'கொரோனா தடுப்பூசி மருந்துகளை கையாள, போதுமான
குளிர் சாதன பெட்டக வசதிகளை ஏற்படுத்த வேண்டும்' என,
சுகாதார நிபுணர்கள் தெரிவித்துள்ளனர்.

இந்தியாவில், 'பாரத் பயோடெக், சீரம் தேசிய மையம்'
உள்ளிட்ட பல நிறுவனங்கள், கொரோனா தடுப்பூசி மருந்து
தயாரிப்பில் ஈடுபட்டு வருகின்றன. இவை, முதற்கட்டமாக,
50 கோடி, 'டோஸ்' தடுப்பூசி மருந்துகளை தயாரித்து
வழங்கும் என, எதிர்பார்க்கப்படுகிறது.

'அடுத்த ஆண்டு, ஜூலைக்குள், 25 கோடி பேருக்கு தடுப்பூசி
மருந்து தரப்படும்' என, மத்திய சுகாதார துறை அமைச்சர்
ஹர்ஷ் வர்த்தன் தெரிவித்துள்ளார்.

இதையொட்டி, தடுப்பூசி மருந்துகளை பாதுகாப்பாக வைக்க,
குளிர் பெட்டக வசதிகளை திட்டமிடும்படி, மாநில அரசுகளை,
மத்திய அரசு அறிவுறுத்தியுள்ளது.எனினும், ''தடுப்பூசி
மருந்துகளை, குறைந்தபட்ச தட்பவெப்ப நிலையில் வைத்திருக்க,
தற்போதுள்ள குளிர் சாதன பெட்டக வசதிகள் போதாது,'' என,
தேசிய நோய் எதிர்ப்பியல் மைய வல்லுனர் சத்யஜித் ராத்
தெரிவித்துள்ளார்.

''கொரோனா தடுப்பூசி மருந்தை, தயாரிப்பு நிலையில் இருந்து
வினியோகம் வரை, 2 - 8 டிகிரி செல்ஷியசில் பராமரிக்க வேண்டும்,''
என, பெங்களூரு, இந்திய அறிவியல் மைய பேராசிரியர், ராகவன்
வரதராஜன் தெரிவித்துள்ளார்.

தடுப்பூசி மருந்தை, குளிர் நிலையில் அல்லது உறை நிலையில்
வைத்திருக்கலாம். வெப்பம் அதிகரிக்கும் பட்சத்தில், தடுப்பூசி
மருந்து வீரியமிழந்து விடும்.மத்திய அரசு, சர்வதேச நோய் எதிர்ப்பு
திட்டத்தின் கீழ், தடுப்பூசி மருந்தை நாடு முழுதும் உள்ள,
27 ஆயிரத்திற்கும் அதிகமான, குளிர் சாதன பெட்டக மையங்களில்
சேமித்து, வினியோகிக்க உள்ளது.

இம்முனையங்களில், 76 ஆயிரம் குளிர் சாதன பெட்டக
இயந்திரங்கள் உள்ளன. 25 லட்சம் சுகாதார பணியாளர்கள்
மற்றும் 55 ஆயிரம் குளிர் பெட்டக பராமரிப்பு ஊழியர்கள்
துணையுடன், தடுப்பூசி மருந்துகள் வினியோகிக்கப் பட உள்ளன.

'இருந்தபோதிலும், தடுப்பூசி மருந்து பராமரிப்பு மற்றும்
வினியோகத்தில், தனியார் நிறுவனங்களையும் இணைத்தால்,
மருந்து வினியோகத்தில் எதிர்கொள்ள உள்ள சவாலை சமாளிக்க
முடியும்' என, வல்லுனர்கள் தெரிவித்துள்ளனர்.

தினமலர்