சென்னை - புதுச்சேரி - கன்னியாகுமரி இடையே நீர்வழிப் போக்குவரத்து

புதுச்சேரி:
சென்னை - புதுச்சேரி - கன்னியாகுமரி இடையே நீர்வழிப் போக்குவரத்து
மிகவும் அவசியம் என்றும், இதைச் செயல்படுத்துவதற்கான
நடவடிக்கை விரைவில் தொடங்கப்படும் என்றும் மத்திய தரைவழிப் போக்குவரத்து, துறைமுகங்கள் துறை அமைச்சர் நிதின் கட்கரி
தெரிவித்தார்.

புதுவை மாநிலத்தில் புதுச்சேரி - விழுப்புரம் சாலையில் அரும்பார்த்தபுரத்தில் ரூ.35 கோடியில் கட்டப்பட்ட ரயில்வே மேம்பாலம் திறப்பு விழா புதன்கிழமை நடைபெற்றது. இதில், தில்லியிலிருந்து காணொலிக் காட்சி மூலம் பங்கேற்ற மத்திய அமைச்சர் நிதின் கட்கரி, ரயில்வே மேம்பாலத்தை திறந்துவைத்துப் பேசியதாவது:

புதுவை - தமிழகத்தை இணைக்கும் தேசிய நெடுஞ்சாலைகளில் புதுவை எல்லைக்குள் 237 கி.மீ. நீளத்துக்கு ரூ.11,000 கோடியில் பணிகள் நடைபெற்று வருகின்றன. இதன்மூலம், தேசிய நெடுஞ்சாலை எண் - 45இன் நான்கு வழித்தடங்கள், புதுவை மாநிலத்தின் காரைக்கால் துறைமுகம் மற்றும் கன்னியாகுமரி வரை செல்லும் கிழக்கு கடற்கரைச் சாலை ஆகியவற்றில் தடையில்லா போக்குவரத்துக்கு வழி ஏற்படும்.

தேசிய நெடுஞ்சாலை 332ஏ-இல் மகாபலிபுரம் முதல் முகையூர் பிரிவு வரை 31 கி.மீ. நீளத்துக்கு ரூ.1,090 கோடியில் நான்கு வழிச் சாலைப் பணிகள் நிறைவுபெற்றன. முகையூர் முதல் மரக்காணம் பிரிவு தேசிய நெடுஞ்சாலை 45ஏ-இன் புதுச்சேரி புறவழிச் சாலைப் பகுதிகள், மேலும் இதே சாலையில் புதுச்சேரி முதல் பூண்டியாங்குப்பம் பிரிவு, பூண்டியாங்குப்பம் முதல் சட்டநாதபுரம் வரை, நாகப்பட்டினம் பிரிவு முதல் சட்டநாதபுரம் வரை ஆகிய இடங்களில் நான்கு வழிச் சாலை அமைக்கும் பணிகள் நடைபெற்று வருகின்றன.

மேலும், புதுவை முதல்வர் நாராயணசாமி வைத்த கோரிக்கைளான புதுச்சேரி ராஜீவ் காந்தி சதுக்கத்தில் 2 கி.மீ. நீளத்துக்கு ரூ.232 கோடியில் மேம்பாலம், இந்திரா காந்தி சதுக்கம் அருகே 2 கி.மீ. நீளத்துக்கு ரூ.196 கோடியில் பாலம் அமைத்தல், மரக்காணம் - கூனிமேடு - புதுச்சேரி புறவழிச் சாலைப் பணி என மொத்தமாக ரூ.1,354 கோடியிலான பணிகள் அடுத்தாண்டு நிச்சயம் தொடங்கும்.

புதுவை ஆளுநரும், முதல்வரும் இணைந்து புதுவையில் தொழில் வளர்ச்சிக்குத் திட்டமிட வேண்டும். தொழில் வளர்ச்சிக்கு நீர், மின்சாரம், போக்குவரத்து, தகவல் தொடர்பு உள்ளிட்டவை தேவை. இதற்கான வசதிகளைச் செய்துதர மத்திய அரசு தயாராக உள்ளது.

புதுச்சேரி - சென்னை இடையே நீர்வழிப் போக்குவரத்துக்கு புதுவை முதல்வர் நாராயணசாமி தொடர்ந்து அழுத்தம் கொடுத்து வருகிறார். இது, எனது கனவுத் திட்டம். அதுமட்டுமல்ல, சென்னை - புதுச்சேரி - காரைக்கால் வழியாக கன்னியாகுமரி வரை நீர்வழிப் போக்குவரத்து தொடங்க உரிய நடவடிக்கை எடுக்கப்படும். மேலும், தனியார் துறையினர் பங்களிப்புடன் புதுச்சேரியிலிருந்து தென் மாநிலங்களின் முக்கிய நகரங்கள், வட மாநிலங்களில் உள்ள முக்கிய நகரங்களுக்கு நீர்வழிப் போக்குவரத்து தொடங்க முதல்வர் நாராயணசாமி முயற்சி செய்தால், அதற்கும் மத்திய அரசு உதவத் தயாராக உள்ளது.

ஏற்கெனவே கங்கையைத் தூய்மைப்படுத்தும் திட்டத்தில் மத்திய அரசு வெற்றி கண்டுள்ளது. நீர்வழிப் போக்குவரத்துகளை அதிகப்படுத்த தனியார் முதலீடுகளை ஊக்கப்படுத்த வேண்டும். கரோனாவுக்கு எதிரான போரில் இந்தியா வென்றுள்ளது. பொருளாதாரப் போரிலும் வெல்லும் என்றார் மத்திய அமைச்சர் நிதின் கட்கரி.

நிகழ்ச்சியில் மத்திய இணை அமைச்சர் வி.கே.சிங், புதுவை துணை நிலை ஆளுநர் கிரண் பேடி, முதல்வர் வே.நாராயணசாமி, பொதுப் பணித் துறை அமைச்சர் ஆ.நமச்சிவாயம், கல்வி அமைச்சர் இரா.கமலக்கண்ணன், சட்டப் பேரவைத் தலைவர் வே.பொ.சிவக்கொழுந்து, தலைமைச் செயலர் அஸ்வனிகுமார் உள்ளிட்டோர் பங்கேற்றனர்.

தினமணி