மன்னிப்பின் ரகசியம்

-
ஆக்‌ஷன், சயின்ஸ் ஃபிக்‌ஷன், திரில்லர் மசாலாக்களைத்
தாண்டி எப்போதாவதுதான் ஹாலிவுட்டில் மனதைத்
தொடும் படங்கள் வரும்.

அப்படியான ஒரு படம்தான்
‘A Beautiful Day in the Neighborhood’. ‘டைம்’
பத்திரிகை 2019ம் வருடத்தின் சிறந்த பத்து படங்களில்
ஒன்றாக தேர்வு செய்த படம் இது.

அமெரிக்காவில் குழந்தைகளுக்கான தொலைக்காட்சி
நிகழ்ச்சிகளை நடத்தி வந்தவர் ஃப்ரெட் ரோஜர்ஸ்.
புகழ்பெற்ற பத்திரிகையாளர் டாம் ஜுனோட். இவர்களின்
நிஜ வாழ்க்கையும் நட்பும்தான் படத்தின் கதை.

எதற்கெடுத்தாலும் எரிந்து விழும் சிடுமூஞ்சி பத்திரிகையாளர்
லாயிட் வோகல். அவருக்கு அன்பான மனைவி, பிறந்து சில
மாதங்களே ஆன குழந்தை இருக்கிறது. அம்மாவை விட்டுவிட்டு
அப்பா வேறு ஒரு பெண்ணுடன் போய்விட்டதால் சின்ன
வயதிலிருந்து லாயிட்டுக்கும் அப்பாவுக்கும் ஆகாது.

எப்போதுமே சண்டை. இதுதான் அவரது சிடுமூஞ்சிக்குக் காரணம்.

ஒரு நாள் அப்பாவுடனான வாய்ச்சண்டை கைகலப்பில் முடிகிறது.
லாயிட்டின் மூக்கை அப்பா உடைக்க, இருவரும் பரம எதிரிகள்
ஆகிவிடுகின்றனர்.

சண்டைக்குப் பிறகு அப்பா சமாதானம் பேச வந்தாலும் லாயிட்
எரிந்து விழுகிறார். அப்பாவுடனான பிரச்னை லாயிட்டை
வதைக்கிறது. அவரால் வேலையை சரியாகச் செய்ய முடியவில்லை.
குழந்தைக்கு நல்ல அப்பாவாகவும் மனைவிக்கு நல்ல கணவனாகவும்
இருக்க முடியவில்லை.

இந்நிலையில் லாயிட்டிற்கு ஒரு அசைன்மென்ட்டை கொடுக்கிறார்
எடிட்டர். சமூகத்தில் ஹீரோக்களாக இருப்பவர்களின் கதையை
லாயிட் 400 வார்த்தைகளுக்குள் எழுத வேண்டும்.

முதல் கதையே குழந்தைகளுக்கான தொலைக்காட்சி நிகழ்வை
நடத்தும் ஃப்ரெட் ரோஜர்ஸைப் பற்றியது.

ரோஜர்ஸைப் பற்றி லாயிட்டுக்கு பெரிதாகத் தெரியாது என்பதால்
ஆர்வமில்லாமல் அசைன்மென்ட்டை ஒப்புக்கொள்கிறார். ரோஜர்ஸ்
உடனான முதல் சந்திப்பே லாயிட்டை எரிச்சலூட்டுகிறது.

ஆம்; தன்னைப் பற்றி சொல்லாமல் லாயிட்டின் மூக்கு எப்படி
உடைந்தது என்பதைத் தெரிந்துகொள்வதிலேயே ஆர்வமாக
இருக்கிறார் ரோஜர்ஸ்.

இப்படியான எரிச்சலுடன் ஆரம்பிக்கும் பயணம் நாளடைவில்
நட்பாக மலர்கிறது. அந்த நட்பு லாயிட்டின் வாழ்க்கையை எப்படி
அழகாக மாற்றுகிறது என்பதை நெகிழ்ச்சியாக சொல்லியிருக்கிறார்
இயக்குநர் மரியெல் ஹெல்லர்.

ஹாலிவுட்டில் கவனிக்கத்தக்க பெண் இயக்குநர்களில் இவரும்
ஒருவர். படத்தைப் பார்த்து முடித்தபின் உங்களுக்கு கோபமூட்டிய
எல்லோரையும் மன்னிப்பீர்கள். நீண்ட நாட்களாக நீங்கள் பேசாமல்,
சந்திக்காமல் தவிர்க்கும் நபர்களை அழைத்துப் பேசுவீர்கள்;
தேடிப்போய் சந்திப்பீர்கள்.

இதுவே இந்தப் படத்தின் வெற்றி. ஃப்ரெட் ரோஜர்ஸாக அசாத்தியமான
நடிப்பைக் கொடுத்திருக்கிறார் டாம் ஹாங்க்ஸ். லாயிட்டாக நடித்த
மேத்யூ ரைஸின் நடிப்பும் அசத்தல். இந்தப்படம் அமேசான் ப்ரைமில்
தமிழ் டப்பிங்கில் கிடைக்கிறது.
--
நன்றி-குங்குமம்