இந்திய டாக்டருக்கு சீனாவில் வெண்கல சிலை திறப்பு

-
பீஜிங்: சீனாவில் தன்னலம் கருதாமல் சேவையில் ஈடுபட்ட இந்திய டாக்டர் துவாராகாந்த் சாந்தாராம் கோட்னிஸ் என்பவருக்கு வெண்கல சிலை அமைக்கப்பட உள்ளது.

கடந்த 1938 ம் ஆண்டு சீனா-ஜப்பான் நாடுகளுக்கு இடையே போர் மூண்ட போது இந்திய தேசிய காங்கிரஸ் சார்பில் சீன ராணுவத்தினருக்கு உதவ மருத்துவர் குழு ஒன்று இந்தியாவிலிருந்து அனுப்பி வைக்கப்பட்டது. அக்குழுவில் இடம் பெற்றவர் தான் துவாரகாந்த் சாந்தாராம் கோட்னிஸ்.

மஹாராஷ்டிரா மாநிலத்தைச் சேர்ந்த கோட்னிஸ் நடுத்தர குடும்பத்தில் பிறந்தவர். மும்பையில் மருத்துவம் பயின்ற இவர் சீனாவுக்கு மருத்துவ குழுவுடன் 29ம் வயதில் சென்றார். அங்கு போர் நேரத்தில் காயமடைந்த ராணுவ வீரர்களுக்கு ஆம்புலன்ஸ் மூலமாக சென்று சிகிச்சை அளித்தார். பல நாட்கள் தூக்கம் இல்லாமல் சேவை புரிந்தா். மொத்தம் 588 அறுவை சிகிச்சைகளை மேற்கொண்டிருந்தார்.

சீனப் பெண் ஹோ ஜிங்லானை திருமணம் செய்து கொண்டு சீன மக்களுக்காகவே தொண்டாற்றினார். 1939ம் ஆண்டு சீனாவை உருவாக்கிய மசேதுங் தலைமையிலான 8 வது படைப்பிரிவில் இணைந்தார். தொடர்ச்சியான பணிச்சுமையால், 1942ம் ஆண்டு தனது 32வது வயதில் காலமானார். துவராகாந்தின் மறைவு சீனாவை தோற்றுவித்த மாசேதுவுங்குவுக்கு பெரும் சோகத்தை கொடுத்தது. 'சீனா ராணுவம் முக்கியமான உதவும் கரத்தை இழந்து விட்டது. ஒரு நல்ல நட்பை சீன நாடு இழந்து விட்டது' என்று மாசேதுங் அச்சமயத்தில் வேதனை தெரிவித்தார்.
-



டாக்டர் துவாரகாந்த் சாந்தாராம் கோட்னிஸின் சேவையை பாராட்டி, சீனாவின் ஹேபே மாகாணத்தில் அவர் பணிபுரிந்த நகரமான ஷிஜாசூவாங்கிலுள்ள மருத்துவ கல்லூரிக்கு அவர் பெயர் சூட்டப்பட்டுள்ளது. இக்கல்லூரிக்கு முன் டாக்டர் துவாராகந்தின் சிலை வரும் செப்., மாதம் திறக்கப்பட உள்ளது. இனிமேல் இக்கல்லூரியில் சேரும் முதல் வருட மாணவர்கள் டாக்டர் சிலை முன்பாக நின்று உறுதிமொழி எடுப்பார்கள் என சீன அதிகாரிகள் தெரிவித்தனர்.

சீனாவில் வருடந்தோறும் மூதாதையருக்கு மரியாதை செய்யும் சிம்மிங் பண்டிகையின் போது ஷிஜாசூவாங் நகரத்திலுள்ள கோட்னிஸின் கல்லறையில் சீன மக்கள் மலர் வைத்து மரியாதை செலுத்துகின்றனர். சீனாவுக்கான தன்னலமில்லா பங்களிப்பை தந்த முதல் 10 வெளிநாட்டவர்கள் வரிசையில் மருத்துவர் கோட்னிஸும் உள்ளார் என்பது குறிப்பிடத்தக்கது.

தினமலர்