இயக்குனரால் நாடகத்தை கைவிட்டேன்!

துவக்கத்தில் நாடக நடிகையாக இருந்து,
சினிமாவில் நடிக்க துவங்கியது முதல், நாடகம் பக்கமே
வராமல், முழு நேரமும் சினிமாவிலேயே நடித்தது ஏன்
என்பது பற்றி நடிகை கே.ஆர்.விஜயா:

எங்க அப்பாவோட நாடக கம்பெனியில் தான் முதலில் நடித்துக்
கொண்டிருந்தேன். கற்பகம் படத்தில் நடிக்க தேர்வாகி, அந்த
படத்திற்காக நடித்து வந்தேன்.

அதே நேரத்தில், எங்க அப்பா நாடகத்திலும் நடித்துக்
கொண்டிருந்தேன்.ஒருநாள், கற்பகம் படத்திற்காக
முக்கியமான காட்சியை படமாக்கிக் கொண்டிருந்தனர்.
அதே நாளில், மாலை, 5:00 மணிக்கு, எங்கள் நாடக
கம்பெனியின் நாடகத்திலும், நான் முக்கிய காட்சியில்
நடித்தாக வேண்டும்.

கற்பகம் படத்தின் காட்சி, நீண்டு கொண்டே போகிறது.
மணி, 5:00 தாண்டி விட்டது. 4:00 மணிக்கே, 'ஷூட்டிங்'கில்
இருந்து கிளம்பினால் தான், 5:00 மணிக்கு நாடகத்திற்கு
செல்ல முடியும். ஆனால், மணி, 5:30 ஆச்சு, 6:00 ஆச்சு.
ஷூட்டிங் முடிந்த பாடில்லை.

'அப்பா நாடகத்திற்கு போகணும்'ன்னு அழ ஆரம்பித்து
விட்டேன். படத்தின் இயக்குனர் கே.எஸ்.கோபால கிருஷ்ணன்
வந்து, 'இது என்ன, சின்னப்பிள்ளை மாதிரி அழுதுட்டு இருக்கே...
நீ 'டிராமா'ல நடிக்கணும்னு மனசுல நினைச்சுட்டே இருந்தால்,
நான் எடுக்குற காட்சி எப்படி நல்லா வரும்... உனக்கு சினிமா
வேணுமா; நாடகம் வேணுமா என்பதை, இப்போதே நீ முடிவு
பண்ணிக்கோ' என்றார்.

நான் யோசித்து பார்த்தேன். அழுகையை நிறுத்தினேன்.
'எனக்கு நாடகம் வேண்டாம்; சினிமா தான் வேணும்'னு
சொன்னேன். அதன் பின், அந்த காட்சியை முழுமையாக
நடித்து கொடுத்து வீட்டுக்கு சென்றேன்.

அதே நேரம், எங்கள் நாடகத்தில் நான் நடிக்காததால்,
பெரிய கலாட்டா ஆகி விட்டது. அதன் பிறகு நான், நாடகம்
பக்கமே தலைவைத்து படுக்கவில்லை.

எனினும், சீனாவுடனான இந்திய போரின் போது, நிதி
திரட்டுவதற்காக, சினிமா நடிகர்கள் நாடகம் போட்டனர்.
அதில் நான் நடித்துள்ளேன்.ஆனால், தொழில் முறையாக,
கற்பகம் படத்திற்கு பிறகு, நாடகத்தில் நடிக்கவே இல்லை.
அதன் பின், சினிமாவே என் வாழ்க்கையாக அமைந்து விட்டது.

அந்த அளவுக்கு எனக்கு, இயக்குனர் கே.எஸ்.கோபாலகிருஷ்ணன்
அறிவுரை கூறினார். அப்படி நான் நடித்த கற்பகம் படம், எனக்கு
மட்டுமின்றி, அந்தப் படத்தில் நடித்த பலருக்கும் புதிய
வாழ்க்கையை கொடுத்தது. அவ்வளவு அருமையான படம் அது.

நான் எப்போதுமே, பெரியவர்கள் எதை கூறினாலும், அதை
எதிர்த்து பேச மாட்டேன். அவர்கள் வார்த்தைக்கு மதிப்பு
கொடுப்பேன்!
-
-------------------
தினமலர்