நான்காவது தேவாலயம் தீ வைப்புத் தாக்குதலுக்கு இலக்காகியுள்ளது

நேற்று அதிகாலை நிகழ்ந்த தேவாலயத் தீ வைப்புச் சம்பவங்களில் இன்னொரு தேவாலயமும் பாதிக்கப்பட்டுள்ளது. அந்த நான்காவது - குட் ஷெப்பர்ட் லூதரன் தேவாலயம் ஆகும். அது பெட்டாலிங் ஜெயாவில் உள்ளது.

சொற்ப சேதங்களே ஏற்பட்டுள்ள அந்தத் தாக்குதலைப் போலீசார் விசாரித்து வருகின்றனர். பல சாட்சிகள் விசாரிக்கப்பட்டுள்ளனர்.

தேசா மெலாவத்தியில் உள்ள மெட்ரோ டபெர்னக்கால் தேவாலயம், பெட்டாலிங் ஜெயாவில் உள்ள அஷம்ப்சன் தேவாலயம், லைப் சாப்பால் தேவாலயம் ஆகியவை மீது தாக்குதல் நடத்தப்பட்ட அதே நேரத்தில் நான்காவது தேவாலயமும் தாக்கப்பட்டிருக்கலாம் என்று நம்பப்படுகிறது.

நள்ளிரவுக்குப் பின்னர் நேற்று அதிகாலைக்குள் அடையாளம் தெரியாத நபர்கள் அந்தத் தாக்குதலை நடத்தியுள்ளனர்.

மூன்று மாடிகளைக் கொண்ட மெட்ரோ டபெர்னக்கால் தேவாலயத்தின் கீழ்த்தளம் கடுமையாகச் சேதமடைந்துள்ளது. மற்ற இரண்டு தேவாலயங்களுக்கும் சொற்ப சேதம் ஏற்பட்டுள்ளது.

அது கிள்ளான் பள்ளத்தாக்கில் தேவாலயங்கள் மீது நடத்தப்பட்ட நான்காவது தாக்குதலா என்பதை தம்மால் முழுமையாக உறுதிப்படுத்த முடியவில்லை என்று தேசிய போலீஸ் படைத் தலைவர் மூசா ஹசான் கூறினார்.

மூசா இன்று பிற்பகல் மெட்ரோ டபெர்னக்கால் தேவாலயத்திற்கு வருகை அளித்தார். அந்தத் தாக்குதக் நடந்த நேரம் தமக்கு இன்னும் உறுதியாகத் தெரியவில்லை என்றார் அவர்.

“தேவாலயத்திற்கு வெளியில் தரையில் உடைந்த கண்ணாடித் துண்டுகளைக் கண்டதாக புகார்தாரர் பார்த்திருக்கிறார். ஆகவே அவர் போலீஸில் புகார் செய்துள்ளார்,” என்று மெட்ரோ டபெர்னக்கால் தேவாலயத்தில் ஏற்பட்ட சேதங்களை பார்வையிட்ட பிரதமர் நஜிப் அப்துல் ரசாக்குடன் சென்றிருந்த மூசா கூறினார்.

குட் ஷெப்பர்ட் லூதரன் தேவாலயம் பெட்டாலிங் ஜெயா பழைய நகரில் செக்சன் 52ல் ஜாலான் உத்தாராவில் அஷம்ப்சன் தேவாலயத்திற்கு அருகில் அமைந்துள்ளது.