சித்தா, ஆயுர்வேத துறைகளுக்கு 10 ஆண்டில் எவ்வளவு ஒதுக்கீடு?

சென்னை :
சித்தா, ஆயுர்வேதம் உள்ளிட்ட, இந்திய மருத்துவத் துறைகளுக்கு, 10 ஆண்டுகளில், தனித்தனியாக எவ்வளவு நிதி ஒதுக்கப்பட்டது என்ற
விபரங்களை, மத்திய அரசு தாக்கல் செய்ய, சென்னை உயர் நீதிமன்றம் உத்தரவிட்டுள்ளது.

சித்த மருத்துவ சிகிச்சை அளித்து வந்த தணிகாசலம், குண்டர்
சட்டத்தில் கைது செய்யப்பட்டார். இதை எதிர்த்து தாக்கல் செய்யப்பட்ட
மனு, நீதிபதிகள் கிருபாகரன், வேலுமணி அடங்கிய, 'டிவிஷன் பெஞ்ச்'
முன், விசாரணைக்கு வந்தது.

அப்போது, இந்திய மருத்துவ துறைக்கு, மத்திய, மாநில அரசுகள்
அங்கீகாரம் அளிப்பதில்லை என, நீதிபதிகள் வேதனை தெரிவித்தனர்.
மத்திய, மாநில அரசுகளுக்கு, பல கேள்விகளையும் எழுப்பி இருந்தனர்.

இவ்வழக்கில், மத்திய அரசின் ஆயுஷ் துறை சார்பில், மத்திய சித்த
மருத்துவ ஆராய்ச்சி கவுன்சிலின் இயக்குனர் ஜெனரல், டாக்டர்
கனகவள்ளி தாக்கல் செய்த மனு:சித்த மருத்துவத்துக்கு, ஆயுஷ்
அமைச்சகம் உரிய அங்கீகாரம் வழங்கி உள்ளது.

கொரோனா தொற்று தாக்கத்தை கட்டுப்படுத்த, ஆயுஷ் நடவடிக்கை
எடுத்து வருகிறது. சித்த மருத்துவ ஆராய்ச்சி கவுன்சிலுக்கு,
10 ஆண்டுகளில், 237 கோடி ரூபாய்க்கு மேல் ஒதுக்கப்பட்டுள்ளது.

இவ்வாறு, மனுவில் கூறப்பட்டுள்ளது.

இந்நிலையில், வழக்கு நேற்று(ஆக.,13) விசாரணைக்கு வந்தது.
மத்திய அரசு சார்பில், உதவி சொலிசிட்டர் ஜெனரல் ஜி.கார்த்திகேயன்,
அறிக்கை தாக்கல் செய்தார். சித்தா, ஆயுர்வேதம், ஹோமியோபதி,
யுனானி உள்ளிட்ட இந்திய மருத்துவ முறை ஒவ்வொன்றுக்கும்,
10 ஆண்டுகளில், நிதி ஒதுக்கப்பட்டுள்ள விபரங்களை, மத்திய அரசு
தாக்கல் செய்ய, நீதிபதிகள் கிருபாகரன், வேலுமணி அடங்கிய,
'டிவிஷன் பெஞ்ச்' உத்தரவிட்டது.

விசாரணையை, வரும், 20ம் தேதிக்கு, நீதிபதிகள் தள்ளி வைத்தனர்.

தினமலர்

நீதிபதிகளின் வேதனை நியாயமானது!
நமது பழைய மருத்துவ அறிவை , அறிவியல் அடிப்படையில் ஆராய்ந்து, நம் மூலிகையில் உள்ள எந்த இராசயனம் , எந்த மூலக்கூறுள்ள கிருமிகளை எப்படி அழிக்கவல்லது என்று உலகுக்குக் காட்டவேண்டும்! இந்த ஆராய்ச்சியை நாம் செய்யாமல். வீணே பழம் பெருமை பேசிக்கொண்டிருப்பதில் என்ன பயன்?