பரீட்சை 'டிப்ஸ்'!

தொகுப்பு: லட்சுமிகிருபா

பொதுத் தேர்வு வெகு அருகில். இனி, வீடே பரபரப்பாகி விடும். அம்மா லீவு போட்டு டியூஷன் எடுப்பதும், அப்பா விடிகாலையில் எழுந்து காபி கலக்கித் தருவதுமாக..

இத்தனை மெனக்கெடுதலும் எதற்காக? பிள்ளை மார்க்குகளை குவிக்க வேண்டும் என்பதற்காகத்தானே! அதற்குத்தான் இங்கே வழிகாட்டியிருக்கிறார், சென்னை, செயின்ட் ஜான்'ஸ் இன்டர்நேஷனல் பள்ளியின் முதல்வர் டாக்டர் கிஷோர்குமார்..




"முதலில் தேர்வு எழுதும் பிள்ளைகளுக்கான டிப்ஸ்களைச் சொல்கிறேன்..

எப்படி படிப்பது?

* மனசு உற்சாகமாக இருக்கிறபோது, படிக்கிற விஷயங்களை புத்தி அப்படியே உள்வாங்கிக் கொள்ளும். எனவே, உற்சாகமான மனநிலையில் இருக்கும்போது படிக்க உட்காருங்கள்.

* 'எவ்வளவு சின்ஸியரா படிச்சாலும், பரீட்சை ஹால்ல வெச்சு சுத்தமா மறந்து போயிடுதே..' - இது பல மாணவர்களின் கவலை. எதையுமே புரிந்து கொண்டு படித்தால் மறக்கவே மறக்காது. கணிதமாக இருந்தால் ஃபார்முலாவை எழுதிப் பாருங்கள். அறிவியல் பாடமாக இருந்தால் வரைந்து பழகுங்கள். வாய் விட்டுப் பலமுறை சொல்லி, மனதில் பதியவைத்து, பிறகு மனப்பாடம் செய்யுங்கள்.

* ஒன்றோடு ஒன்று தொடர்புபடுத்தி ஒப்பிட்டுப் படிப்பதை வழக்கமாக்குங்கள். மறதியை விரட்டும் அற்புத டெக்னிக் இது.

* தினமும் மாலை 2 மணி நேரமாவது படியுங்கள். ஒரு பாடத்தை அதிகபட்சம் 40 நிமிடம் படிக்கலாம். பிறகு, 10 நிமிட இடைவெளி விட்டு, வேறொரு பாடத்தை எடுத்து வைத்துப் படிக்க வேண்டும். அப்போதுதான் படித்தது மனதில் தங்கும். ஒருவரது தொடர்ந்த கிரகிக்கும் திறன் என்பது 40 நிமிடங்கள் மட்டுமே!



* எந்தெந்தக் கேள்விகள்.. எந்தெந்த மதிப்பெண்களில் கேட்கப்படும் என்பதை அனுமானிப்பதற்கு, மாதிரி வினாத்தாள்கள் பெரிதும் உதவும். ஐந்து ஆண்டுகள் வரையிலான வினாத்தாள்களை வைத்துப் பயிற்சி எடுங்கள்.

* ஒரு கேள்வித்தாளை வைத்துக் கொண்டு மாடல் எக்ஸாம் எழுதிப் பார்ப்பது, தேர்வின்போது 'டைம் மேனேஜ்மென்ட்' செய்வதற்குப் பெரிதும் உதவும்.

* சப்-ஹெட்டிங்குகளை சிறு குறிப்பு போல் எடுத்துக் கொண்டு, எழுதியும் படித்தும் பார்க்க வேண்டும்.

* இரவில்.. அதிகாலையில்.. என்று ஒவ்வொருவரும் ஒவ்வொரு விதமாகப் படித்துப் பழகியிருப்பீர்கள். பிறர் சொல்கிறார்கள் என்பதற்காக அந்த நேரத்தை மாற்ற வேண்டாம். புதிதாக அதிக நேரம் படிக்கத் துவங்குகிறவர்கள் எனில், அதிகாலை நேரம்தான் சிறப்பானது.

* 'ஸ்டடி ஹாலிடேஸை' வீணாக்காமல் படித்தால் விடிய விடியப் படிக்கும் அவசியம் இல்லை. அயர்ச்சியும் ஏற்படாது.

* தியானம் அல்லது இறை வழிபாட்டில் சிறிது நேரம் ஈடுபடுங்கள். இரண்டுமே உங்களுக்குள் புத்துணர்வு பிளஸ் தன்னம்பிக்கையை அள்ளித் தரும்.

* பள்ளிகளில் பொதுத் தேர்வுக்கு முன், ப்ரீ-போர்டு எக்ஸாம் வைப்பார்கள். இதைப் பொதுத் தேர்வாகக் கருதி தயாரானாலே, தேர்வு ஜுரத்தில் இருந்து விடுபட்டு விடலாம்.

* தேர்வுக்கு முந்தின நாள், விடிய விடியப் படிப்பதோ.. அதிக நேரம் கண் விழிப்பதோ கூடவே கூடாது.

பரீட்சை ஹாலில்..

* தேர்வு மையத்துக்கு அரை மணி நேரம் முன்னதாகவே சென்று விடுங்கள். நம்மூர் டிராஃபிக் பற்றிப் புதிதாகச் சொல்ல வேண்டுமா என்ன?

* பழகிய பேனாவாலேயே எழுதுங்கள். கூடுதலாக பேனா, பென்சில் வைத்திருப்பது நல்லது. அந்தப் பேனாவையும் நன்றாகப் பழக்கியே எடுத்துச் செல்லுங்கள்.

* வினாத்தாளைக் கையில் வாங்கியதுமே ஒன்றுக்கு இருமுறை பதற்றமே இல்லாமல் முழு கவனத்துடன் அதை வாசியுங்கள்.

* தெரிந்த கேள்விகளுக்கு முதலில் விடை எழுதுங்கள். எந்தப் பிரிவு என்பதையும் கேள்வி எண்ணையும் தெளிவாகக் குறிப்பிடுங்கள்.

* கேள்வியை நன்றாகப் புரிந்து, உள்வாங்கிக் கொண்டு பதில் எழுதுங்கள்.
* நன்கு இடம் விட்டு தெளிவாக எழுதுங்கள்.

* தேவையான இடங்களில் அண்டர் லைன் செய்ய, கறுப்பு ஸ்கெட்ச் பேனாவைப் பயன்படுத்துங்கள்.

* வினாத்தாளில் சொல்லப்பட்டுள்ள வரிகளுக்கு மிகாமல் பதில் தர வேண்டியது மிகவும் அவசியம்.

* முதல் தேர்வு எழுதி முடித்ததும் கிடைக்கிற உற்சாகம் கடுகளவும் குறையாமல் பார்த்துக் கொள்ளுங்கள். கடைசித் தேர்வு வரை அதே உற்சாகம்.. அதே உத்வேகம் என்று இருங்கள்.

* தேர்வு என்பது ஒரு சவால். அதை எந்த பயமும் இன்றி குதூகலத்துடன் சந்திக்கத் தயாராகுங்கள். வெற்றி உங்கள் வசம்தான்!

இனி.. பெற்றோருக்கான டிப்ஸ்..

* தேர்வுக்குத் தயாராகும் பிள்ளைகளை திருமணம் மற்றும் விசேஷங்களுக்கு அழைத்துச் செல்வதைத் தவிர்த்து விடுங்கள். வீடு மாற்றுதல், சுண்ணாம்பு அடித்தல்.. உள்ளிட்ட வேலைகளை தள்ளிப் போடுங்கள்.

* கலை, ஓவியம், விளையாட்டு.. போன்றவற்றில் உங்கள் பிள்ளையின் கவனம் சிதறலாம். நீங்கள்தான் பக்குவமாகப் புரிய வைக்க வேண்டும்.

* வழக்கத்தை விட அதிக 'ஸ்ட்ரெய்ன்' எடுத்துப் படிப்பதால், சீக்கிரமே சோர்வடைந்து விடுவார்கள். எனவே, சத்தான உணவையே கொடுங்கள். முக்கியமாக, நேரம் தவறாமல் சாப்பிட வைக்கிற பொறுப்பு உங்களிடம்தான் உள்ளது.

* புரதச் சத்துள்ள பருப்பு வகைகள், காய்கறிகள், கீரை வகைகள் (வல்லாரை கீரை ஞாபக சக்தியைத் தர வல்லது) போன்றவற்றை உணவில் அதிகம் சேருங்கள்.

* அவர்களுக்கு திடீரென ஏதேனும் உடல் நலக் குறைவு ஏற்பட்டால் 'இந்த நேரம் பார்த்து இப்படி ஆகிடுச்சே..' என்று புலம்ப வேண்டாம். 'முதல்ல ரெஸ்ட் எடு. உடம்பு சரியான பிறகு படிச்சுக்கலாம்' என்று சொல்லுங்கள்.

* படிக்கிற பிள்ளைகளின் பக்கத்தில் உட்கார்ந்து கொண்டு 'அதை முடிச்சிட்டியா? இதுதானே படிக்கிற?' என்றெல்லாம் கேட்பதை விடவும், ஏதேனும் கை வேலை செய்தபடியோ, புத்தகம் படித்தவாறோ சும்மா அவர்களுக்கு 'கம்பெனி' கொடுப்பது அதிக பலன் தரும்.

* நீங்களும் வீட்டில் உள்ள அனைவரும் தருகிற ஊக்கமும் நம்பிக்கை வார்த்தைகளும்தான் பிள்ளைகளுக்கு கூடுதல் சக்தியைத் தரும். எனவே, கொஞ்சம்கூட சோர்ந்து போகாமல் தொடர்ந்து அவர்களை உற்சாகப்படுத்துங்கள்.


ஆல் தி பெஸ்ட்!


vikatan