இந்தியா விமானத்தின் கழிவறையில் மறைந்திருந்து, பயணித்து இந்தியா வந்த, ஹபீப் உசேன் -பேட்டி

ஜெய்ப்பூர் : "வெளிநாட்டில் கிடைக்கும் ஒரு ரொட்டியை விட, சொந்த நாட்டில் கிடைக்கும் சிறிய துண்டு ரொட்டியே சிறந்தது' என்று, சவுதியில் இருந்து தப்பி, ஏர்-இந்தியா விமானத்தின் கழிவறையில் மறைந்திருந்து, பயணித்து இந்தியா வந்த, ஹபீப் உசேன் என்பவர் தெரிவித்தார்.


"சவுதியில், இந்திய பணியாளர்கள் கால்நடைகளை போன்று விற்கப்படுகின்றனர்; அடித்து உதைத்து, 14 முதல் 18 மணி நேரங்கள் வேலை வாங்கப்படுகின்றனர்' என்றும் அவர் குமுறினார். உ.பி., மொராதாபாத்தை சேர்ந்த ஹபீப் உசேன் என்பவர், சவுதியில் தான் பட்ட துன்பத்தை பற்றி கூறியதாவது: என் தாய், இரண்டு குழந்தைகள் மற்றும் கர்ப்பிணியான என் மனைவி ஆகியோரை விட்டு, சொந்தமாக இருந்த நிலத்தை விற்று வெளிநாடு சென்றேன். எனக்கு 15 ஆயிரம் ரூபாய் முதல் 20 ஆயிரம் ரூபாய் வரை சம்பளம் தருவதாக தெரிவித்தனர். ஆனால், எனக்கு சம்பளமே தரவில்லை. என் குடும்பத்தினர் இங்கு, பட்டினியால் வாடிய போது, நான் அங்கு பட்டினியால் கஷ்டப்பட்டேன். கடந்த ஆறு மாத காலமாக, தினமும் ஒரு ரொட்டியும், ஒரு கப் பருப்பும் மட்டுமே சாப்பிட்டு வந்தேன்.


என் முதலாளி எனக்கு சம்பளம் கொடுக்காத நிலையிலும், பல வேலைகள் மூலம் 800 ரூபாய் சேமித்தேன். ஆனால், இந்தியா திரும்ப பாஸ்போர்ட் கேட்டால், அவர்கள் அதை கொடுக்காமல், அடித்து உதைத்து, 14 முதல் 18 மணி நேரங்கள் வேலை வாங்குவர். சவுதியில், இந்திய பணியாளர்கள் கால்நடைகளை போன்று விற்கப்படுகின்றனர். உ.பி., மற்றும் மேற்கு வங்கம் ஆகிய மாநிலங்களை சேர்ந்த ஏராளமானோர், அங்கு துன்பப்பட்டு வருகின்றனர். எனவே தான், சம்பவத்தன்று, ஒருவரின் பைகளை கொண்டு வர உதவினேன். பின், நான் விமானத்தின் கழிவறையில் சென்று ஒளிந்துகொண்டேன். இதனால், பிரச்னை ஏற்படும் என்று தெரியும். எனினும், சவுதியில் வாழ்வதை விட, சொந்த நாட்டில் சென்று பிரச்னைகளை எதிர்கொள்ளலாம் என இவ்வாறு செய்தேன். விமானம் கிளம்பியதும், விமானப் பணிப் பெண் நான் கழிவறையில் ஒளிந்திருப்பதை கண்டுபிடித்தார். அவர் என் கதையை கேட்டபின், எனக்கு இருக்கை மற்றும் உணவு ஆகியவை கொடுத்தார். நான் என் வீட்டிற்கு திரும்ப விரும்புகிறேன். இவ்வாறு ஹபீப் உசேன் கூறினார்.