குழந்தை மூளையை பதம் பார்த்த குச்சி அப்புறப்படுத்தி டாக்டர்கள் சாதனை

தாமு · தாமு Fri Jan 08, 2010 5:51 pm

பீஜிங்:சீனாவின் ஷாங்டாங் பகுதியைச் சேர்ந்த லி ஜிங்சாவ்(14 மாதம்) என்ற குழந்தை விளையாடியபோது மூக்கில் குத்திய குச்சி, மூளையில் பதிந்தது. உயிருக்கு போராடிய நிலையில் ஆப்பரேஷன் செய்து டாக்டர்கள் குழந்தையை காப்பாற்றினர். ஷாங்டாங் பகுதியை சேர்ந்த லி ஜிங்சாவ் டிச.,26ம் தேதி, வீட்டில் சிறிய குச்சியை வைத்து விளையாடிக்கொண்டிருந்தான்.

அப்போது அவனது தாய், சமையலறையில் பாத்திரங்களை கழுவிக் கொண்டிருந்தார். சிறிதுநேரத்தில் குழந்தை கீழே விழும் சப்தம் கேட்டு, அவனது தாய் ஓடிவந்து பார்த்தார்.நன்றாக விளையாடிக் கொண்டிருந்த குழந்தை, கதறி அழுதுக் கொண்டிருந்தான். பதறிப்போன தாய், உடனடியாக உள்ளூர் ஆஸ்பத்திரிக்கு மகனை அழைத்துச் சென்றார். அங்கு நவீன கருவிகள் இல்லாததால், அவனுக்கு நேர்ந்த கதி குறித்து டாக்டர்களால் கண்டுபிடிக்க முடியவில்லை. உடனே அவனது தாய்,வாடகை காரில் குழந்தையுடன் பீஜிங் புறப்பட்டார்.

பத்து மணி நேர பயணத்திற்கு பின், அங்குள்ள ஆஸ்பத்திரியில் குழந்தையை சேர்த்தார்.டாக்டர்கள் பரிசோதித்தபோது, குழந்தைக்கு கடும் காய்ச்சலும், இதய துடிப்பு தாறுமாறாகவும் இருந்தது. உடனடியாக ஸ்கேன் செய்தபோது, குழந்தை விளையாடிக் கொண்டிருந்த குச்சி, அவனது மூக்கில் நுழைந்து, மூளையில் 4 மி.மீ., வரை பதிந்திருந்தது.

மூளை நரம்பியல் டாக்டர்கள் ஆப்பரேஷன் செய்தபோது, குழந்தையின் நிலைமை மோசமானது. ஆப்பரேஷன் முடிவதற்குள், குழந்தைக்கு பக்கவாதம் ஏற்படும் அல்லது மரணமடையும் அபாய நிலை உருவானது. ஆனால், சிறிய அளவில் ரத்தப்போக்கு மட்டுமே ஏற்பட்ட நிலையில், மூளையில் குத்திய குச்சியை டாக்டர்கள் அகற்றினர். அவன் உயிர்பிழைத்தது அதிர்ஷ்டமே; தற்போது காய்ச்சல் மட்டுமே உள்ளது. ஓரிரு நாளில் குணமடைந்து விடுவான்" என டாக்டர்கள் கூறினர்.

பெற்றோர்களே! உங்கள் வீடுகளில் எவ்வளவுதான் வேலைகள் இருந்தாலும் குழந்தைகள் என்ன செய்கிறார்கள், எதை கையில் வைத்து விளையாடுகிறார்கள் என்பதை அடிக்கடி கண்காணித்தபடி இருங்கள். அப்படி செய்தால், இதுபோன்ற விபரீதங்கள் உங்கள் குழந்தைக்கும் ஏற்படாத வண்ணம் தடுக்கலாம்.