கூண்டோடு ராஜினாமா: டில்லி டாக்டர்கள் எச்சரிக்கை

புதுடில்லி :
டில்லியில், மாநகராட்சி மருத்துவமனை பயிற்சி டாக்டர்களுக்கு,
நிலுவையில் உள்ள மூன்று மாத ஊதியத்தை வழங்காவிட்டால்,
கூண்டோடு ராஜினாமா செய்வோம் என, டாக்டர்கள் கூட்டமைப்பினர்
எச்சரித்துள்ளனர்.

ஊதியம் இல்லை

டில்லியில், 450 படுக்கைகள் கொண்ட கஸ்துாரிபாய் மற்றும் ஹிந்து ராவ்
மருத்துவமனைகளில், பயிற்சி டாக்டர்களுக்கு, மார்ச் மாதம் முதல், ஊதியம்
வழங்கப்படவில்லை.

இவர்களில் பல டாக்டர்கள் மற்றும் பணியாளர்கள், கொரோனா வைரசால்
பாதிக்கப்பட்டு உள்ளனர்.தங்களுக்கு, ஒரு வாரத்திற்குள் ஊதியம் வழங்கா
விட்டால், கூட்டாக ராஜினாமா செய்வோம் என, டாக்டர்கள் அறிவித்துள்ளனர்.

இதற்கு, டில்லி மாநகராட்சி டாக்டர்கள் கூட்டமைப்பினர், ஆதரவு
தெரிவித்துள்ளனர்.இந்தப் பிரச்னையில் நடவடிக்கை எடுக்கக் கோரி, டில்லி
துணை நிலை கவர்னர், அனில் பைஜாலுக்கு, டாக்டர்கள் கூட்டமைப்பின் சார்பில்,
கடிதம் அனுப்பப் பட்டுள்ளது.

இந்த கடிதத்தின் நகல்கள், பிரதமர் நரேந்திர மோடி, உள்துறை அமைச்சர் அமித் ஷா,
முதல்வர் அரவிந்த் கெஜ்ரிவால் ஆகியோருக்கும் அனுப்பப்பட்டு உள்ளது.

விருப்ப ஓய்வு

கடிதத்தில், கூறப்பட்டு உள்ளதாவது:

பயிற்சி டாக்டர்களின் கோரிக்கை நியாயமானது என்பதால், அதை முழுமையாக
ஆதரிக்கிறோம். அவர்களுக்கு, நிலுவையில் உள்ள மூன்று மாத ஊதியத்தை, ஒரு
வாரத்திற்குள் வழங்க வேண்டும்.அது நடக்காவிட்டால், அனைவரும், அரசுப் பணியை
ராஜினாமா செய்வோம். இல்லாவிட்டால், ஒட்டு மொத்தமாக விருப்ப ஓய்வு பெறும்
நிலை உருவாகும்.

இவ்வாறு, அதில் கூறப்பட்டு உள்ளது.

இதுகுறித்து, வடக்கு டில்லி மாநகராட்சி நிலைக்குழு தலைவர் ஜெய்பிரகாஷ்
கூறியதாவது:

பிரச்னை தொடர்பாக டாக்டர்கள் சங்க நிர்வாகிகளுடன் பேசியுள்ளோம்.
அவர்களுக்கு, ஒரு மாத சம்பளம் உடனடியாக வழங்கப்படும்.
மீதி தொகை, தவணை முறையில் தரப்படும் என, தெரிவிக்கப்பட்டு உள்ளது.
இவ்வாறு அவர் கூறினார்.

தினமலர்

இந்த நிலையில் சம்பள பாக்கி துரதிர்ஷ்டவசமானது.