பெண்ணுக்கு எஸ்.டி. சான்றிதழ் வழங்காத கோட்டாட்சியருக்கு ரூ.50 ஆயிரம் அபராதம்- ஐகோர்ட் உத்தரவு

சென்னை:

தர்மபுரி மாவட்டம் சின்னகானஹள்ளி கிராமத்தை சேர்ந்தவர் மகேந்திரன். இவரது மனைவி ஜெயலட்சுமி. இவர்கள் குறிச்சான் என்ற எஸ்.டி., பிரிவை சேர்ந்தவர்கள். இவர்கள் தங்களது ஒரு மகள் மற்றும் 2 மகன்களுக்கு எஸ்.டி. சான்றிதழ் கேட்டு தர்மபுரி வருவாய் கோட்டாட்சியரிடம் விண்ணப்பம் செய்தனர். ஆனால், அவர்களது விண்ணப்பம் நிராகரிக்கப்பட்டது.

இதை எதிர்த்து சென்னை ஐகோர்ட்டில் ஜெயலட்சுமி வழக்கு தொடர்ந்தார். ஐகோர்ட்டு உத்தரவின்படி, மாநில அளவிலான பரிசீலனை குழுவை ஜெயலட்சுமி அணுகினார். இதன்படி, மாவட்ட போலீஸ் சூப்பிரண்டு தலைமையில் விசாரணை நடத்தவும், மானுடவியல் நிபுணர் ஆய்வு செய்யவும் உத்தரவிடப்பட்டது.

இதன்படி நடந்த விசாரணை அறிக்கைகளின்படி, ஜெயலட்சுமி குறிச்சான் சமூகத்தை சேர்ந்தவர் தான் என்று பரிசீலனை குழு அறிவித்தது. ஆனாலும், அவருக்கு தர்மபுரி வருவாய் கோட்டாட்சியர் சாதி சான்றிதழை வழங்கவில்லை. இந்தநிலையில், ஜெயலட்சுமியின் மூத்த மகள் சந்தியாவுக்கு தேசியமயமாக்கப்பட்ட வங்கியில் வேலை கிடைத்தது.

வங்கி நிர்வாகம் சாதி சான்றிதழை சமர்ப்பிக்க உத்தரவிட்டது. இதையடுத்து தனக்கும், மகள், மகன்களுக்கு சாதி சான்றிதழ் வழங்குவதற்கு வருவாய் கோட்டாட்சியருக்கு உத்தரவிட வேண்டும் என்றும் மகளுக்கு பணி வழங்க வங்கி நிர்வாகத்துக்கு உத்தரவிட வேண்டும் என்றும் ஐகோர்ட்டில் ஜெயலட்சுமி வழக்கு தொடர்ந்தார்.

இந்த வழக்கை விசாரித்த நீதிபதிகள் வினீத் கோத்தாரி, ஆர்.சுரேஷ்குமார் ஆகியோர், ‘மனுதாரர் எஸ்.டி., பிரிவை சேர்ந்தவர் தான் என்று போலீஸ் சூப்பிரண்டு, மானுடவியல் நிபுணர் விசாரணை அறிக்கைகள் அளித்த பின்னரும் ஏன் சாதி சான்றிதழ் வழங்கவில்லை? இதற்காக வருவாய் கோட்டாட்சியருக்கு ரூ.1 லட்சம் அபராதம் ஏன் விதிக்கக்கூடாதா?‘ என்று நேற்றுமுன்தினம் கேள்வி எழுப்பினர்.

பின்னர் இதுகுறித்து தமிழக அரசின் கருத்தை கேட்டு தெரிவிக்கும்படி அரசு பிளடருக்கு நீதிபதிகள் உத்தரவிட்டனர். இந்தநிலையில், இந்த வழக்கு நீதிபதிகள் முன்பு நேற்று மீண்டும் விசாரணைக்கு வந்தது. அப்போது மனுதாரர் சார்பில் வக்கீல் வி.இளங்கோவன் ஆஜராகி வாதிட்டார். அரசு தரப்பில் ஆஜரான அரசு பிளடர் ஜெயபிரகாஷ் நாராயணன், ‘தர்மபுரி வருவாய் கோட்டாட்சியராக இருந்த தேன்மொழி அண்மையில் மாற்றப்பட்டு, அவர் வகித்த பதவிக்கு தணிகாசலம் என்பவர் நியமிக்கப்பட்டுள்ளார். அதனால், இதுகுறித்து விசாரிக்க கால அவகாசம் வேண்டும்‘ என்றார்.

இதை நீதிபதிகள் ஏற்கவில்லை. ‘மாநில அளவிலான ஒரு குழு மனுதாரர் எஸ்.டி. பிரிவை சேர்ந்தவர் தான் என்று முடிவு செய்த பின்னர், மனுதாரர் என்ன சாதியை சேர்ந்தவர்? என்பது குறித்து விசாரிக்க தாசில்தாருக்கு வருவாய் கோட்டாட்சியர் எப்படி உத்தரவிடுவார்? மாநில அளவிலான குழுவை விட தாசில்தார் அதிகாரமிக்கவரா?‘ என்று கேள்வி எழுப்பி கண்டனம் தெரிவித்தனர்.

பின்னர், ‘சாதி சான்றிதழ் வழங்காத வருவாய் கோட்டாட்சியர் தேன்மொழிக்கு ரூ.50 ஆயிரம் வழக்கு செலவு (அபராதம்) விதிக்கின்றோம். இந்த தொகையை அவர் உடனடியாக சட்டப்பணி ஆணைக்குழுவுக்கு வழங்க வேண்டும். மனுதாரர் மற்றும் அவரது குடும்ப உறுப்பினர்களுக்கு தர்மபுரி வருவாய் கோட்டாட்சியர் தணிகாசலம் இன்று (சனிக்கிழமைக்குள்) சாதி சான்றிதழ் வழங்கவேண்டும். அவ்வாறு சான்றிதழ் வழங்கவில்லை என்றால், அவருக்கும் வழக்கு செலவு விதிக்கப்படும். இந்த வழக்கை வருகிற திங்கட்கிழமைக்கு தள்ளிவைக்கிறோம். அன்று வருவாய் கோட்டாட்சியர்கள் இருவரும் காணொலி காட்சி மூலம் விசாரணைக்கு ஆஜராக வேண்டும்‘ என்று நீதிபதிகள் உத்தரவிட்டுள்ளனர்.

மாலைமலர்