தமிழகம் முழுவதும் கலப்பட டீ தூள் விற்பனை : ஆபத்தான நோய்கள் வரும்; பொதுமக்களே உஷார்

புதுபுதுப்
பெயர்களில் தமிழகம் முழுவதும் போலி டீத்தூள் விற்பனை அமோகமாக நடந்து
வருகிறது. உடலுக்கு தீங்கு விளைவிக்கும் இந்த போலி டீத்தூள்கள் கொஞ்சம்
கொஞ்சமாக விஷமாகும் அபாயம் உள்ளதால், பொதுமக்கள் விழிப்போடு இருப்பது
நல்லது.


மனிதனின் அன்றாட வாழ்வில்
டீ, காபி தவிர்க்க இயலாத பானமாக இணைந்து விட்டது. அதிகாலை கண்
விழித்ததும், "பெட்' காபி அல்லது டீ அருந்தி சோம்பலை விரட்டிவிட்டுத் தான்
படுக்கையை விட்டு எழுபவர்களும் நம்மில் உண்டு. வேலைப் பளுவில் சிக்கியோர்
அவ்வப்போது "சிங்கிள்' டீ அடித்து சோர்வை போக்கி பணியைத் தொடர்கின்றனர்.
பெரும்பாலானோர் சரியான உணவுப் பழக்கம் வைத்திருக்கிறார்களோ இல்லையோ, டீ,
காபி குடிப்பதை வழக்கமாகவே வைத்துள்ளனர். "டீ' மீது மக்களுக்குள்ள ஈர்ப்பை
தங்களுக்கு சாதகமாக பயன்படுத்திக் கொள்ளும் சுயநலக் கும்பலும் கலப்படங்கள்
மூலம் காசு பார்க்கும் வேலையில் இறங்கியுள்ளன. புளியங்கொட்டை மற்றும்
முந்திரி தோல், மரத்தூள், நெல் உமிகளை தூளாக்கி டீத் தூளில் கலந்து
விற்பனை நடந்து வருகிறது.


தேனி,
வருசநாடு பகுதிகளில் "இலவம் பஞ்சு'களுக்கு ஏக கிராக்கி. இலவம் பஞ்சுகளை
காய வைத்து அரைத்து தூள் செய்து "டீ' தூளுடன் கலந்து விடுகின்றனர்.
இதனால், ஒரு கிலோ இளவம் பஞ்சு 15, 20 ரூபாய் வரை விற்பனையாகிறது.
விருதுநகர் பகுதிகளில் கிடைக்கும் ஒரு வகை கரம்பை மண் செந்நிற சாயத்தை
தருவதால், அவையும் டீ தூளுடன் கலக்கப்பட்டு வருகிறது என்ற அதிர்ச்சி தகவல்
அச்சமடைய வைப்பதாக உள்ளது. கேரளாவில் கிடைக்கும் ஒருவகை மரத் தூள்களும்
சாயத்தைக் கூட்ட டீ தூளில் கலக்கப்படுகிறது. இவ்வாறு கண்ட, கண்டவற்றைச்
சேர்ந்த தூள்கள் செந்நிற சாயத்தைத் தருகின்றன. "டுபாக்கூர்' நிறுவனங்கள்
பல பக்காவான "நெட் ஒர்க்' அமைத்து ஏரியாவுக்கு ஏற்றார்போல் புதுபுது
பிராண்டுகளில் டீ தூள்களை தயாரித்து விற்பனை செய்து வருகின்றன. இது உடல்
நலத்திற்கு முற்றிலும் தீங்கு விளைவிக்கும் என தெரிந்தாலும்,
வாடிக்கையாளர்களைப் பற்றி டீக் கடைகாரர்களுக்கு கவலை இல்லை. "விலை குறைவு;
லாபம் அதிகம்' என்பதால் டுபாக்கூர் டீ தூள்களை வெகுவாக
பயன்படுத்துகின்றனர். உணவுப்பொருள் கலப்பு தடுப்பு பிரிவினரிடம் இருந்து
தப்பிக்க டீ தூளை தனியாகவும், அதனுடன் கலக்கும் பொடியைத் தனியாகவும்
கொடுக்கும் நூதன யுக்தியையும் கலப்பட கும்பல் பயன்படுத்தி வருகிறது.


கண்டறிவது எப்படி?:
தரமான டீ தூள் வெந்நீரில் போட்டால் தான் சாயம் இறங்கும், குளிர் நீரில்
சாயம் வராது. வெந்நிற துணி, பேப்பரில் தரமான டீ தூளை கொட்டினால் கறை
படியாது. போலி தூளால் கறை உண்டாகும். போலி டீ தூளை உள்ளங்கையில் சில துளி
நீருடன் சேர்த்து வைத்தால் சிறிது நேரத்தில் மருதாணி போட்டது போல் தோல்
நிறம் மாறும். இப்படி போலியாக தயாரான "டீ' தூள்கள் விற்பனையில் கொடி
கட்டிப் பறக்கும் நிலையில், "சிங்கிள் டீ' தானே என கண்ட கண்ட இடங்களில் டீ
குடிப்பதை தவிர்க்க வேண்டும். மலிவு விலையில் கிடைக்கிறதே; வீடு தேடி
வந்து தருகிறார்களே என புது, புது டீ தூள்களை வாங்குவதையும் மக்கள்
தவிர்க்க வேண்டும். இத்தகைய போலி டீ தூள் உடல் நலத்திற்கு கேடு
விளைவிக்கும் என்பதால், பொதுமக்கள் எச்சரிக்கையாக இருப்பது நல்லது. விபரீத
விளைவுகளை ஏற்படுத்தும் வகையிலான கலப்பட டீ தூள்களை தடுக்க அரசு
ஆக்கப்பூர்வமான நடவடிக்கை எடுக்க வேண்டும். இல்லாவிட்டால் மக்கள் கொஞ்சம்
கொஞ்சமாக இனம்புரியாத நோய்களில் சிக்கித் தவிப்பது தவிர்க்க முடியாததாகி
விடும்.

உயிரை கொல்லும் விஷமாகும்; டாக்டர்கள் எச்சரிக்கை:
கலப்பட டீ தூள்களை பயன்படுத்துவதால் என்ன பாதிப்பு வரும் என்ற கேள்விக்கு
டாக்டர்கள் கூறியதாவது: டீ தூளில் இதுபோன்று கண்டவற்றை கலப்பது உடல்
நலத்திற்கு தீங்கு விளைவிக்கும் என்பதில் சந்தேகம் இல்லை. இத்தகைய டீயை
குடிப்பதால் தொண்டை கரகரப்பு, வயிற்றுப் போக்கு போன்ற உடனடி பாதிப்புக்கள்
வரும். தொடர்ந்தால் குடல் புண், "அனீமியா' எனப்படும் ரத்த சோகை பாதிப்பு
வரவும் வாய்ப்புள்ளது. சாயப் பொருட்கள், போதை வஸ்துகள் கலப்பு
போன்றவற்றால் கல்லீரல் பாதிப்பு ஏற்பட்டு, சிறுநீரகமும் பாதிக்கும் அபாயம்
உள்ளது. கலப்பட பவுடர் சிறுநீரகப்பையில் தேங்கி, நாளடைவில் கேன்சராகவும்
மாறவும் வாய்ப்புள்ளது. கலப்பட பொருட்களின் தன்மையைப் பொறுத்து பாதிப்பு
பயங்கரமாக இருக்கும்; இனம்புரியாத நோய்கள் வரலாம். டீ பருகுவது நாளுக்கு
நாள் அதிகரித்து வரும் நிலையில், கலப்படங்கள் கொஞ்சம் கொஞ்சமாக உயிரைக்
கொல்லும் விஷமாகவும் மாறும் வாய்ப்புண்டு. இவ்வாறு டாக்டர்கள் கூறினர்.