சுன்னத்தான தொழுகை

கடமையான தொழுகைகளைத் தவிர மற்ற தொழுகைகளை வீட்டில் தொழுவது சிறந்ததாகும் என நபிமொழிகள் அறிவிக்கின்றன!
''கடமையான தொழுகையைத் தவிர மற்ற தொழுகைகளை உங்கள் இல்லங்களில் தொழுதுகொள்வதே சிறந்ததாகும்'' என்று நபி (ஸல்) அவர்கள் கூறினார்கள். அறிவிப்பவர் ஸைத் பின் ஸாபித் (ரலி) மற்றும் பல நபித்தோழர்கள் வழியாக அறிவிக்கப்பட்டு புகாரி, முஸ்லிம், திர்மிதீ, அபூதாவூத், நஸயீ, அஹ்மத். ஆகிய நூல்களில் பதிவு செய்யப்பட்டுள்ளன.
இவ்வறிப்பை அடிப்படையாகக் கொண்டு சுன்னத்தான தொழுகையை பள்ளிவாசலில் தொழக்கூடாது எனத் தடை செய்யமுடியாது.
மஸ்ஜிதுந்நபவி பள்ளியின் வளாகத்திலேயே நபி (ஸல்) அவர்களின் வீடு இருந்தது. வீட்டு வாசலிலிருந்து வெளியேறினால் அது பள்ளியாக இருந்தது. நபி (ஸல்) அவர்கள் இஃதிகாஃப் இருக்கும்போது பள்ளியிலிருந்து வீட்டிற்குள் தலையை நீட்டுவார்கள். அவர்களின் தலையை நான் வாரிவிடுவேன். என அன்னை ஆயிஷா (ரலி) அவர்களின் அறிவிப்பு புகாரி, முஸ்லிம், திர்மிதீ, அபூதாவுத், அஹ்மத் ஆகிய நூல்களில் பதிவு செய்யப்பட்டுள்ளன. நபி (ஸல்) அவர்கள் பள்ளியில் இஃதிகாஃப் இருக்கும்போது கடமையான, சுன்னத்தான தொழுகைகளைப் பள்ளியில் தான் தொழுதிருப்பார்கள்.
மேலும், நபி (ஸல்) அவர்கள் ரமளான் மாதம் இரவுத் தொழுகையை பள்ளியிலும் தொழுதிருக்கிறார்கள் என ஆதாரப்பூர்வமான அறிவிப்புகளிலிருந்து அறிந்து கொள்கிறோம். அன்றாடம் அலுவல் காரணமாக வீட்டைவிட்டு வெளியேறி, மாலையில் அல்லது இரவில் வீடு திரும்பும் நிலையில் இருப்பவர், கடமையான தொழுகையை அருகில் உள்ள பள்ளியில் தொழுதுவிட்டு, முன் பின் சுன்னத்தான தொழுகைக்காக வீட்டுக்கு வர சந்தர்ப்பம் இல்லாதவர் பள்ளியில்தான் தொழுதாக வேண்டும்.
நபி (ஸல்) அவர்கள் (பள்ளிக்கு) வந்தார்கள். உடனே இகாமத் சொல்லப்பட்டது. அவர்களுடன் நான் சுப்ஹு தொழுதேன். தொழுகையை முடித்து, நான் மீண்டும் தொழுவதைப் பார்த்த நபி (ஸல்) அவர்கள், ''கைஸே ஒரு நேரத்தில் இரண்டு தொழுகைகளா?'' என்று கேட்டார்கள். ''அல்லாஹ்வின் தூதரே! நான் பஜ்ருடைய (சுன்னத்) இரண்டு ரக்அத்களை தொழவில்லை. (அதையே) தொழுதேன்'' என்று கூறினேன். ''அப்படியானால் தவறில்லை'' என்று கூறினார்கள். அறிவிப்பவர் கைஸ் (ரலி) (நூல் - திர்மிதீ 387 இப்னு ஹிப்பான், இப்னு குஸைமா, பைஹகீ)
உபரியான தொழுகைகளை வீட்டில் தொழுவது சிறப்பு என்றாலும் வீட்டில்தான் தொழுதாக வேண்டும் என்றக் கட்டாயம் இல்லை! பள்ளியில் ஜமாஅத்துடன் தொழுதுவிட்டு வீட்டுக்கு வரும் வாய்ப்புள்ளவர் சுன்னத்தான தொழுகைகளை வீட்டில் வந்து தொழலாம். பள்ளியில் ஜமாஅத்தை முடித்துவிட்டு உடனே வீட்டுக்கு வர வாய்ப்பில்லாதவர் உபரியான தொழுகையைப் பள்ளியிலும் தொழலாம்.
இறை வணக்கத்தை நிறைவேற்றுவதற்காக அமைக்கப்படும் பள்ளியில் கடமையான, சுன்னதான வணக்கங்களையும் நிறைவேற்றலாம். சுன்னத்தான தொழுகையை பள்ளியில் தொழக்கூடாது, அது ''பித்அத்'' என்று சொல்வது ஆதாரமற்றதாகும்.
'அன்றியும், நிச்சயமாக மஸ்ஜிதுகள் அல்லாஹ்வுக்காகவே இருக்கின்றன, எனவே, (அவற்றில்) அல்லாஹ்வுடன் (சேர்த்து வேறு) எவரையும் நீங்கள் பிரார்த்திக்காதீர்கள். (அல்குர்ஆன் 72:18)
"உங்களின் இல்லங்களிலும் சில தொழுகைகளைத் தொழுங்கள். அவற்றை மண்ணறைகளாக ஆக்கி விடாதீர்கள்." என்று நபி (ஸல்) அவர்கள் கூறினார்கள். அறிவிப்பவர் இப்னு உமர் (ரலி) (நூல்கள் - புகாரி 1187. முஸ்லிம், திர்மிதீ)