மலேசியாவில் விமான இன்ஜின்கள் திருடிய இந்திய வம்சாவளியினர் இரண்டு பேர் கைது

கோலாலம்பூர் : மலேசியாவில் போர் விமானத்தின் இரண்டு இன்ஜின்களை திருடி விற்ற இரண்டு தமிழர்கள் கைது செய்யப்பட்டுள்ளனர். மலேசிய விமானப்படையில் பணி புரிபவர் தர்மேந்திரன் நாகராஜ்(42). பழைய பொருட்களை வாங்கி விற்கும் தரகர் ராஜேந்திரன் பிரசாத். கடந்த 2007ம் ஆண்டு தர்மேந்திரன் தன்னுடன் பணிபுரியும் முகமது யூசுப் என்பவருடன் சேர்ந்து, சுபாங் ராயல் விமானப்படை மையத்தில் உள்ள விமானப்படை கிடங்கில் உள்ள "எப் 5இ' ரக போர் விமானங்களின் இரண்டு இன்ஜின்களை திருடி, தென்அமெரிக்க கம்பெனிக்கு விற்று விட்டார். இந்த இன்ஜின் கோலாலம்பூரில் உள்ள கிடங்கில் பராமரிக்கப்பட்டு வருவதாக பதிவேட்டில் காட்டப்பட்டுள்ளது.

ஆனால், இந்த இன்ஜின் திருடு போன விஷயம் 2008ல் மே மாதம் தான் தெரிய வந்தது. இதையடுத்து, அதே ஆண்டில் ஆகஸ்ட் மாதம் வழக்கு பதிவு செய்யப்பட்டது. திருடு போன இன்ஜின் அர்ஜென்டினா நாட்டில் கண்டுபிடிக்கப்பட்டது.

இது தொடர்பாக தர்மேந்திரனையும், ராஜேந்திரனையும் மலேசிய போலீசார் கைது செய்தனர். திருடு போன இன்ஜின்களின் மதிப்பு 145 கோடி ரூபாய். இந்த திருட்டுக்கு உடந்தையாக யார் யார் இருந்தார்கள் என்ற விவரம் தெரியவில்லை.

இந்த குற்றச்சாட்டு நிரூபிக்கப்பட்டால் இந்திய வம்சாவளியைச் சேர்ந்த இருவருக்கும் 10 ஆண்டு சிறை தண்டனை கிடைக்கும். இருவர் மீதும், கோர்ட் இன்னும் தீர்ப்பு கூறாத காரணத்தால் 22 லட்ச ரூபாய் ஜாமீனில் இவர்கள் விடுவிக்கப்படலாம் என, நீதிபதி தெரிவித்துள்ளார்.