புத்திசாலி மந்திரி – சிறுவர் கதை

-
முன்னொரு காலத்தில், வேந்தன் நாட்டு அரசர் மிகப் பெரிய
கோட்டை ஒன்றை அரணாக அமைத்து, வசதியாக வாழ்ந்து
வந்தார். கோட்டை வலுவாக இருந்த காரணத்தால், எவராலும்
அவரை வெற்றி கொள்ள முடியவில்லை.

ஒருநாள்-

”அரசர் பெருமானே! நாளை என் மகனுக்குத் திருமணம்
நடக்கிறது. திருமணத்திற்கு வந்து சிறப்பிக்க வேண்டுகிறேன்,”
என்றான் சிற்றரசன்.

அரசரும், வருவதாக வாக்களித்து, சிற்றரசனை வழி
அனுப்பினார்.
மறுநாள்-

”அரசே! சிற்றரசனின் புதல்வன் திருமணத்துக்குத் தாங்கள்
செல்ல வேண்டாம்; அவன் மகா தந்திரசாலி; சூதும், வாதும்
நிறைந்தவன்; படைபலம் உள்ளவன்; ஏதாவது சூழ்ச்சி செய்து
தங்களைச் சிறைப்படுத்தி விடுவான்…
கோட்டையையும் கைப்பற்றி விடுவான்,” என்று எச்சரித்தார்
மந்திரி .

”மந்திரியாரே! அவன் செய்யும் தந்திரங்கள் நம்மை என்ன
செய்யும்… விழிப்புடன் இருந்தால், அவனால் எதுவும் செய்ய
முடியாது,” என்றார் அரசர்.

”அரசே! கோட்டைக்குள் தாங்கள் இருக்கும்வரை, தங்களை
எதிர்க்க, அந்த அரசனுக்கு தைரியம் கிடையாது. அதனால்
தான் நட்புடன் இருந்து வருகிறான். கோட்டையை விட்டு
தாங்கள் வெளியே சென்றால், உதவி குறைந்து தங்களுக்கு
வலிமை குன்றிப் போகும். ஒரு உதாரணம் கூறுகிறேன்
கேளுங்கள்…

”சூரியன் காய்ந்த போதிலும் தண்ணீருக்குள் இருக்கும்
தாமரை வாடுவதில்லை; வதங்குவதில்லை. இதழ்களை
விரித்து செழிப்புடன் வளர்கிறது. சூரியனும் உதவி புரிந்து,
அதை மலரச் செய்கிறான்.

அப்படியின்றி, நீரைவிட்டு தாமரையைக் கரையில் எடுத்துப்
போட்டால், அதை வளர உதவி செய்த சூரியனே, தாமரையை
வாட செய்துவிடும். அதே கதி தான் தங்களுக்கும் நேர
இருக்கிறது,” என்று கூறினார் மந்திரி.

அவர் கூறிய விளக்கத்தைக் கேட்டு, அரசர் மகிழ்ந்து,
திருமணத்துக்குச் செல்லவில்லை.

உண்மையிலேயே திருமணத்திற்கு வரும் அரசரை கைது
செய்ய நினைத்தான் அந்த சிற்றரசன். மந்திரியின் புத்திமதியை
கேட்டதால் தப்பித்தார் அரசர்.

குட்டீஸ் தன்னை விட தாழ்ந்த பதவியிலிருப்பவர்கள் கூறும்
புத்திமதி தானே என்று அலட்சியமாக இருக்கக் கூடாது.
நன்மை பயக்கும் என்று தோன்றினால் தயங்காது அதை நடை
முறைப்படுத்த வேண்டும்.
-
----------------------------
சிறுவர் மலர்