ஓடிப்போனது..! - ஒரு பக்க கதை

‘‘ஏன்னா, இந்த வேலைக்காரக் குட்டி ராணி இருக்காளோல்லியோ…
அவ எப்போ பார்த்தாலும் எதிர்த்த வீடே பழியாக் கெடக்கா! அந்த
வீட்டுக்கார அம்மாவோ எப்போ பார்த்தாலும் பொண்ணு வீடு,
ஸ்லோக கிளாஸ்னு அலைஞ்சிண்டிருக்கா. அந்தாத்துப் பிள்ளை
ராஜு இருக்கானே… ஐ.ஏ.எஸ் எழுதப் போறேன்னு சொல்லிக்கிட்டு
ஆத்திலேயேதான் இருப்பான்.

பஞ்சும் நெருப்பும் பக்கத்துலயேன்னா இருக்கு. ஹும்… காலம்
கெட்டுக் கிடக்கு போங்கோ!’’ அங்கலாய்த்தாள் பர்வதம்.

‘‘பர்வதம்! நமக்கு சம்பந்தமில்லாத விஷயம். விட்டுத் தள்ளு!’’
என்று கண்டிப்பாகச் சொன்னார் மகாதேவன். அப்படிச்
சொன்னாலும், அவரும் வெகு நாளாக கவனித்துக் கொண்டுதான்
இருக்கிறார்.

வி.ஆர்.எஸ். கொடுத்துவிட்ட ராஜுவின் அப்பா நீலகண்டனும்
பெரும்பாலும் வீட்டில்தான் இருக்கிறார். அவரே ராணி வீட்டுக்குள்
சுற்றிச்சுற்றி வருவதைக் கண்டுகொள்ளாமல் பூஜையறையிலேயே
அடைபட்டிருப்பது போலத் தெரிகிறது.

‘சரி… நமக்கெதற்கு வம்பு’ என்று மகாதேவன் சும்மா இருந்து
விட்டார். பத்து நாட்கள் கடந்திருக்கும். ‘‘ஏன்னா! இந்த
அநியாயத்தைக் கேட்டேளா? எதுத்தாத்துல இந்த ராணி மோசம்
பண்ணிட்டாளாம்…’’ என்று பரபரத்தாள் பர்வதம்.

‘‘என்ன ஆச்சு… அந்த ராஜுவும் ராணியும் ஓடிப்போயிட்டாங்களா?’’
எனக் கேட்டவரை விழித்துப் பார்த்த பர்வதம், ‘‘அப்படி நடந்தாதான்
பரவாயில்லையே… ராணியோட ஓடிப் போனது அந்த அம்மாவோட
ஆத்துக்காரர் நீலகண்டன் மாமாவாம்!’’ விக்கித்து நின்றார்
-
--------------------------------
மகாதேவன்.
-குங்குமம்